జీఎస్టీ రేట్ల తగ్గింపు జాబితా: సినిమా టికెట్లు, టీవీలు, డిజిటల్ కెమెరాలు.. దేనిపై ఎంత తగ్గింది?

GST

పలు వస్తువులపై జీఎస్టీ (వస్తు సేవల పన్ను) తగ్గిస్తూ కేంద్ర ఆర్థికమంత్రి అరుణ్‌జైట్లీ నేతృత్వంలో శనివారం జరిగిన సమావేశంలో జీఎస్టీ మండలి నిర్ణయం తీసుకుంది.

సినిమా టికెట్లు, డిజిటల్‌ కెమెరాలు, 32 అంగుళాల వరకు టీవీలు, పవర్‌ బ్యాంకులు, వీడియోగేమ్ పరికరాల మీద విధిస్తున్న పన్నులను తగ్గించారు.

ఇక నుంచి 28% జీఎస్టీ శ్లాబులో విలాసవంతమైన వస్తువులు మాత్రమే ఉంటాయని అరుణ్‌జైట్లీ వెల్లడించారు.

ఇప్పటి వరకు 28% శ్లాబులో 34 రకాల వస్తువులు ఉండేవి. ఇప్పుడు అందులోంచి ఆరింటిని తొలగించాలని జీఎస్టీ మండలి నిర్ణయించింది.

ఈ పన్నుల తగ్గింపు ద్వారా ప్రభుత్వానికి రూ.5,500 కోట్ల ఆదాయం తగ్గుతుందని అరుణ్ జైట్లీ అన్నారు.

ఫొటో క్యాప్షన్,

దిల్లీలోని విజ్ఞాన్ భవన్‌లో శనివారం నాడు జీఎస్టీ మండలి సమావేశం జరిగింది

దివ్యాంగుల కోసం తయారు చేసే వీల్ ఛైర్ లాంటి ఉపకరణాలపై పన్నును 28 శాతం నుంచి అయిదు శాతానికి తగ్గించారు. పునరుత్పాదక ఇంధన పరికరాలను కూడా 5 శాతం శ్లాబులోకి తీసుకొచ్చారు.

సేవింగ్స్, జన్ ధన్ యోజన ఖాతాల లావాదేవీలపై బ్యాంకు రుసుములను మినహాయించారు. ప్రత్యేక చార్టర్డ్‌ విమానాల్లో తీర్థయాత్రలు చేసే వారికి ఎకానమీ క్లాస్‌లో జీఎస్టీని 5 శాతానికి, బిజినెస్‌ క్లాస్‌లో 12 శాతానికి తగ్గించారు.

కొత్త పన్నులు జనవరి 1వ తేదీ నుంచి అమలులోకి రానున్నాయి.

కొన్ని ప్రధానమైన వస్తువుల మీద పన్ను తగ్గింపు ఎలా ఉందో చూద్దాం.

సినీ ప్రముఖుల ప్రశంసలు.. రాహుల్ గాంధీ విమర్శలు

అయితే, జీఎస్టీ పన్నుల తగ్గింపు నిర్ణయం పట్ల సినిమా పరిశ్రమ వర్గాలు హర్షం వ్యక్తం చేస్తుండగా, విపక్ష పార్టీల నాయకుల మాత్రం విమర్శలు వ్యక్తమవుతున్నాయి.

"సినిమా టికెట్ల మీద జీఎస్టీ రేట్లు తగ్గించినందుకు ప్రధానమంత్రి నరేంద్ర మోదీకి, కేంద్ర ప్రభుత్వానికి కృతజ్ఞతలు. ఇది చరిత్రాత్మక నిర్ణయం" అంటూ బాలీవుడ్ నిర్మాత కరణ్ జోహార్, నటులు ఆమీర్ ఖాన్, అక్షయ్ కుమార్ సహా పలువురు ట్వీట్లు చేశారు.

అయితే, మూడు హిందీ రాష్ట్రాల అసెంబ్లీ ఎన్నికల ఫలితాల తర్వాత, ఇలాగైతే 2019లో బీజేపీకి కేంద్రంలో ఓటమి తప్పదన్న ఆలోచనతోనే జీఎస్టీ తగ్గించారని కాంగ్రెస్ అధ్యక్షుడు రాహుల్ గాంధీ విమర్శించారు.

జీఎస్టీని 'గబ్బర్ సింగ్ ట్యాక్స్'గా అభివర్ణించిన రాహుల్, దాని అమలు విషయంలో ప్రభుత్వం విఫలమైందన్నారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)