భారత వైమానిక దళం అమ్ములపొదిలో చేరిన చినూక్ హెలికాప్టర్లు.. పెరిగిన బలం

  • 25 మార్చి 2019
చండీగఢ్‌లో చినూక్ హెలికాప్టర్
చిత్రం శీర్షిక చండీగఢ్‌లో చినూక్ హెలికాప్టర్

భారత వైమానిక దళం తన హెలికాప్టర్ల బలగాన్ని మరింత బలోపేతం చేసుకుంది. చినూక్ హెలికాప్టర్లను ఈ రోజు వాయుసేనలో ప్రవేశపెట్టారు.

దేశానికి భద్రతాపరమైన సవాళ్లు చాలా ఉన్నాయని, సంక్లిష్టమైన భూభాగంలో వాయుమార్గంలో భారీ ఆయుధ సామగ్రి, ఇతరత్రా తరలించే సామర్థ్యాన్ని పెంచుకోవాల్సి ఉందని భారత వైమానిక దళ అధిపతి ఎయిర్ చీఫ్ మార్షల్ బీఎస్ ధనోవా చండీగఢ్‌లో ఎయిర్ ఫోర్స్ 12 వింగ్‌లో చెప్పారు.

ఐఏఎఫ్‌లో చినూక్ హెలికాప్టర్ల చేరికతో సంక్లిష్టంగా ఉండే ఎత్తైన ప్రదేశాలకు వీటిని తరలించే సామర్థ్యం అసాధారణంగా పెరిగిందని ఆయన తెలిపారు.

సైనిక ఆపరేషన్లలో శతఘ్ని ఫిరంగి లాంటి భారీ ఆయుధాల తరలింపులోనే కాదు, సుదూర ప్రాంతాల్లో విపత్తు సహాయ చర్యల్లోనూ ఈ హెలికాప్టర్లు ఎంతగానో ఉపయోగపడతాయని ధనోవా వివరించారు.

2015లో ఆర్డర్ ఇచ్చిన భారత్

అమెరికాలోని బోయింగ్ సంస్థ నుంచి పదిహేను సీహెచ్-47ఎఎఫ్ చినూక్ హెలికాప్టర్ల కొనుగోలుకు భారత్ ఆర్డర్ ఇచ్చింది. ఈ మేరకు 2015 సెప్టెంబరులో ఒప్పందం కుదిరింది. వీటిలో నాలుగు హెలికాప్టర్లు సోమవారం భారత వైమానికదళంలో చేరాయి. మిగతా 11 హెలికాప్టర్లు వచ్చే ఏడాదిలోగా భారత్‌కు వచ్చే అవకాశముంది.

సరిహద్దుల్లో వ్యూహాత్మకంగా కీలకమైన రహదారుల నిర్మాణం, ఇతర ప్రాజెక్టుల్లోనూ చినూక్ హెలికాప్టర్లు ముఖ్య పాత్ర పోషిస్తాయని వైమానిక దళ అధికారులు చెబుతున్నారు.

సాధారణ సైనిక హెలికాప్టర్‌తో పోలిస్తే చినూక్ హెలికాప్టర్‌ ప్రత్యేకతలు ఏమిటంటే- ఇది పెద్దస్థాయిలో బరువును మోసుకెళ్లగలదు. దీనికి జంట రోటర్లు ఉంటాయి. అమెరికాలోని డెలవేర్‌లో చినూక్ హెలికాప్టర్లపై ఇటీవల నాలుగు వారాలపాటు శిక్షణ పొందిన భారత పైలట్ ఆశిష్ గహ్లావత్ ఈ విషయం తెలిపారు.

19 దేశాల్లో వాడుతున్న సైనిక బలగాలు

''సింగిల్ రోటర్‌ ఉండే హెలికాప్టర్లు వాడుతున్నాం. అయితే దీనికి ఇంజిన్లు కూడా రెండు ఉంటాయి. ఇదో అధునాతన సాంకేతిక పరిజ్ఞానం'' అని ఆయన చెప్పారు.

అన్ని రకాల వాతావరణ పరిస్థితుల్లో పనిచేసే సామర్థ్యం ఈ హెలికాప్టర్ సొంతమని, ప్రపంచంలోనే అత్యంత క్లిష్టమైన కొన్ని ప్రదేశాల్లో పనిచేసే భారత వైమానిక దళానికి ఇది కీలకమని అధికారులు పేర్కొంటున్నారు.

చినూక్ హెలికాప్టర్ల చేరికతో నియంత్రణ రేఖ వెంబడి ఎత్తైన ప్రదేశాల్లోకి త్వరితగతిన ఫిరంగులతోపాటు బలగాలను తరలించే సామర్థ్యం పెరుగుతుందని వారు చెబుతున్నారు.

గరిష్ఠంగా 11 టన్నుల పేలోడ్‌ను, 54 మంది బలగాలను తరలించగల సామర్థ్యం ఈ చాపర్‌కు ఉందని ఆశిష్ గహ్లావత్ దీనికి ఉన్న మూడు కొక్కేలను(హుక్స్) చూపిస్తూ చెప్పారు.

ఈ హెలికాప్టర్‌ను 19 దేశాల్లో సైనిక బలగాలు వాడుతున్నాయి. భారత్ ప్రస్తుతం ఆపరేషన్లలో సోవియట్ మూలాలున్న ఎంఐ-26 హెలికాప్టర్లను వాడుతోంది.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

ముఖ్యమైన కథనాలు

శ్రీలంక దాడుల మృతులు: వంద మరణాలు ఎందుకు తగ్గాయి.. తప్పుగా లెక్కించడానికి కారణాలేంటి

టీఎస్‌ఆర్టీసీ బస్: ‘‘పక్కా ప్లాన్‌తో ప్రొఫెషనల్స్ చేసిన దొంగతనం ఇది’’.. ఎలా జరిగిందంటే..

మహారాష్ట్ర రైతుల లాంగ్ మార్చ్ ‘ముఖచిత్రం’ షేకుబాయికి భూమి వచ్చిందా

మనుషుల్లాగా సెల్ఫీకి ఫోజిచ్చిన గొరిల్లాలు... ఈ ఫొటో వెనకున్న పూర్తి కథ

శ్రీలంక పేలుళ్లు: ఈ ఫొటోలు నిజమేనా

ప్రెస్ రివ్యూ:"కేసీఆర్ ప్రభుత్వాన్ని రద్దు చేయాలి"- గవర్నర్‌కు కాంగ్రెస్ డిమాండ్

కిమ్ జోంగ్ ఉన్: ప్రపంచ రాజకీయాల్లో ఈ పేరంటే ఎందుకంత సంచలనం?

సీజేఐపై లైంగిక ఆరోపణల కేసు: త్రిసభ్య విచారణ కమిటీలో జస్టిస్ ఎన్వీ రమణ స్థానంలో జస్టిస్ ఇందూ మల్హోత్రా