‘#StopTeluguImposition’: తెలుగు భాషను తమపై రుద్దవద్దని తమిళులు ఎందుకు అంటున్నారు?

  • 9 డిసెంబర్ 2019
తెలుగు Image copyright wtchyd2017/twitter

తెలుగు భాషను తమపై రుద్దవద్దంటూ తమిళనాడుకు చెందిన కొందరు ట్విటర్‌లో గొంతెత్తుతున్నారు.

ఆదివారం రాత్రి నుంచి #StopTeluguImposition అనే హ్యాష్‌ట్యాగ్‌తో ట్వీట్లు చేస్తున్నారు. సోమవారం ఉదయానికి ఈ హ్యాష్‌ట్యాగ్ దేశవ్యాప్త ట్రెండ్స్‌లోకి వచ్చింది.

ఉలకథ్ తమిళ్ (తమిళ భాష పరిశోధన కేంద్రం)లో అదనపు భాషగా తెలుగును బోధించాలని తమిళనాడు ప్రభుత్వం నిర్ణయం తీసుకోవడమే ఈ పరిణామానికి కారణం.

ఈ నిర్ణయంపై చాలా మంది తమిళులు అభ్యంతరాలు వ్యక్తం చేస్తున్నారు.

అంతకుముందు హిందీ..

ఉలకథ్ తమిళ్‌లో అదనపు భాషగా హిందీని బోధించాలని ఇదివరకు ప్రభుత్వం నిర్ణయం తీసుకుంది. అప్పుడు కూడా ఆ నిర్ణయాన్ని తమిళులు తీవ్రంగా వ్యతిరేకించారు.

#StopHindiImposition అనే హ్యాష్‌ట్యాగ్‌తో సోషల్ మీడియాలో తమ అభిప్రాయాలు వ్యక్తం చేశారు.

ఈ వ్యతిరేకతను దృష్టిలో పెట్టుకుని ప్రభుత్వం నిర్ణయాన్ని మార్చుకుంది. హిందీకి బదులుగా అదనపు భాషగా తెలుగును బోధించాలని నిర్ణయం తీసుకున్నట్లు ప్రకటించింది.

ఇంతకుముందు హిందీ బోధన కోసం కేటాయించిన రూ.3లక్షలు నిధులను తెలుగు కోసం ఇవ్వనున్నట్లు తెలిపింది.

అయితే, ఈ నిర్ణయాన్ని కూడా తమిళులు వ్యతిరేకిస్తున్నారు.

Image copyright Getty Images

‘తెలుగు అవసరం ఏంటి..’

అదనపు భాషగా తెలుగునే బోధించాల్సిన అవసరం ఏముందని కొందరు తమిళులు ప్రశ్నిస్తున్నారు.

తెలుగును నేర్చుకోవడం వల్ల తమకు చేకూరే ప్రయోజనం ఏంటని.. ఆ భాషకు బదులుగా ఇంగ్లీష్, జర్మన్, ఫ్రెంచ్‌లను ఎందుకు బోధించకూడదని గురు బాలాజీ అనే వ్యక్తి ట్వీట్ చేశారు.

తెలుగు భాషను అభివృద్ధి చేయడానికి ఆంధ్రప్రదేశ్, తెలంగాణ రాష్ట్రాలున్నాయని, తమిళనాడు తమిళంపై దృష్టి పెడితే చాలని ఇంకో వ్యక్తి అన్నారు.

తమిళులు ఏ భాషకూ, జాతికీ వ్యతిరేకం కాదని.. ఇతర భాషలకు తమిళ పరిశోధన కేంద్రం నిధుల కేటాయింపును వ్యతిరేకిస్తూనే ఈ హ్యాష్‌ట్యాగ్ ట్రెండ్ చేస్తున్నామని మరో వ్యక్తి ట్వీట్ చేశారు.

Image copyright FACEBOOK/SURESH KOLICHALA

‘ఎందుకు అన్నింటినీ వ్యతిరేకిస్తారు’

#StopTeluguImposition హ్యాష్‌ట్యాగ్‌ను ట్రెండ్ చేస్తున్నవారు మూర్ఖులని, 'గ్లోబలైజేషన్' అన్న పేరుతో ఇంగ్లీష్‌ను మాత్రం వారు అంగీకరిస్తారని రాహుల్ అనే వ్యక్తి ట్వీట్ చేశారు. ఇంగ్లీష్‌పై ఆధారపడకుండానే చైనా, జర్మనీ, కొరియా, జపాన్ 'గ్లోబలైషన్'లో భారత్ కన్నా చాలా ముందున్నాయని అన్నారు.

తమ భాష తప్పితే మిగతా భాషలన్నింటినీ తమిళులు ఎందుకు వ్యతిరేకిస్తుంటారని రన్‌విజయ్ అనే ఆయన ప్రశ్నించారు. ఈ వైఖరి వల్ల తమిళులపై విద్వేషపూరితమైనవారన్న ముద్ర పడుతోందని ఆయన అభిప్రాయపడ్డారు.

తమిళం తెలుగు కన్నా గొప్ప కాదని, తెలుగు తమిళం కన్నా గొప్ప కాదని తెలంగాణకు చెందిన శివానీ అనే ఆమె అభిప్రాయపడ్డారు. మిగతా భాషలను గౌరవించని వ్యక్తులు, తమ భాషకు మాత్రం గౌరవం లభించాలని ఎలా కోరుకుంటారని ఆమె ప్రశ్నించారు.

తమిళ రాజకీయాల్లోని కీలక నేతల్లో చాలా మందికి తెలుగు మూలాలున్న కారణంగానే కొందరు రాజకీయ ప్రయోజనం కోసం ఈ అంశాన్ని లేవనెత్తారని ఓ వ్యక్తి అభిప్రాయపడ్డారు. కామరాజ్ తర్వాత మళ్లీ సీఎం పదవి చేపట్టిన తమిళుడు ఎడప్పాడి పళనిస్వామి మాత్రమేనని అన్నారు.

తమిళులు, తెలుగు ప్రజలు ఒకరి భాషను మరొకరు గానీ, ఇంగ్లీష్‌ను గానీ నేర్చుకోకుండా.. హిందీని నేర్చుకోవాలని మరొకరు సూచించారు.

Image copyright Getty Images

‘తెలుగువాళ్లే రుద్దుకోరు..’

తెలుగు భాషను తెలుగు వాళ్లే రుద్దుకోరని, అసలు ఈ హ్యాష్‌ట్యాగ్ ఎందుకు ట్రెండ్ అవుతుందో తనకు అర్థం కావట్లేదని ఓ వ్యక్తి చురక అంటించారు.

ద్రవిడ భాషల మధ్య దగ్గరి సంబంధాలున్న కారణంగా, తెలుగును నేర్చుకోవడం వల్ల తమిళ భాష పరిజ్ఞానం మరింత సుసుంపన్నం అవుతోందని మరో వ్యక్తి అభిప్రాయపడ్డారు.

తమిళ కవి భారతీయార్ చెప్పిన పాఠాలు మరిచి, పెరియార్‌ను అనుసరిస్తున్నవారే ఇప్పుడు తెలుగుకు వ్యతిరేకంగా మాట్లాడుతున్నారని జయసింహా రెడ్డి అనే యూజర్ అభిప్రాయపడ్డారు.

అదనపు ఆప్షన్‌గా తెలుగును నేర్చుకునే అవకాశం ఇవ్వడం భాషను రుద్దడం ఎలా అవుతుందని తేజా కలపాల అనే ఆయన ప్రశ్నించారు. అభద్రతా భావానికి కూడా పరిమితులుంటాయని, భారత్‌లో తమిళం కన్నా తెలుగు ఎక్కువ మంది మాట్లాడే భాష అన్న విషయం విస్మరించరాదని అన్నారు.

Image copyright mafoikprajan/twitter

‘తెలుగు, ఫ్రెంచ్ ఉంటాయి.. అవి కూడా తప్పనిసరి కాదు’

ఉలకథ్ తమిళ్‌లో తమిళంతోపాటు అదనంగా మరో స్థానిక భాష, ఇంకో విదేశీ భాష‌ల బోధన కూడా ఉంటుందని, 2014లో ఈ విధానం తీసుకువచ్చారని తమిళనాడు సాంస్కృతిక శాఖ మంత్రి పాండిరాజన్ తెలియజేసినట్లు టైమ్స్ ఆఫ్ ఇండియా వార్తా వెబ్‌సైట్ పేర్కొంది.

ఆ రెండు అదనపు భాషలను నేర్చుకోవాలా? వద్దా అన్నది విద్యార్థులే నిర్ణయించుకోవచ్చని పాండిరాజన్ చెప్పారని తెలిపింది.

‘‘అదనంగా బోధించే స్థానిక భాష స్థానంలో హిందీకి బదులుగా తెలుగును తెచ్చాం. ఈ విషయంపై డీఎంకే రాజకీయాలు చేస్తోందని ఈ నిర్ణయం తీసుకున్నాం. ఉల‌కథ్ తమిళ్ విద్యార్థులు దేశవ్యాప్తంగా వివిధ విశ్వవిద్యాలయాల్లో పనిచేస్తున్నారు. అందుకే ఒక్క తమిళం మాత్రం నేర్చుకుంటే సరిపోదు. మరో స్థానిక భాష, విదేశీ భాష కూడా అవసరం’’ అని పాండిరాజన్ వ్యాఖ్యానించినట్లు టైమ్స్ ఆఫ్ ఇండియా తెలిపింది.

ఉలకథ్ తమిళ్‌లో హిందీ బోధించాలన్న నిర్ణయాన్ని ప్రభుత్వం ఉపసంహరించుకోవడాన్ని డీఎంకే అధ్యక్షుడు ఎమ్‌కే స్టాలిన్ స్వాగతిస్తూ ట్వీట్ చేశారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

ముఖ్యమైన కథనాలు

కరోనావైరస్: ‘నాలాంటి నాలుగు వేల మంది బతుకులు రోడ్డు మీద పడ్డాయి’

కరోనా లాక్‌డౌన్: కరోనాపై పోరులో మనకున్న ఏకైక ఆయుధాన్ని వాడుదాం - కేసీఆర్

లాక్‌డౌన్ కష్టాలు: కొడుకు శవాన్ని చేతుల్లో మోసుకెళ్లిన తండ్రి

‘కరోనావైరస్ మీద నేను ఎలా పోరాడుతున్నానంటే...’ - హైదరాబాద్‌ పేషెంట్ నంబర్ 16 స్వీయ అనుభవం

కరోనా లాక్‌డౌన్: ‘చావు తప్పదనుకుంటే మా ఊళ్లోనే చనిపోతాం’

కరోనా వైరస్: ఇది సోకకూడదంటే రోగనిరోధక శక్తి ఏ స్థాయిలో ఉండాలి

కరోనావైరస్: ఆయన మరణించారు.. బంధువుల్లో 19 మందికి సోకింది.. ఇంకా 40 వేల మందికి సోకిందేమోనన్న టెన్షన్

కరోనావైరస్: తొలి మేడిన్ ఇండియా టెస్టింగ్ కిట్‌ను అందించిన భారత శాస్త్రవేత్త ఈమే.. కిట్ ఇచ్చిన గంటకే బిడ్డకు జన్మనిచ్చిన మీనల్

కరోనావైరస్: ట్విటర్‌లో #ShameOnBCCI ట్రెండింగ్, ఎందుకు