'పోస్ట్'మార్టం: తిట్లు.. శాపనార్థాల డోసు పెరిగింది!

  • 7 నవంబర్ 2017
సోషల్ మీడియా Image copyright Getty Images

ఫేస్‌బుక్‌లో పోస్ట్ పెట్టి తెలంగాణలో ఓ కండక్టర్‌ సస్పెన్షన్‌కి గురయ్యారు. తన భార్యపై అసభ్యకర కామెంట్లు చేశారని నటుడు శివబాలాజీ పోలీసులకు ఫిర్యాదు చేశారు.. అంతకు ముందు పవన్ కల్యాణ్ మాజీ భార్య రేణూ దేశాయ్‌ని ఆడిపోసుకున్నారు. ఇలా కొంతకాలంగా.. సోషల్ మీడియాలో తెలుగు యువత తీరును పరిశీలిస్తే.. తిట్లు శాపనార్థాల డోసు కాస్త ఎక్కువైనట్లు కనిపిస్తోంది.

ఎవరో కొందరు ఏదో అంటే అందరికీ ఆపాదిస్తున్నారేంటీ? అంటారా మీ సందేహం సరైందే. కాకుంటే ఆ 'కొందరి' వల్లే అందిరకీ సమస్య వస్తోంది.

సరే ఆ విషయాన్ని పక్కన పెట్టేద్దాం. ఎందుకంటే.. ఎవరు పోస్ట్ చేస్తున్నారన్నదానికన్నా దాని వల్ల జరిగే అనర్థాలపై అవగాహన కీలకం.

మరి సోషల్ మీడియాలో మీరు చేస్తున్న పోస్ట్‌లో తేడా వస్తే ఏం జరుగుతుందో తెలుసా?

మూడు నుంచి ఏడేళ్లు జైలుకు వెళ్లాల్సి రావొచ్చు. మీరు గతంలో చేసిన పోస్ట్ వల్ల మీకు భవిష్యత్తులో ఉద్యోగం రాకపోవచ్చు.

Image copyright Getty Images

అంతసీనుందా.. అనుకోవద్దు. ఉందనే అంటున్నారు సైబర్ నేరాలకు సంబంధించిన న్యాయ నిపుణులు పవన్ దుగ్గల్.

భావ ప్రకటన స్వేచ్ఛ ఉంది కదా.. అని ఫేస్‌బుక్, ట్విటర్ ఇతర సోషల్ వేదికల్లో ఏది పడితే అది రాయడానికి లేదంటున్నారు.

చివరకు పోస్టే కాదు.. ఓ కామెంట్ తేడా వచ్చినా తర్వాత ఇబ్బందులు తప్పకపోవచ్చని అంటున్నారు.

కోర్టులు కూడా ఆయా కామెంట్లకు తగినట్లు.. ఇతర చట్టాలను కూడా ఐటీ చట్టానికి అన్వయిస్తూ ప్రజల్లో 'సోషల్' సభ్యతను పెంచేందుకు ప్రయత్నిస్తున్నాయని వివరించారు.

Image copyright Getty Images

చూడ్డానికి బాగుంది కదా.. అని మీరు భావించి నెట్‌లో దొరికిన ఒక అసభ్యకరమైన ఫొటోను మీ ఫేస్‌బుక్‌లో పెట్టారంటే మీ 'ఫేస్'కూడా బుక్కయిపోయినట్టే.

ఎందుకంటే.. అది తర్వాత మిమ్మల్ని ఎప్పుడైనా ఇబ్బంది పెట్టవచ్చు. ఎవరైనా ఫిర్యాదు చేస్తే.. మీరు జైలుకు వెళ్లాల్సి రావొచ్చు.

ఇది ఐటీ చట్టంలోని సెక్షన్ 67 కింద నేరమవుతుంది.. మూడేళ్ల జైలు, 5 లక్షల రూపాయల జరిమానా కూడా పడొచ్చు అని పవన్ దుగ్గల్ చెబుతున్నారు.

ఇటీవల సెలబ్రిటీలు, క్రికెటర్లు, ఇతర ప్రముఖుల పేరిట నకిలీ ఖాతాలు సృష్టించడం బాగా పెరిగింది. ఇది కూడా ఐటీ చట్టంలోని సెక్షన్ 66 (సి) కింద నేరమే. ఇలా చేస్తే ఒకటి కాదు.. రెండు మూడు కేసులు మెడకు తగులు కొనే ప్రమాదముంది.

ఇక ఇతరుల ప్రైవసీకి భంగం కలిగించేలా పోస్ట్‌లు, ఫొటోలు పెట్టినా.. అశ్లీలం.. నగ్న చిత్రాలు పెట్టినా ఐటీ సెక్షన్లోని 66 ఈ, 67 ఎ ప్రకారం మూడు నుంచి 14 ఏళ్ల వరకు జైలు శిక్ష పడవచ్చు.

Image copyright Getty Images

ఒక్క మాటలో చెప్పాలంటే.. మీరు రాసిన పోస్ట్ లేదా కామెంట్.. వ్యక్తులు, సంస్థల పరువుకు కానీ, భద్రత కానీ ఇబ్బంది కలిగించినా.. ప్రజలను భయపెట్టే విధంగా ఉన్నా, అసభ్యకరమైనా.. మీరు ఇబ్బందుల్లో పడినట్టే.

ఈ అంశంపై పవన్ దుగ్గల్ మాట్లాడుతూ.. ఒకటికి రెండు సార్లు ఆలోచించుకుని మరీ పోస్ట్‌లు పెట్టాలన్నారు.

ఇంటర్నెట్‌లో ఎక్కడైనా సరే ఏమి రాసినా.. అది చాలా వేగంగా వ్యాప్తి చెందుతుంది కనుక.. 'పోస్ట్'ల విషయంలో అత్యంత జాగ్రత్తగా ఉండాలని సూచిస్తున్నారు.

ఇంకా ఫేస్‌బుక్ ఎందుకు మాకు వాట్సాప్ గ్రూపులున్నాయి అక్కడ ఇష్టం వచ్చినట్లు రాసుకుంటామన్నా కుదరదు. అక్కడా చట్టం తన పనిని తాను చేసుకుపోతుందని న్యాయనిపుణులు హెచ్చరిస్తున్నారు.

Image copyright Getty Images

ఇలాగైతే ఇంకేం రాస్తాం.. అనుకోవద్దు.చాలా రాయొచ్చు. మీ అభిప్రాయాలను పంచుకోవచ్చు.

కాకుంటే మీరు రాసిన ప్రతి అక్షరానికీ తగిన ఆధారం లేకుంటే హేతుబద్ధత ఉండాలి.

ఇవి రెండూ లేకుంటే మీ పోస్ట్ వల్ల ఇతరులకు.. తర్వాత మీకూ ప్రమాదం ముంచుకు రావొచ్చు.


ఈ 4 గుర్తుంచుకోండి

భావ ప్రకటనా స్వేచ్ఛకూ పరిమితులున్నాయి. ఎక్కడ ఎలా పడితే అలా మాట్లాడానికి రాయడానికి వీల్లేదు.

విమర్శలు చేయొచ్చు కాని దానివల్ల అవతలి వారి పరువుకు భంగం, నష్టం కలగకూడదు.

సోషల్ మీడియా చాలా సెన్సిటివ్ ఇక్కడ రెచ్చగొట్టే వ్యాఖ్యలు చాలా ప్రమాదకరం.

సోషల్ మీడియాకూ నియమ నిబంధనలు ఉంటాయి. వీలైనపుడు చదవండి.


మరిన్ని కథనాలు

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

ఈ కథనం గురించి మరింత సమాచారం

ముఖ్యమైన కథనాలు