గుజరాత్: ఈ విద్యార్థి పెయింటింగ్ పాఠ్య పుస్తకం కవర్ పేజీ అయ్యింది.. అతను కూలీ అయ్యాడు.. ఆ పెయింటింగ్ వల్లే మళ్లీ స్కూలుకెళ్తున్నాడు

  • 9 ఆగస్టు 2018
మళ్లీ స్కూలుకు పంపిన పెయింటింగ్ Image copyright VINOD RATHVA
చిత్రం శీర్షిక తల్లిదండ్రులతో కాంతి రాట్వా

"పొలాల్లో పని చేస్తున్నప్పుడు, నేను వేసిన పెయింటింగ్‌ ఒక పుస్తకం కవర్ పేజీగా ముద్రించారనే విషయం తెలిసింది".

12 ఏళ్ల కాంతి రాఠ్వా ఈ మాట అన్నాడు. ఇతడిది గుజరాత్‌లోని ఛోటా ఉదయపూర్‌ దగ్గర కచేల్ గ్రామం. అది అహ్మదాబాద్‌కు సుమారు 200 కిలోమీటర్ల దూరంలో ఉంటుంది.

మూడేళ్ల క్రితం స్వచ్ఛ భారత్ ప్రచారానికి సంబంధించిన ఒక పోటీలో అతడు ప్రథమ స్థానంలో నిలిచాడు. అప్పుడు రాష్ట్ర ముఖ్యమంత్రిగా ఉన్న ఆనందీబేన్ పటేల్ నుంచి బహుమతి అందుకున్నాడు.

కానీ ముఖ్యమంత్రి నుంచి సన్మానం అందుకున్న తర్వాత కూడా కాంతి పరిస్థితిలో మార్పు రాలేదు, మరింత దారుణంగా తయారైంది. దాంతో కుంచె పట్టిన అతడి చెయ్యి గొడ్డలి పట్టుకోవాల్సి వచ్చింది.

కాంతి వేసిన పెయింటింగ్ ఇప్పుడు కేంద్ర ప్రభుత్వ సంస్థ ఎన్సీఈఆర్టీ (విద్య పరిశోధన, శిక్షణ జాతీయ మండలి) ముద్రించిన ఒక పుస్తకానికి కవర్ పేజీ అయ్యింది. కానీ చదువుకు దూరమైన అతడు మాత్రం కూలీగా మారాడు.

Image copyright VINOD RATHVA
చిత్రం శీర్షిక స్వచ్ఛ భారత్ పోటీలో కాంతికి ప్రథమ బహుమతి అందించిన పెయింటింగ్

ముఖ్యమంత్రి సన్మానం

2015లో తను వేసిన పెయింటింగ్‌కు గాను ముఖ్యమంత్రి నుంచి బహుమతి అందుకున్నప్పుడు కాంతి మూడో తరగతి చదువుతున్నాడు.

చిత్రలేఖనం పోటీలో అతడు చీపురుతో నేలను శుభ్రం చేస్తున్న గాంధీ బొమ్మ వేశాడు. మొదటి బహుమతిగా అతడికి 2 వేల రూపాయలు కూడా ఇచ్చారు.

కేంద్ర ప్రభుత్వం 2014 అక్టోబర్ 2వ తేదీన స్వచ్ఛ భారత్ కార్యక్రమం ప్రారంభించింది. దేశవ్యాప్తంగా పరిశుభ్రతను పెంచాలని భావిస్తోంది.

Image copyright VINOD RATHVA
చిత్రం శీర్షిక ఉపాధ్యాయుడు వినోద్ రాఠ్వాతో (కుడివైపు) కాంతి తల్లిదండ్రులు

స్కూల్ వదిలి పొలం పనుల వైపు

కాంతి కుటుంబం కూలిపనులు చేసుకుని జీవిస్తుంది. అతడి అమ్మనాన్నలు ప్రస్తుతం అహ్మదాబాద్ నుంచి 130 కిలోమీర్ల దూరంలో ఉన్న సురేంద్రనగర్‌లో పనులు చేసుకుంటున్నారు.

పెయింటింగ్ బహుమతి గెలుచుకున్న తర్వాత రెండేళ్ల వరకూ కాంతి స్కూలుకు వెళ్లేవాడు.

"నాకు ఇద్దరు తమ్ముళ్లు, ఇద్దరు చెల్లెళ్లు. వాళ్లు కూడా మా అమ్మనాన్నలతో పనికెళ్తున్నారు. నాకంటే చిన్నవాళ్లు అక్కడ పనులు చేస్తుంటే, నేనిక్కడ ఎలా చదవగలను. ఇంట్లో పరిస్థితి సరిగా లేదు, అందుకే నేను స్కూలు వదిలి, కుటుంబంతో పనికి వెళ్లాల్సివచ్చింది" అంటాడు కాంతి.

Image copyright VINOD RATHVA
చిత్రం శీర్షిక ఎన్సీఈఆర్టీ పుస్తకంపై కాంతి పెయింటింగ్

'పెయింటింగ్ విషయం తెలీదు'

ఇటీవల ఎన్సీఈఆర్టీ రెండు కొత్త పుస్తకాలను ప్రచురించింది. కాంతి పెయింటింగ్‌ను మూడో తరగతికి చెందిన ఒక పుస్తకం కవర్ పేజీపై ముద్రించింది.

కానీ ఈ పుస్తకం ముద్రించిన సమయంలో కాంతి స్కూల్ వదిలి సురేంద్రనగర్‌లో తన అమ్మనాన్నలతో కలిసి కూలి పనులకు వెళ్తున్నాడు.

"నేను వేసిన పెయింటింగ్ ఒక పుస్తకంపై వేశారని నాకు తెలీదు. మా నానమ్మ చనిపోయినపుడు నేను ఛోటా ఉదయ్‌పూర్ వస్తే, మా టీచర్ నాకా విషయం చెప్పారు" అని కాంతి బీబీసీకి చెప్పాడు.

ఛోటా ఉదయ్‌పూర్‌లో ఉన్న ఆ స్కూలు ఉపాధ్యాయుడు వినోద్ రాఠ్వా బీబీసీతో మాట్లాడుతూ.. "కాంతి చదువు ఎందుకు ఆపేశాడో వాళ్ల చిన్నాన్న నాకు చెప్పారు. తన పెయింటింగ్ పుస్తకంపై ముద్రించినా, అతడికి ఆ విషయం తెలీదు, కాంతికి బహుమతి ఇచ్చిన వాళ్లు, అతడి కుటుంబం స్థితి ఎలా ఉందో తెలుసుకోలేదు" అన్నారు.

Image copyright VINOD RATHVA

కాంతికి సాయం అందించారు

గ్రామస్తులకు కాంతి పరిస్థితి తెలియగానే.. అందరూ అతడికి సాయం చేయాలని ఆలోచించారు.

"కాంతి మళ్లీ చదువుకోడానికి ప్రభుత్వం నుంచి మాత్రం ఎలాంటి సాయం అందలేదు" అని వినోద్ రాఠ్వా చెప్పారు.

అయితే, గుజరాత్ మాజీ డీజీపీ పీసీ ఠాకూర్‌కు అతడికి సాయం చేసేందుకు ముందుకొచ్చారు.

"నేను కాంతి కుటుంబ సభ్యులను కలవడానికి వెళ్లాను. మరికొంతమందిని కూడా కలిసి, అతడికి మరింత సాయం అందించడానికి ప్రయత్నించాను" అని పీసీ ఠాకూర్ బీబీసీకి చెప్పారు.

Image copyright VINOD RATHVA
చిత్రం శీర్షిక వినోద్ రాఠ్వాతో కాంతి

గొప్ప చిత్రకారుడు కావాలనే కల

ప్రస్తుతం కాంతి తన చదువు తిరిగి కొనసాగించేలా వినోద్ రాఠ్వా అతడిని దత్తత తీసుకున్నారు.

వినోద్ రాఠ్వా, పీసీ ఠాకూర్ సాయంతో కాంతి మళ్లీ స్కూలుకు వెళ్తున్నాడు. ఇప్పుడు అతడు ఛోటా ఉదయ్‌పూర్ దగ్గరే 'ఏకలవ్య స్కూల్‌'లో చదువుతున్నాడు. భవిష్యత్తులో చిత్రలేఖనంలో గొప్పపేరు సంపాదించాలని అనుకుంటున్నాడు.

" కాంతి స్కూలుకు వెళ్తున్నందుకు సంతోషంగా ఉంది. కానీ మేం మా మిగతా పిల్లలను చదివించలేకపోతున్నామని బాధగా కూడా ఉంది" అని అతడి తండ్రి జెందూ రాఠ్వా బీబీసీతో అన్నారు.

కాంతి వేసిన పెయింటింగ్ అతడు తిరిగి స్కూలుకు వెళ్లేలా చేసింది. గుజరాత్‌ విద్యా శాఖ గణాంకాల ప్రకారం 2013-14లో రాష్ట్రంలో చదువు మధ్యలోనే వదిలేసిన పిల్లలు 6.91 శాతం మంది ఉన్నారు.

"కాంతి భవిష్యత్తులో గొప్ప పెయింటర్, లేదా కళాకారుడు కావచ్చు, కానీ మనం పిల్లలు చదువు మధ్యలోనే నిలిపేస్తే ఎంతోమంది భవిష్యత్ మేధావులను, కళాకారులను కోల్పోతాం" అంటారు వినోద్ రాఠ్వా.

ఇవికూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)