இந்திய விண்வெளி ஆராய்ச்சி நிறுவனம் விண்ணில் செலுத்தி ஜிஎஸ்எல்வி - எஃப் 10 என்ற ராக்கெட் தொழில்நுட்பக் கோளாறு காரணமாக இலக்கை எட்டவில்லை.
ராக்கெட் வெற்றிகரமாக விண்ணில் செலுத்தப்பட்டதாக ட்விட்டரில் பதிவிட்ட இஸ்ரோ அமைப்பு, பின்னர் அது தோல்வியடைந்ததாக அறிவித்தது.
ஸ்ரீஹரிகோட்டாவில் உள்ள சதீஷ் தவான் விண்வெளி நிலையத்தில் இருந்து இந்த ராக்கெட் இன்று காலை விண்ணில் செலுத்தப்பட்டது.
EOS-3 என்ற செயற்கைக் கோளை சுமந்து சென்ற அந்த ராக்கெட்டில், குறிப்பிட்ட வட்டப்பாதைக்குச் செல்வதற்கு முன்னரே தொழில்நுட்பக் கோளாறு ஏற்பட்டதாக இஸ்ரோ தலைவர் சிவன் தெரிவித்துள்ளார்.
ராக்கெட்டின் கிரையோஜெனிக் நிலையில் தொழில்நுட்பக் கோளாறு ஏற்பட்டதாக அவர் கூறியுள்ளார்.
இந்த ராக்கெட்டை ஏவுவதற்கு இஸ்ரோ இதற்கு முன் இரண்டு முறை திட்டமிட்டது. ஆனால் காலநிலை மற்றும் தொழில்நுட்பக் கோளாறுகள் காரணமாக தள்ளி வைக்கப்பட்டது.
உலக முன்னணி கோடீஸ்வர்களில் ஒருவரான ஜெஃப் பெசோஸ், நியூ ஷெப்பர்ட் என்ற ராக்கெட்டில் விண்வெளி பயணம் மேற்கொண்டார். 11 நிமிடங்கள் நீடித்த இந்த பயணத்தை முடித்துக் கொண்டு அவரும் அவருடன் பயணம் செய்த மேலும் மூவரும் பத்திரமாக பூமிக்கு திரும்பியுள்ளனர். துல்லியமாக சொல்வதென்றால் இவர்கள் 10 நிமிடங்கள் 10 நொடிகள் பயணம் செய்துள்ளனர்.இவர்களின் விண்வெளி பயணம் பற்றிய விரிவான செய்திகளை படிக்க இங்கே சொடுக்கவும்.
பால் ரின்கன்
அறிவியல் ஆசிரியர், பிபிசி செய்தி இணையதளம்
செவ்வாயிலிருந்து முதல் புகைப்படத்தை அனுப்பியுள்ளது சீனா அனுப்பிய சுரொங் ரோவர் (ஊர்தி).
அந்த ரோவரின் முன் பகுதியில் எடுக்கப்பட்ட படம் நில அமைப்பை காட்டுகிறது. பின் பகுதியில் எடுக்கப்பட்ட புகைப்படம் சுரொங்கின் சூரிய சக்தி தகடுகளை காட்டுகிறது.
இந்த சுரொங் ரோவர் சீன நேரப்படி ஞாயிற்றுக்கிழமை செவ்வாயில் தரையிறங்கியது. செவ்வாயில் விண்கலனை வெற்றிகரமாகத் தரையிறக்கும் இரண்டாவது நாடாகியுள்ளது சீனா. இதுவரை அமெரிக்கா மட்டுமே அந்த சிறப்பைப் பெற்றிருந்தது.
