భారత్‌లో హిజ్రాలను అంతం చేయాలని బ్రిటన్ ఎందుకు, ఎలా ప్రయత్నించింది

  • 1 జూన్ 2019
బ్రిటిష్ పాలనలో హిజ్రాలు Image copyright BRIDGEMAN IMAGES

1852 ఆగస్టులో బూరా అనే హిజ్రాను ఈశాన్య భారత దేశంలోని మైన్‌పురిలో దారుణంగా హత్య చేశారు.

అప్పట్లో వాయవ్య ప్రావిన్స్‌గా ఉన్న ఈ ప్రాంతంలో బూరా తన శిష్యులు, ప్రియుడితో కలిసి ఉండేది. పిల్లలు పుట్టినా, పెళ్లిళ్లు జరిగినా అక్కడ నృత్యాలు చేసి బహుమతులు అందుకునేది. హత్యకు గురయ్యే ముందు ఆమె మరో వ్యక్తి కోసం తన ప్రియుడిని వదిలేసింది. దాంతో పగ పెంచుకున్న మాజీ ప్రియుడే ఆమెను చంపాడని బ్రిటిష్ జడ్జిలు నిర్ధారణకు వచ్చారు.

విచారణ సమయంలో జడ్జిలు హిజ్రాలను భిక్షగాళ్లని, అసహజ లైంగిక కార్యకలాపాలకు పాల్పడే వ్యభిచారులని వర్ణించారు.

Image copyright AFP

నైతిక ఉన్మాదం

ఒక జడ్జి హిజ్రాలను "వలస రాజ్య పాలనకే కళంకం తెచ్చే సమాజం" అని వర్ణిస్తే, ఇంకొక జడ్జి "వారి ఉనికి బ్రిటిష్ ప్రభుత్వాన్ని నిందించడమే" అన్నారు.

"ప్రియుడి చేతిలో దారుణ హత్యకు గురైన ఒక హిజ్రా కేసులో జడ్జిలు స్పందించిన తీరు చాలా వింతగా ఉంది" అని చరిత్రకారులు డాక్టర్ జెస్సికా హించీ అన్నారు. ఈ హత్య బ్రిటిష్ వారిలో హిజ్రాలంటేనే ఒక భీతి కలిగించిందని చెప్పారు.

"బూరా ఒక నేరంలో బాధితురాలు కానీ, ఆమె మరణాన్ని నపుంసకుల నేరాలకు, అనైతికతకు సాక్ష్యంగా వర్ణించారు" అని హించీ నాకు చెప్పారు.

హిజ్రాలు విచ్చలవిడిగా జీవిస్తారని బ్రిటిష్ అధికారులు భావించేవారు. వారిని రోత కలిగించేవారిగా, ఒక అంటు వ్యాధిలా చిత్రించారు. హిజ్రాలు పురుషులతో సెక్స్‌కు బానిసలైపోయినట్టు చూపించారు. హిజ్రాలు నైతికతకే కాదు, వలసరాజ్య పాలనకే ప్రమాదమని బ్రిటిష్ వారు భావించారు.

ప్రస్తుతం సింగపూర్ నన్యాంగ్ టెక్నలాజికల్ యూనివర్సిటీలో హిస్టరీ అసిస్టెంట్ ప్రొఫెసర్‌గా ఉన్న డాక్టర్ హించీ వలస పాలనలో హిజ్రాలపై జరిగిన దారుణాలను తెలుసుకునేందుకు దాదాపు దశాబ్దం పాటు పరిశోధనలు జరిపారు. భారతదేశంలోని అట్టడుగు వర్గాలపై బ్రిటిష్ చట్టాలు అసాధారణ ప్రభావం చూపించాయని గుర్తించారు. ఇది కచ్చితంగా వలస పాలనలో భారతదేశంలోని హిజ్రాల గురించి లోతైన చరిత్ర అని చెప్పవచ్చు.

మీ పరికరంలో మీడియా ప్లేబ్యాక్ సదుపాయం లేదు.
Media captionయూట్యూబ్ చానల్స్ కొత్తేం కాదు. కానీ ట్రాన్స్‌విజన్ మామూలు యూట్యూబ్ చానల్ కాదు.

హిజ్రాలు తరచూ మహిళల్లా దుస్తులు వేసుకుంటారు. తమను నపుంసకులుగా, లేదా ఇలాగే పుట్టామని చెప్పుకుంటారు. గుంపులుగా తిరిగే ఈ సమాజం చాలా సంస్కృతుల్లో కీలక పాత్ర పోషిస్తోంది. తమ లాంటి ఎంతోమందిని కాపాడుకునే వీరు, శుభ కార్యాల్లో, సంబరాల్లో పాటలు పాడుతూ, డాన్సులు చేస్తూ జీవిస్తూ ఉంటారు.

పిల్లలు పుట్టకుండా ఉన్న శాపం నుంచి హిజ్రాలు ఆశీర్వదిస్తే విముక్తి కలుగుతుందని దక్షిణాసియాలోని కొన్ని సంస్కృతుల్లో భావిస్తారు. వీరు పెంచుకునే పిల్లలతో, మగ భాగస్వాములతో ఉంటారు. ఇప్పుడు చాలా మంది హిజ్రాలను ట్రాన్స్‌జెండర్లుగా భావిస్తున్నారు. 2014లో భారత సుప్రీంకోర్టు ట్రాన్స్‌జెండర్లను అధికారికంగా మూడో లింగంగా గుర్తించింది. దాంతో హిజ్రాలు కూడా ఆ కేటగిరీలోకి చేరారు.

ఇప్పుడు ఉత్తర్ ప్రదేశ్, ఉత్తరాఖండ్ రాష్ట్రాలుగా ఉన్న అప్పటి వాయవ్య ప్రావిన్సులో నివసించిన 2500 మంది హిజ్రాల్లో బూరా ఒకరు.

ఆమె హత్య జరిగిన కొన్నేళ్ల తర్వాత ఈ ప్రావిన్సులో హిజ్రాల సంఖ్యను తగ్గించడానికి, క్రమంగా వారి ఉనికే లేకుండా చేసే లక్ష్యంతో చర్యలు చేపట్టారు.

వంశపారంపర్యంగా నేరస్థులుగా మారే కులాలే లక్ష్యంగా ఏర్పాటు చేసిన వివాదాస్పద 1871 చట్టం ప్రకారం బ్రిటిష్ పాలకులు హిజ్రాలను ఒక 'నేరస్థుల తెగ'గా భావించేవారు.

ఈ చట్టంతో పోలీసులకు వారిపై నిఘా పెట్టే అధికారాలు దక్కాయి. వారు హిజ్రాల వ్యక్తిగత వివరాలను రిజిస్టర్లలో నమోదు చేసేవారు. వారిని తరచూ నేరస్థులని, లైంగికంగా వేధిస్తారని చెప్పేవారు. వారి పేరు రిజిస్టర్ చేయడం అంటే వారిపై నిఘా పెట్టడం, అంటే, ఒక విధంగా హిజ్రాల జనాభా పెరగకుండా అదుపు చేయడం.

"హిజ్రాలు మహిళల బట్టలు, నగలు వేసుకుని శుభ కార్యాల్లో నృత్యం చేయడాన్ని కూడా బ్రిటిష్ పాలకులు అడ్డుకున్నారు. అలా చేస్తే జరిమానాలు వేసేవారు, లేదంటే జైల్లో పెట్టేవారు. పోలీసులు వారికున్న పొడవాటి జుట్టు కూడా కత్తిరించేవారు. మహిళల్లా బట్టలు, నగలు వేసుకుంటే వాటిని తీయించేవారు. హిజ్రాలు పోలీసుల బెదిరింపులను, బలప్రయోగం రుచిచూశారు. కానీ పోలీసులు ఆ సమయంలో హింసకు పాల్పడ్డారా అనేది స్పష్టంగా తెలీడం లేదు" అని హించీ చెప్పారు.

కానీ, తమకు శుభ కార్యాల్లో, సంతల్లో నృత్యం చేసే హక్కు ఉండాలని హిజ్రాల సమాజం కోరింది. నృత్యాలు అడ్డుకోవడం వల్ల ఆర్థికంగా నష్టపోతున్నామని తమ పిటిషన్లలో పేర్కొంది. తినడానికి తిండి కూడా లేదని 1870 మధ్యలో ఘాజీపూర్‌లో ఉన్న హిజ్రాలు ఫిర్యాదు చేశారు.

Image copyright AFP

"అనాథలకు జీవితం అందించే" పేరుతో పోలీసులు హిజ్రాలతో కలిసుండే పిల్లలను బలవంతంగా తీసుకెళ్లిపోయేవారు. మగ పిల్లల్ని పెంచుకునే హిజ్రాలకు కూడా జరిమానాలు, జైలు శిక్ష వేసేవారు.

ఈ పిల్లల్లో చాలా మంది నిజానికి వారి శిష్యులు ఉండేవారు. మిగతావారిలో అనాథలు, దత్తత తీసుకున్న పిల్లలు ఉండేవారు. హిజ్రాలు నృత్యాలు చేసేటప్పుడు వాయిద్యాలు వాయించే వారి పిల్లలు, కుటుంబాలు కూడా అక్కడే ఉండేవి. కొంతమంది హిజ్రాలు పిల్లలున్న వితంతువులతో కలిసి జీవించేవారు. బ్రిటిష్ అధికారులు ఈ పిల్లలను "అంటువ్యాధి కారకాలని, నైతికతకే ప్రమాదం" అని భావించేవారు.

హిజ్రాలతో కలిసున్న మగ పిల్లల వాస్తవ సంఖ్య నిజానికి చాలా ఎక్కువగా ఉందన్న వలస పాలకులు, వారి వల్ల భారత దేశంలో మగ పిల్లల జనాభాకే ముప్పు వస్తుందని చెప్పేవారని హించీ తెలిపారు. "అప్పటి రికార్డుల ప్రకారం 1860-1880 మధ్య రిజిస్టర్ అయిన హిజ్రాల దగ్గర 90 నుంచి 100 మంది మగ పిల్లలను గుర్తించారు. పిల్లల్లో చాలా తక్కువ మందిని హిజ్రాలు నపుంసకులుగా మార్చేశారు. చాలా మంది తమ తల్లిదండ్రులతో జీవిస్తున్నారు" అన్నారు.

"హిజ్రాలు బహిరంగ ప్రదర్శనలు ఇవ్వకుండా, ఆ సంస్కృతినే తొలగించేందుకు బ్రిటిష్ పాలకులు ఒక స్వల్ప కాలిక చట్టాన్ని తీసుకొచ్చారు. దాని లక్ష్యం హిజ్రాల సంఖ్యను తగ్గించడం, చివరికి వారు అసలు లేకుండా చేయడం" అంటారు హించీ.

Image copyright AFP

చిన్నదైన హిజ్రాల సమాజం వల్ల వలస పాలనే ప్రమాదంలో పడుతుందేమో అని బ్రిటిష్ పాలనలో చాలా మంది ఉన్నతాధికారులు అనుకునేవారు.

"హిజ్రాలను అదుపు చేసే చర్యలను బ్రిటిష్ వారు మరింత ముందుకు తీసుకెళ్లారు. పురుషులు మహిళల దుస్తులు వేసుకున్నా, మహిళలా వేషం వేసుకుని బహిరంగ ప్రదర్శనలు ఇచ్చినా, నాటకాల్లో మహిళల పాత్రల్లో కనిపించినా వారిని అరెస్టు చేసేవారు" అని హించీ చెప్పారు.

హిజ్రాల పట్ల బ్రిటిష్, భారత్‌లో ఇంగ్లిష్ మాట్లాడే వర్గాల వైఖరి ఒక విధంగా హిందూ విశ్వాసాలపై బ్రిటిష్ పాలకులకు ఉన్న ఏహ్యభావంలా కనిపించింది.

హిందూ మతంలోని సున్నితమైన ధోరణులను తిరస్కరించే బ్రిటిష్ వారి అన్యమత వైఖరి గురించి వండీ డానిగెర్ రాశారు.

"వలస పాలనలో హిజ్రాలను తిరస్కరించడానికి కారణం మతం మాత్రమే కాదు. దానిని మించేలా ఉన్న వారి విచ్చలవిడితనం, బహిరంగ ప్రదర్శనలపై రోత కలగడం వల్లే అలా చేశారు" అని చెప్పారు.

"ఇంత చీకటి చరిత్ర ఉన్నా, తమ ఉనికినే అంతం చేయాలనుకున్న పోలీసుల ప్రయత్నాల నుంచి హిజ్రాలు బతికి బయటపడ్డారు. బహిరంగ ప్రదర్శనలు కొనసాగించారు. వ్యూహాలను సిద్ధం చేసుకున్నారు. చట్టాలను చాలా తెలివిగా ఉల్లంఘించేవారు. పోలీసుల కళ్లుగప్పి తప్పించుకునేవారు. పోలీసులు గుర్తించలేని ప్రాంతాల్లో దాక్కోవడంలో ప్రావీణ్యం సంపాదించారు".

"హిజ్రాలను తరచూ తప్పుదారి పట్టినవారిగా, విచ్చలవిడిగా ఉంటారంటూ వర్ణించినా, వాటన్నిటినీ అధిగమించి వారిప్పుడు ఒక స్పష్టమైన విజయం సాధించారు. నపుంసకులు ఇప్పుడు దక్షిణాసియాలో బహిరంగ స్థలాల్లో, ప్రజా సంస్కృతిలో, రాజకీయాల్లో క్రియాశీలం అయ్యారు" అని డాక్టర్ హించీ చెప్పారు.

వివక్ష ఎదురైనా, సమాజానికి దూరం పెట్టినా భారతదేశంలో శుభ కార్యాలు, సంబరాల్లో ఆడిపాడుతూ హిజ్రాలు తమ జీవితాలను కొనసాగిస్తున్నారు.

అందుకే, ఇది అట్టడుగు స్థాయి నుంచి ఎత్తులకు ఎగసిన వారి కదిలించే కథ.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

ఈ కథనం గురించి మరింత సమాచారం