తండ్రి ఆటో డ్రైవర్, కొడుకు టీమ్ ఇండియా ప్లేయర్

  • 24 అక్టోబర్ 2017
మహమ్మద్ సిరాజ్ Image copyright PTI

భారత్ న్యూజీల్యాండ్‌తో ఆడబోయే టీ-20 టీమ్‌లో, ఇద్దరు కొత్తముఖాలకు చోటు దక్కింది.

వారిలో ఒకరు ముంబై ఓపెనర్ శ్రేయస్ అయ్యర్ కాగా, మరొకరు హైదరాబాద్ లెఫ్టార్మ్ మీడియం పేసర్ మహమ్మద్ సిరాజ్.

ఈ ఇద్దరిలో సిరాజ్ కథ కొంచెం భిన్నం. ఎందుకంటే చిన్నప్పటి నుంచి సిరాజ్ క్రికెట్ ఆడడానికి తగిన పరిస్థితులు కానీ, సౌకర్యాలు కానీ లేవు.

1994లో జన్మించిన సిరాజ్‌కు క్రికెట్ అంటే చాలా ఆసక్తి అయినా, ఏదైనా అకాడెమీలో చేరి ఆట నేర్చుకునే తాహతు లేదు. కారణం.. అతని తండ్రి మహమ్మద్ గౌస్ ఓ ఆటో డ్రైవర్.

Image copyright PTI

బ్యాటింగ్ నుంచి బౌలింగ్‌కి

తన స్నేహితులకు టెన్నిస్ బాల్‌తో బౌలింగ్ చేస్తూ సిరాజ్ బౌలింగ్ మెళకువలు తెలుసుకున్నాడు. మొదట బ్యాటింగ్‌ అంటే ఇష్టమున్నా, క్రమంగా బౌలింగ్‌పై దృష్టి సారించాడు.

ఒక్కో మెట్టూ ఎక్కుతూ 2015లో హైదరాబాద్ రంజీ టీమ్‌లో చోటు సంపాదించుకున్నాడు.

మొదటి సీజన్‌లోనే అద్భుతమైన బౌలింగ్ గణాంకాలతో అందరి దృష్టినీ ఆకట్టుకున్నాడు.

తొమ్మిది మ్యాచ్‌లలో 18.92 సగటుతో 41 వికెట్లు పడగొట్టాడు. ఆ సీజన్‌లో అత్యుత్తమ బౌలర్లలో మూడో స్థానాన్ని దక్కించుకున్నాడు.

రెండు సీజన్‌లు హైదరాబాద్‌కు ఆడిన సిరాజ్ కష్టపడి రూ. 10 లక్షలు వెనకేశాడు. దాంతో ఒక ఇల్లు కొనాలనేది అతని కల.

Image copyright PTI

ఐపీఎల్‌ రూపంలో తలుపు తట్టిన అదృష్టం

అతని తలరాతను మార్చే అవకాశం తొందరగానే వచ్చింది. అదృష్టం ఐపీఎల్‌ రూపంలో అతని తలుపు తట్టింది.

సిరాజ్‌ కోసం హైదరాబాద్ సన్‌రైజర్స్ , రాయల్ ఛాలెంజర్స్ మధ్య తీవ్రమైన పోటీ జరిగింది. చివరకు సిరాజ్ బేస్ ప్రైజ్ రూ. 20 లక్షల కన్నా 13 రెట్లు ఎక్కువ ధర.. రూ.2.6 కోట్లు పెట్టి సన్‌రైజర్స్ అతణ్ని సొంతం చేసుకుంది.

ఐపీఎల్‌లో అతనికి కేవలం ఆరు మ్యాచ్‌లలోనే అవకాశం దక్కినా వాటిలో పది వికెట్లు పడగొట్టాడు. గుజరాత్ లయన్స్‌తో జరిగిన చివరి లీగ్ మ్యాచ్‌లో 4 వికెట్లతో ఆకట్టుకున్నాడు.

వాటన్నిటి ఫలితంగా న్యూజీల్యాండ్‌తో జరగబోయే టీ-20 స్క్వాడ్‌కు ఎంపికయ్యాడు.

ఇక శ్రేయస్ అయ్యర్, ప్రస్తుతం అత్యుత్తమ ప్రతిభ కలిగిన క్రికెటర్లలో ఒకడు. 22 ఏళ్ల అయ్యర్‌ను ఆస్ట్రేలియాతో జరిగిన టెస్ట్ సిరీస్‌కు ఎంపిక చేసినా, అతను ఇంకా భారత్ తరపున ఆడలేదు.

ఐపీఎల్ ద్వారా లభించిన ఆణిముత్యాల్లో అయ్యర్ ఒకడు. టాప్ ఆర్డర్‌లో దూకుడుగా ఆడతాడని అతనికి మంచి పేరుంది. ప్రస్తుతం ఐపీఎల్‌లో అయ్యర్ ఢిల్లీ డేర్ డెవిల్స్ తరపున ఆడుతున్నాడు.

మా ఇతర కథనాలు:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)