వ్యోమగాములను సురక్షితంగా కిందకు తెచ్చే శక్తి భారత్ సొంతం

  • 6 జూలై 2018
ఇస్రో సక్సెస్ Image copyright ISRO/BBC

మానవుల్ని అంతరిక్షంలోకి తీసుకెళ్లే దిశగా భారత అంతరిక్ష పరిశోధన సంస్థ(ఇస్రో) ఒక పెద్ద విజయం అందుకుంది. ఇస్రో శాస్త్రవేత్తలు క్రూ ఎస్కేప్ సిస్టమ్‌ (తప్పించుకునే వ్యవస్థ)ను విజయవంతంగా ప్రయోగించారు. భారతీయ వ్యోమగాముల భద్రతలో కీలక అడుగు వేశారు.

ఏమైనా అవాంతరాలు, సాంకేతిక కారణాల వల్ల అంతరిక్షంలోకి లేదా మరేదైనా గ్రహం వద్దకు వెళ్లే కార్యక్రమాన్ని మధ్యలోనే ఆపివేయాల్సిన పరిస్థితుల్లో వ్యోమగాములను అంతరిక్షం నుంచి సురక్షితంగా భూమి మీదకు తిరిగి తీసుకురావడానికి ఇది సాయం చేస్తుంది. ఇప్పటివరకూ ఇలాంటి సాంకేతికత అమెరికా, రష్యా, చైనా దగ్గర మాత్రమే ఉంది.

5 గంటల కౌంట్‌టౌన్ తర్వాత గురువారం శ్రీహరికోటలోని సతీష్ ధావన్ అంతరిక్ష కేంద్రం నుంచి క్రూ ఎస్కేప్ సిస్టమ్‌ను ప్రయోగించారు. డమ్మీ క్రూ మాడ్యూల్‌తోపాటు 12.6 టన్నుల బరువున్న ఈ సిస్టమ్‌ను ఉదయం 7 గంటలకు ప్రయోగించారు. తర్వాత 259 సెకన్లలో ఈ ప్రయోగం విజయవంతంగా పూర్తైంది.

డమ్మీ క్రూ మాడ్యూల్‌తోపాటు నింగిలోకి దూసుకెళ్లిన క్రూ ఎస్కేప్ సిస్టమ్.. శ్రీహరికోటకు 2.9 కిలోమీటర్ల దూరంలో పారాచ్యూట్ సాయంతో బంగాళాఖాతం తీరంలో దిగింది.

ఇస్రో చేసిన ఈ ప్రయోగం ఎందుకంత కీలకం? భారత అంతరిక్ష కార్యక్రమానికి దీని వల్ల ఎలాంటి ప్రయోజనం లభిస్తుంది? మానవుల్ని అంతరిక్షంలోకి తీసుకెళ్లే దిశగా దీనిని కీలక విజయంగా శాస్త్రవేత్తలు ఎందుకు అభివర్ణిస్తున్నారు?

Image copyright Alamy

సొంతంగా తయారు చేసిన రాకెట్ ద్వారా భారతీయ వ్యోమగాములను స్వదేశం నుంచి అంతరిక్షంలోకి పంపాలని భారత్ భావిస్తోంది.

క్రూ మాడ్యూల్‌తో చేసిన ఎస్కేప్ సిస్టమ్ ప్రయోగం విజయవంతం కావడంతో ఇస్రో తమ లక్ష్యం దిశగా మరో అడుగు ముందుకు వేసిందనే చెప్పవచ్చు. ఎందుకంటే, ఈ ప్రయోగం విజయవంతం కాకుంటే, భారత్ వ్యోమగాములను అంతరిక్షంలోకి పంపించడం సాధ్యం కాదు.

అంతరిక్షంలోకి మన వ్యోమగాములను పంపించడానికి ఇప్పుడు జరిగిన "క్రూ ఎస్కేప్ సిస్టమ్" ప్రయోగం చాలా కీలకం.

Image copyright ISRO/BBC

క్రూ ఎస్కేప్ సిస్టమ్ అంటే ఏంటి?

ఎవరైనా వ్యోమగాములను అంతరిక్షంలోకి పంపించేటపుడు, వారు ఉన్న రాకెట్‌ను లాంచ్ ప్యాడ్ నుంచి ప్రయోగిస్తారు. ఆ సమయంలో రాకెట్‌లో ఉన్న సిబ్బంది ప్రాణాలే ప్రమాదంలో పడే అవకాశం ఉంటుంది.

లాంచ్ ప్యాడ్‌పై రాకెట్ పేలిపోతే. దానికి మంటలు అంటుకోవడం, లేదా వేరే ప్రమాదకరమైన సమస్యలు తలెత్తవచ్చు. ఆ సమయంలో వ్యోమగాములను సురక్షితంగా ఎలా కాపాడాలి, ప్రమాదాలు జరగకుండా ఏం చేయాలి అనేదానిపై శాస్త్రవేత్తలు పరీక్షలు చేస్తారు. అదే "క్రూ ఎస్కేప్ సిస్టమ్" టెస్ట్. ఈ పరీక్షలో భారత్ మొదటిసారే విజయం సాధించింది.

హ్యూమన్ స్పేస్ ఫ్లైట్(మానవ అంతరిక్ష యాత్ర)కు ప్రభుత్వం నుంచి ఇంకా పూర్తిగా అనుమతులు రాలేదు. ఈ కార్యక్రమం ప్రస్తుతం సమర్థమైన సాంకేతిక అభివృద్ధి దిశగా సాగుతోంది.

Image copyright Getty Images

ఇస్రో వరుస పరీక్షలు

అంతకు ముందు 2007లో శాటిలైట్ రీఎంట్రీ ప్రయోగం, 2014లో జియోసింక్రనస్ శాటిలైట్ లాంచ్ వెహికల్ (జీఎస్ఎల్‌వీ) మార్క్-3 ప్రయోగం జరిగినపుడు భారత్ ఒక "డమ్మీ క్రూ మాడ్యూల్" పరీక్ష చేసింది. వాటితోపాటు వ్యోమగాములు వేసుకునే స్పేస్ సూట్ టెస్ట్ కూడా నిర్వహించింది.

ఇలా రకరకాల ప్రయోగాలను ఇస్రో ఒకేసారి చేస్తూ వస్తోంది. చిన్న చిన్న అడుగులు వేస్తూ సమర్థమైన సాంకేతికత దిశగా ముందుకెళుతోంది. ప్రభుత్వం పచ్చజెండా ఊపగానే, వీలైనంత త్వరగా భారతీయ వ్యోమగాములను సులభంగా అంతరిక్షంలోకి పంపించగలిగేలా ఇస్రో ఎప్పటి నుంచో ఈ సన్నాహాలు చేస్తోంది.

Image copyright NASA

లో ఎర్త్ ఆర్బిట్‌లో తొలి పరీక్ష

భారత్ మొదటి సారి తమ వ్యోమగాములను అంతరిక్షంలోకి పంపించేటపుడు, వారిని సురక్షితంగా తిరిగి భూమిపైకి తిరిగి తీసుకురావడానికి వీలుగా భూ కక్ష్యలో తక్కువ ఎత్తుకు(లో ఎర్త్ ఆర్బిట్) పంపుతారు.

ఇది ఉపగ్రహ ప్రయోగంలా ఉండదు. వాటిలో రోబోటిక్ మిషన్ ఉంటుంది. ఈ ప్రయోగంలో అంతరిక్షంలోకి పంపించే వ్యోమగాములను తప్పనిసరిగా తిరిగి భూమిపైకి తీసుకురావల్సి ఉంటుంది. దానికోసం సమర్థమైన, నాణ్యమైన టెక్నాలజీ తప్పనిసరి. తాజా ప్రయోగాలతో భారత్ ఆ దిశగా కీలక అడుగు వేసింది.

Image copyright NASA

హ్యూమన్ స్పేస్ ఫ్లైట్

ఇప్పటివరకూ మూడు దేశాలు మాత్రమే "హ్యూమన్ స్పేస్ ఫ్లైట్" చేశాయి. రష్యా, అమెరికా, చైనా.. ఈ మూడూ అంతరిక్షంలోకి వ్యోమగాములను పంపించి, తిరిగి తీసుకురావడంలో స్వయం ప్రతిపత్తి సాధించాయి.

భారత్ వ్యోమగాములను పంపించడంలో విజయం సాధిస్తే, అది అంతరిక్షంలోకి మనిషిని పంపిన ప్రపంచంలోని నాలుగో దేశం అవుతుంది.

అంతరిక్ష ప్రయోగాల్లో ఇస్రో ఇప్పటికే ఎన్నో విజయాలు సాధించింది. ఇప్పుడు జరిగిన "క్రూ మాడ్యూల్ ఎస్కేప్ సిస్టమ్" పరీక్ష "హ్యూమన్ స్పేస్ ఫ్లైట్" కోసం చాలా ముఖ్యమైన ప్రయోగం.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

ముఖ్యమైన కథనాలు

బీజేపీలో చేరిన నలుగురు టీడీపీ రాజ్యసభ సభ్యులు.. ఎంపీల ‘విలీనం’పై లీగల్ యాక్షన్ తీసుకుంటామన్న టీడీపీ

ప్రపంచవ్యాప్తంగా 7 కోట్ల మంది వలస.. 70 ఏళ్లలో ఇదే అత్యధికం - యుఎన్‌హెచ్‌సీఆర్

టీకాలు ఎలా పనిచేస్తాయి.. టీకాల విజయం ఏమిటి.. టీకాలపై కొందరిలో సంశయం ఎందుకు

14 ఏళ్ల తర్వాత చైనా అధ్యక్షుడు ఉత్తర కొరియాకు ఎందుకు వెళ్తున్నారు

‘టీడీపీని బీజేపీలో విలీనం చేయండి’ - వెంకయ్య నాయుడిని కోరిన సుజనా, సీఎం రమేశ్, గరికపాటి, టీజీ

పాకిస్తాన్‌ జైళ్లలో మత్స్యకారులు: 'ఎదురుచూపులతోనే ఏడు నెలలు .. వస్తారో రారో తెలియదు'

గుజరాత్ లాకప్‌డెత్ కేసులో ఐపీఎస్ అధికారి సంజీవ్ భట్‌ను దోషిగా తేల్చిన కోర్టు

వీడియో: చిన్న కర్రతో సింహాన్ని తరిమేసిన గోశాల నిర్వాహకుడు