மாலத்தீவுகள்

மாலத்தீவில் சிக்கியுள்ள கன்னியாகுமரி மாவட்ட கட்டுமான தொழிலாளர்களுக்கு கொரோனா நோய் தொற்று பரவும் அபாயம் உள்ளதாகவும் உடனடியாக தமிழகம் அழைத்து வர நடவடிக்கை எடுக்கவும் கட்டுமான தொழிலாளர்கள் சமூக வலைதளங்கள் மூலம் தமிழக அரசுக்கு கோரிக்கை விடுத்துள்ளனர்.

கன்னியாகுமரி மாவட்டம் தக்கலை, முளகுமூடு, நெய்யூர் சுற்றுவட்டார பகுதிகளை சேர்ந்த 500-க்கும் மேற்பட்ட கட்டுமான தொழிலாளர்கள் மாலத்தீவில் கட்டுமான தொழிலில் ஈடுபட்டு வந்தனர்.

தற்போது, கொரோனா தடுப்பு நடவடிக்கையாக மாலத்தீவிலும் ஊரடங்கு அமலில் உள்ள நிலையில் கட்டுமான தொழிலாளர்களும் கடந்த 50-நாட்களாக வேலை இழந்து அறையிலேயே தங்கி உள்ளனர்.

தற்போது அறையில் தங்கி இருக்கும் தொழிலாளிகளில் நான்கு பேருக்கு கொரோனா தொற்று உறுதி செய்யப்பட்டு உள்ளதாகவும், ஒவ்வொரு அறையிலும் 20 முதல் 30 பேர் தங்கி இருப்பதால் இங்கு முறையான மருத்துவ சிகிச்சை வசதிகள் இல்லை என்பதால் தங்களுக்கும் நோய் தொற்று பரவ அதிக வாய்ப்பு உள்ளதாகவும் அவர்கள் கூறுகின்றனர்.

எனவே, தங்களை தாயகம் அழைத்து செல்ல அரசு முன்வர வேண்டும் என கோரிக்கை விடுத்துள்ளனர். தற்போது இந்தியர்களை தாயகம் அழைத்து செல்ல இந்தியாவில் இருந்து வந்த இரண்டு கப்பல்களிலும் தமிழர்களை அழைத்து செல்லபடவில்லை.

இந்நிலையில்தான் தமிழக அரசு மாலத்தீவில் சிக்கி தவிக்கும் கன்னியாகுமரி மாவட்ட கட்டுமான தொழிலாளர்களை கப்பல் மூலம் தூத்துக்குடி அழைத்து செல்ல நடவடிக்கை எடுக்க வேண்டும் என கட்டுமான தொழிலாளர்கள் சமூக வலைதளங்கள் மூலம் கோரிக்கை விடுத்துள்ளனர்.

கொரோனா வைரஸ் அச்சுறுத்தலால் சர்வதேசப் போக்குவரத்து தடைபட்டுள்ளதையடுத்து பல்வேறு நாடுகளில் இந்தியர்கள் சிக்கியுள்ளனர். இவர்களை மீட்டு இந்தியாவிற்கு அழைத்து வரும் பணிகளை மத்திய அரசு மேற்கொண்டு வருகிறது.

ஞாயிற்றுக்கிழமை அன்று மாலத்தீவுகளில் சிக்கியிருந்த 700க்கும் மேற்பட்ட இந்தியர்கள், இந்திய கடற்படைக் கப்பலில் கேரள மாநிலம் கொச்சிக்கு அழைத்து வரப்பட்டனர்.

"தமிழ்நாட்டுக்கு வந்தால் போதும் என்றே தோன்றியது" - மாலத்தீவுகளில் இருந்த தமிழர்கள்