மம்தா பானர்ஜி

RS TV SCREENSHOTCopyright: RS TV SCREENSHOT

பெகாசஸ் வேவு பார்க்கும் மென்பொருள் பயன்பாடு தொடர்பாக நாடாளுமன்றத்தில் விவாதிக்க வலியுறுத்தி எதிர்கட்சிகளைச் சேர்ந்த உறுப்பினர்கள் தொடர் அமளியில் ஈடுபட்டு வரும் வேளையில், மாநிலங்களவையில் விதிகளை மீறி அவையின் மையப்பகுதிக்கு வந்து ஒழுங்கீனமாக நடந்து கொண்டதாகக் கூறி 6 உறுப்பினர்களை இன்று நாள் முழுவதுமாக இடைநீக்கம் செய்திருக்கிறார் மாநிலங்களவை தலைவரும் குடியரசு துணைத் தலைவருமான வெங்கய்ய நாயுடு.

டோலா சென், நடிமுல் ஹக், அபிர் ரஞ்சன் பிஸ்வாஸ், ஷாந்தா சேத்ரி, அர்பிதா கோஷ், மெளசம் நூர் ஆகிய இந்த ஆறு உறுப்பினர்களும் திரிணமூல் காங்கிரஸ் கட்சியைச் சேர்ந்தவர்கள்.

RAJYA SABHACopyright: RAJYA SABHA

RS TVCopyright: RS TV

நாடாளுமன்றத்தில் அவரசகதியில் நிறைவேற்றப்படும் மசோதா தொடர்பாக கடுமையாக விமர்சித்துள்ளார் திரிணமூல் காங்கிரஸ் எம்.பி டெரெக் ஓ பிரெய்ன்.

இது தொடர்பாக அவர் தமது ட்விட்டர் பக்கத்தில் "நாடாளுமன்ற மழைக்கால கூட்டத்தொடரின் முதல் 10 நாட்களில் மோதி-அமித் ஷா அணி அவசர கதியில் 12 மசோதாக்களை நிறைவேற்றியுள்ளது. இது சராசரியாக ஏழு நிமடங்களுக்குள் ஒரு மசோதா என்ற வகையில் உள்ளது. இந்த அரசு சட்ட மசோதாக்களை நிறைவேற்றுகிறதா இல்லை பாப்டி சாட் செய்கிறதா?" என்று கேள்வி எழுப்பியுள்ளார்.

தமது ட்விட்டர் பக்கத்தில் நாடாளுமன்றத்தின் இரு அவைகளிலும் நிறைவேற்றப்பட்டுள்ள மசோதாக்கள் தொடர்பான வரைகலை படத்தையும் அவர் பகிர்ந்துள்ளார்.

அந்த படத்தின்படி ஒவ்வொரு மசோதாவும் அறிமுகப்படுத்தப்பட்ட சில நிமிடங்களிலேயே நிறைவேற்றப்பட்டுள்ளது. மிக வேகமாக நிறைவேற்றப்பட்ட மசோதாவாக தேங்காய் வளர்ச்சி வாரிய மசோதா, ஒரு நிமிடத்துக்குள்ளாக நிறைவேற்றப்பட்டதாகவும், மிகவும் தாமதமாக அதாவது பதினான்கு நிமிடங்களில் இந்திய விமான நிலையங்கள் ஆணைய பொருளாதார ஒழுங்குமுறை மசோதா நிறைவேற்றப்பட்டுள்ளது.

டெரெக் ஓ பிரெய்னின் விமர்சனத்துக்கு அரசு தரப்பு இன்னும் பதிலளிக்கவில்லை.

KanimozhiCopyright: Kanimozhi

மேற்கு வங்க முதல்வரும் திரிணமூல் காங்கிரஸ் தலைவருமான மமதா பானர்ஜியை டெல்லியில் அவர் தங்கியுள்ள பங்களா பவனில் மக்களவை திமுக உறுப்பினர் கனிமொழி இன்று மாலையில் சந்தித்துப் பேசினார்.

சுமார் 45 நிமிடங்கள் இந்த சந்திப்பு நீடித்தது. பெகாசஸ் விவகாரம், 2024ஆம் ஆண்டில் நடைபெறவுள்ள நாடாளுமன்ற தேர்தல், எதிர்கட்சிகள் ஓரணியில் நாடாளுமன்றத்தில் செயல்படுவது உள்ளிட்டவை குறித்து இருவரும் ஆலோசனை நடத்தினர்.

இதுகுறித்து கனிமொழி எம்.பி தனது ட்விட்டர் பக்கத்தில், "மேற்கு வங்க முதல் மந்திரி மம்தா பானர்ஜியை சந்தித்ததில் மகிழ்ச்சி. மேற்கு வங்க தேர்தலில் அவரது கட்சி அடைந்த மகத்தான வெற்றிக்கு எனது வாழ்த்துகளை தெரிவித்தேன்.மத்திய அரசின் ஜனநாயக விரோத போக்கு மற்றும் பாசிச சக்திகளுக்கு எதிரான போரில் மொத்த நாடும் ஒன்றுபட வேண்டியதன் அவசியம் குறித்து நாங்கள் பேசினோம் என்று கூறியுள்ளார்.

PMOCopyright: PMO

டெல்லி வந்த மேற்கு வங்க முதல்வர் மம்தா பானர்ஜி, பிரதமர் நரேந்திர மோதியை சந்தித்தார். சந்திப்புக்குப் பிறகு செய்தியாளர்களிடம் பேசிய மம்தா பானர்ஜி, இது மரியாதை நிமித்தமான சந்திப்பு என்றும், இந்த சந்திப்பின்போது மாநிலத்துக்கு அதிக அளவில் கோவிட் தடுப்பூசி, மருந்துகள், வழங்கவேண்டும் என்றும், மாநிலத்தின் பெயரை மாற்றவேண்டும் என்ற பழைய கோரிக்கையை நிறைவேற்றவேண்டும் என்றும் வேண்டுகோள் விடுத்ததாக கூறினார்.

இந்த கோரிக்கைக்கு, "பார்க்கலாம்" என்று பிரதமர் நரேந்திர மோதி பதில் அளித்ததாக மம்தா கூறினார்.

பிறகு செய்தியாளர்களிடம் பெகாசஸ் உளவு சர்ச்சை குறித்துப் பேசிய மம்தா பானர்ஜி இந்த விஷயத்தில் பிரதமர் அனைத்துக் கட்சிக் கூட்டத்தைக் கூட்டவேண்டும் என்றும் உச்ச நீதிமன்றத்தின் மேற்பார்வையில் விசாரணை நடத்தப்படவேண்டும் என்றும் வலியுறுத்தினார்.