#MeToo తను శ్రీ దత్తా: "నానా పాటేకర్‌పై లైంగిక వేధింపుల కేసును పోలీసులే నీరు గార్చారు"

  • 14 జూన్ 2019
తనుశ్రీ దత్తా Image copyright Reuters

బాలీవుడ్ ప్రముఖ నటుడు నానా పాటేకర్‌పై లైంగిక వేధింపుల ఆరోపణలు చేసిన బాలీవుడ్ నటి తనుశ్రీ దత్తా, తాను పెట్టిన కేసును ముంబయి పోలీసులే నీరుగార్చారంటూ మండిపడ్డారు. 'ఆషిక్ బనాయా ఆప్నే' సినిమాతో గుర్తింపు తెచ్చుకున్న తనుశ్రీ గతంలో తెలుగులో 'వీరభద్ర' సినిమాలో నందమూరి బాలకృష్ణ సరసన నటించారు.

నానా పాటేకర్‌పై తనుశ్రీ(35) గత ఏడాది చేసిన ఆరోపణలతో భారత్‌లో 'మీటూ' ఉద్యమం వ్యాప్తిలోకి వచ్చింది.

ఆధారాల్లేవని చెబుతూ నానా పాటేకర్‌పై లైంగిక వేధింపుల కేసును ముంబయి పోలీసులు తాజాగా ఉపసంహరించుకున్నారు.

"అవినీతిపరులైన పోలీసులు అంతకంటే అవినీతిపరుడైన వ్యక్తికి క్లీన్ చిట్ ఇచ్చారు" అని తనుశ్రీ వ్యాఖ్యానించారు.

పోలీసుల కేసు ఉపసంహరణ తర్వాత ఆమె ఈ మేరకు ప్రకటన విడుదల చేశారు.

2008లో 'హార్న్ ఓకే ప్లీజ్' సినిమా చిత్రీకరణ సందర్భంగా సెట్స్‌లో తనపై నానా పాటేకర్ వేధింపులకు పాల్పడ్డారని తనుశ్రీ గత ఏడాది ఆరోపించారు. ఆయన చర్యలను వ్యతిరేకించినందుకు తనను బెదిరించారని చెప్పారు.

''పదేళ్ల కిందట ఓ బాలీవుడ్ పాట చిత్రీకరణ సమయంలో వేధింపులకు గురయ్యాను. దాని గురించి చెప్పినా ఎవరూ పట్టించుకోలేదు. ఆ ఘటన చేసిన గాయం నన్ను చాలాకాలం వెంటాడింది. దాంతో సినిమాలకు దూరంగా ఉండాలని నిర్ణయించుకున్నాను'' అని ఆమె నిరుడు బీబీసీకి ఇచ్చిన ఇంటర్వ్యూలో చెప్పారు.

వేధింపులపై తనుశ్రీ మాట్లాడటం మొదలుపెట్టాక చాలా మంది మహిళలు వారు ఎదుర్కొన్న వేధింపుల గురించి పెదవి విప్పారు.

తనుశ్రీ ఆరోపణలను నానా పాటేకర్ ఖండిస్తూ వచ్చారు.

Image copyright Getty Images
చిత్రం శీర్షిక తనుశ్రీ తాజా ఆరోపణలపై పోలీసులుగాని, నానా పాటేకర్‌గాని స్పందించలేదు.

'సాక్షుల నోరు మూయించారు'

కేసులో సాక్షులను బెదిరింపులతో నోరు మూయించారని, కేసును బలహీనపరిచేందుకు నకిలీ సాక్షులను తెరపైకి తెచ్చారని తనుశ్రీ తాజాగా ఆరోపించారు.

తనుశ్రీ తాజా ఆరోపణలపై పోలీసులుగాని, నానా పాటేకర్‌గాని స్పందించలేదు.

ఆమె పదేళ్ల క్రితమే మొదట ఆరోపణలు చేశారు. అవి నిరుడు సెప్టెంబరులో మళ్లీ తెరపైకి వచ్చాయి.

ప్రపంచవ్యాప్తంగా జరుగుతున్న 'మీటూ' ఉద్యమం బాలీవుడ్‌లో ఎందుకు మొదలుకాలేదని ఒక ఇంటర్వ్యూలో తనుశ్రీని ప్రశ్నించగా- "నాకు పదేళ్ల క్రితం జరిగినదానినే నేటికీ ఎవరూ పట్టించుకోవడం లేదు. ఇలాంటి పరిస్థితుల్లో భారత్‌లో ఏ ఉద్యమమైనా ఎలా వస్తుంది" అని బదులిచ్చారు.

ఆమె వ్యాఖ్యలు తొలిసారిగా చిత్రపరిశ్రమలో, మీడియాలో, సోషల్ మీడియాలో అందరి దృష్టిని ఆకర్షించాయి. కొందరు నటీమణులు కూడా ఆమెకు మద్దతుగా ముందుకొచ్చారు.

నానా పాటేకర్‌పై కేసులో దర్యాప్తును కొనసాగించేలా ముంబయి హైకోర్టులో పిటిషన్ వేస్తామని తనుశ్రీ న్యాయవాది చెప్పారు.

"అణచివేతదారులు, అవినీతి వ్యవస్థపై ఒంటరి పోరాటం చేసి నేను అలసిపోయాను. కానీ, వేధింపులపై గళం విప్పితే ఎవ్వరూ వినిపించుకోరనేందుకు ఈ కేసును ఉదాహరణగా తీసుకోవద్దు" అని తన ప్రకటనలో తనుశ్రీ సూచించారు. ఆమె వ్యాఖ్యలు సోషల్ మీడియాలో బాగా షేర్ అవుతున్నాయి.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

ముఖ్యమైన కథనాలు