అడ్వాణీని అమిత్ షా అందరిముందూ అవమానించారా?- BBC FACT CHECK

  • 20 ఏప్రిల్ 2019
అమిత్ షా, అడ్వాణీ Image copyright facebook
చిత్రం శీర్షిక అమిత్ షా, అడ్వాణీ

బీజేపీ సీనియర్ నాయకుడు ఎల్‌కే అడ్వాణీని ఆ పార్టీ జాతీయ అధ్యక్షుడు అమిత్ షా అవమానిస్తున్నట్లుగా చూపుతున్న ఒక వీడియో సోషల్ మీడియాలో వైరల్‌గా మారింది.

"బహిరంగ అవమానం! ఇంతకు మించిన అవమానం మరోటి ఉండదు! పార్టీకి మూలపురుషుడైన అగ్ర నాయకుడిని గెంటివేశారు" అంటూ క్యాప్షన్లు పెట్టి ఆ వీడియోను షేర్ చేస్తున్నారు.

ఒక సభా వేదిక మీది నుంచి వెళ్లిపోవాలంటూ అడ్వాణీని అమిత్ షా ఆదేశిస్తున్నట్లుగా ఆ వీడియోలో కనిపిస్తోంది.

ప్రధాని నరేంద్ర మోదీ పాల్గొన్న సభా వేదిక నుంచి బీజేపీకి మూలపురుషుడైన అడ్వాణీని "గెంటివేశారు" అంటూ కాంగ్రెస్ అధ్యక్షుడు రాహుల్ గాంధీ ఆరోపించిన తర్వాత ఈ వీడియో వెలుగులోకి వచ్చింది.

"హిందూయిజంలో గురువే సుప్రీం. మోదీజీకి గురువు ఎవరు? అడ్వాణీజీ. అయితే, శిష్యుడు తన గురువు ముందు చేతులు కట్టుకోవడంలేదు. ఆయన తన గురువును వేదిక నుంచే గెంటివేశారు.

ఆయన ముఖం మీదకు బూటు విసిరి అడ్వాణీని బలవంతంగా వేదిక మీది నుంచి కిందికి పంపించేశారు. ఆయనే ఇప్పుడు హిందూయిజం గురించి మాట్లాడుతున్నారు" అని రాహుల్ అన్నారు.

Image copyright Getty Images

అడ్వాణీ 1991 నుంచి (రెండేళ్లు మినహా) గుజరాత్‌లోని గాంధీనగర్ నియోజకవర్గం నుంచి పార్లమెంటుకు ప్రాతినిధ్యం వహిస్తున్నారు. కానీ, ఈసారి ఆ స్థానం నుంచి బీజేపీ అమిత్‌ షాను బరిలోకి దించింది.

75 ఏళ్లకు పైబడిన వారికి సీట్లు ఇవ్వకూడదని ఆ పార్టీ నిర్ణయించినట్లు మీడియా కథనాలు చెబుతున్నాయి.

23 సెకన్ల నిడివి ఉన్న ఆ వీడియో క్లిప్‌ను ఫేస్‌బుక్, ట్విటర్‌లో వేలసార్లు షేర్ చేశారు.

Image copyright facebook

అయితే, ఆ వీడియో ప్రజలను తప్పుదోవ పట్టించేలా ఉందని మా పరిశీలనలో తేలింది.

ఆ క్లిప్‌లో వాస్తవంగా ఉన్నదేంటి?

ఉద్దేశపూర్వకంగా ప్రజలను తప్పుదోవ పట్టించేందుకు ఒక పెద్ద వీడియో నుంచి ఈ వైరల్ వీడియో క్లిప్‌ను కత్తిరించారు.

2014 ఆగస్టు 9న దిల్లీలోని జవహర్‌లాల్ నెహ్రూ స్టేడియంలో జరిగిన బీజేపీ జాతీయ మండలి సమావేశానికి సంబంధించిన పెద్ద వీడియో నుంచి ఆ క్లిప్‌ను కత్తిరించారు.

పూర్తి వీడియో నిడివి గంట నలభై నిమిషాలు ఉంది. అందులో అడ్వాణీ పోడియం వద్దకు వెళ్లి మాట్లాడేందుకు అమిత్ షా ఆయనకు సాయం చేస్తున్నట్లు ఆ వీడియో చూస్తే స్పష్టంగా అర్థమవుతుంది.

వైరల్ వీడియో vs వాస్తవ వీడియో

వైరల్ చేసిన 23 సెకన్ల వీడియో క్లిప్‌లో రెండు భాగాలు ఉన్నాయి.

వీడియోలో పైన ఉన్న చిత్రంలో ప్రధాని మోదీ ఏదో చదువుతుండగా, అమిత్ షా వేదిక నుంచి వెళ్లిపోవాలంటూ అడ్వాణీని ఆదేశిస్తున్నట్లుగా ఉంది.

కింది చిత్రంలో అమిత్ షా, అడ్వాణీ ఇద్దరూ మాట్లాడుకుంటున్నట్లుగా ఉంది. అమిత్ షా సైగలు చేయగానే అడ్వాణీ వేదిక నుంచి వెళ్లిపోతున్నట్లుగా కనిపిస్తుంది.

కానీ, అడ్వాణీ పట్ల అమిత్ షా అగౌరవంగా ప్రవర్తించారన్న వాదించడంలో వాస్తవం లేదు.

వాస్తవ వీడియోలో అడ్వాణీ ప్రసంగించేందుకు మైకును సవరిస్తూ అమిత్ షా ఆయనకు సాయపడుతున్నట్లుగా స్పష్టంగా కనిపిస్తోంది.

అయితే, వేదికపై కాస్త వెనుక ఉన్న పోడియం వద్దకు వెళ్లి ప్రసంగించాలని అడ్వాణీ నిర్ణయించారు. దాంతో, ఏ పోడియం వద్దకు వెళ్లాలో అమిత్ షా చేతితో చూపించారు.

ఆ సమావేశానికి సంబంధించిన పూర్తి వీడియో బీజేపీ అధికారిక యూట్యూబ్ పేజీలో ఇప్పటికీ అందుబాటులో ఉంది.

ఆ కార్యక్రమం పూర్తయ్యే వరకూ అమిత్ షా పక్కనే అడ్వాణీ కూర్చుని ఉండటం కూడా ఈ వీడియోలో చూడొచ్చు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

ఈ కథనం గురించి మరింత సమాచారం