అండమాన్‌లో క్రైస్తవ మత ప్రచారకుడి హత్య: సెంటనలీస్‌కు ‘సువార్త బోధించేందుకే జాన్ అలెన్ చౌ అక్కడికి వెళ్లాడు’

  • 22 నవంబర్ 2018
అండమాన్ హత్య Image copyright INSTAGRAM/JOHN CHAU
చిత్రం శీర్షిక అక్టోబర్ 21న అండమాన్ ప్రాంతంలో పర్యటిస్తూ @johnachau పోస్ట్ చేసిన ఫొటో

భారతదేశంలోని అండమాన్ నికోబార్ దీవుల్లోని ఆదిమజాతి ప్రజల బాణాలతో హత్యకు గురైనట్లు చెబుతున్న 27 ఏళ్ల అమెరికా మతప్రచారకుడి కుటుంబం అతడి హంతకులను క్షమిస్తున్నామని ప్రకటించింది.

"జాన్ అలెన్ చౌకు దేవుడంటే ఇష్టం, పేదలకు సాయం చేయాలని అనుకునే అతడు, సెంటినలీన్ ప్రజల ప్రేమను తప్ప వేరే ఏం కోరుకోలేదు" అని వారు తెలిపారు.

ఉత్తర సెంటినెల్ దీవికి చేరుకోడానికి అలెన్ చౌకు సాయం చేసిన ఏడుగురిని అరెస్టు చేశారు. చౌ మృతదేహం తీసుకురావడానికి మరికొన్ని రోజులు పట్టచ్చని భారత అధికారులు చెబుతున్నారు.

ఈ దీవిలో ఉన్న తెగను, వారి జీవనశైలిని రక్షించడానికి బయటివారు ఈ దీవిలోకి వెళ్లడం, వారిని కలవడం నిషేధించారు.

"చౌ తన ఇష్ట ప్రకారమే" ఆ దీవికి వెళ్లాడని అతడి కుటుంబ సభ్యులు ఇన్‌స్టాగ్రాంలో ఒక ప్రకటన విడుదల చేశారు.

"అండమాన్ దీవుల్లో ఉన్న అతడి స్నేహితులను కూడా విడుదల చేయాలని మేం కోరాం. చౌ తన ఇష్ట ప్రకారమే అక్కడికి వెళ్లాడు. అతడు చేసిన ఆ పనికి సహకరించినందుకు వారిని పీడించడం భావ్యం కాదు" అని తెలిపారు.

"గుర్తు తెలియని వ్యక్తులపై హత్య కేసు నమోదు చేశాం. చౌ దీవికి చేరుకోడానికి సహకరించిన ఐదుగురు జాలరులతోపాటు ఏడుగురిని అరెస్ట్ చేశాం" అని పోలీసులు చెప్పారు.

అధికారులు ఈ ఘటన జరిగిన ప్రాంతానికి ఒక హెలికాప్టర్‌ను, తర్వాత ఒక నౌకను కూడా పంపించారు.

"మేం దీవికి దూరంగా ఉన్నాం. ఇప్పటివరకూ మృతదేహాన్ని కూడా గుర్తించలేదు. అదెక్కడుందో కనుగొనడానికి మరికొన్ని రోజులు పట్టచ్చు" అని అండమాన్ నికోబార్ దీవుల పోలీసులు ఏఎఫ్‌పీకి చెప్పారు.

ఈ కేసులో సాయం కోసం పోలీసులు ఆంత్రొపాలజీ శాస్త్రవేత్తలతోపాటు, ఆ ప్రాంతం గురించి తెలిసిన నిపుణులను, గిరిజన సంక్షేమ శాఖ, అటవీశాఖ అధికారులను సంప్రదిస్తున్నారు.

"మేం వారికి, వారి ప్రాంతానికి ఎలాంటి అంతరాయం కలిగించకూడదు. అది చాలా సున్నితమైన ప్రాంతం. దానికి కొంత సమయం పడుతుంది" అని తెలిపారు.

చౌ స్థానిక జాలరులతోపాటు ఒక పడవలో ఉత్తర సెంటినెల్ దీవి వరకూ వచ్చాడు. తర్వాత చిన్న పడవలో ఒంటరిగా తీరం వైపు వెళ్లారు. దీవిలో అడుగుపెట్టగానే ఆయనపై అక్కడి ప్రజలు బాణాలతో దాడి చేశారని చౌను అక్కడకు తీసుకువెళ్లిన జాలరులు చెప్పారు.

Image copyright CHRISTIAN CARON - CREATIVE COMMONS A-NC-SA

ప్రాణం తీసిన కల

ఇంటర్నేషనల్ క్రిస్టియన్ కన్‌సర్న్ సంస్థ అధ్యక్షుడు జెఫ్ కింగ్ ఈ సంఘటనపై 'బీబీసీ న్యూస్‌డే కార్యక్రమం'లో మాట్లాడారు. ఈ సంస్థతో అలెన్ చౌకు అనుబంధం ఉంది. అండమాన్ పర్యటన సందర్భంగా కూడా జెఫ్ కింగ్‌తో అలెన్ చౌ మాట్లాడారు.

''ఈ ప్రజలకు సువార్త బోధించేందుకే జాన్ అక్కడికి వెళ్లాడు. దీనిపై అతను మాట్లాడాడు. ఇందుకు కొంత కాలంగా ప్రణాళిక తయారు చేసుకున్నాడు. కాబట్టి ఇది ఎవరి ఆదేశమూ కాదు.. చంచలత్వంతో చేసిన పనీ కాదు'' అని జెఫ్ కింగ్ చెప్పారు.

"చౌ అక్కడి దీవులకు, ముఖ్యంగా ఆ దీవికి ఇంతకు ముందు కూడా వెళ్లాడు. ఆరోజు మాత్రం మూడు, నాలుగు సార్లు అక్కడికి వెళ్లాడు. మొదట వెళ్లినప్పుడు బాణాలు వేసి ఆయన్ను వెనక్కు పంపించేశారు. రెండోసారి వెళ్లినపుడు చౌ రెండు పెద్ద చేపలు బహుమతిగా తీసుకుని వెళ్లాడు".

"నాకు తెలిసి వాళ్లు బహుమతి అంగీకరించారు. అతడితో గంటపాటు కూచున్నారు. వాళ్లు తనతో గొడవపడ్డారని, తనపై బాణాలు వేశారని చౌ చెప్పాడు. తిరిగి పడవ దగ్గరకు వచ్చేశాడు. మూడోసారి తిరిగి అక్కడకు వెళ్లినప్పుడు ఆయన్ను చంపి దూరంగా తీసుకెళ్లారని బైనాక్యులర్స్‌లో నుంచి చూస్తున్న జాలరులు చెప్పారు."

"అది ఆయన చేస్తున్న ఉద్యోగం కాదు. అది ఆయన కల, దురదృష్టవశాత్తూ అది ఆయన ప్రాణాలే పోయేలా చేసింది" అని జెఫ్ కింగ్ చెప్పారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

ఈ కథనం గురించి మరింత సమాచారం