దిల్లీ హింస: పోలీసుపై తుపాకీ గురిపెట్టిన ఈ వ్యక్తి ఎవరు? - Fact Check

  • 26 ఫిబ్రవరి 2020
ఫిబ్రవరి 24న మౌజ్‌పూర్ సమీపంలో ఓ వ్యక్తి పోలీసుపై పిస్టల్ గురిపెట్టారు Image copyright Pti
చిత్రం శీర్షిక ఫిబ్రవరి 24న మౌజ్‌పూర్ సమీపంలో ఓ వ్యక్తి పోలీసుపై పిస్టల్ గురిపెట్టారు

పౌరసత్వ సవరణ చట్టం అనుకూల, (సీఏఏ) వ్యతిరేకవాదుల నిరసనలు ఈశాన్య దిల్లీలో సోమవారం హింసాత్మకంగా మారాయి. ఈ గొడవల్లో ఒక పోలీస్ కానిస్టేబుల్‌తో పాటు మొత్తం 13 మంది మృతి చెందారు. 48 మంది పోలీసులు, 90 మందికి పైగా సామాన్య ప్రజలు గాయపడ్డారు.

అయితే, ఈ ఘర్షణలు మొదలైన తర్వాత నుంచి సోషల్ మీడియాలో ఒక వీడియో వైరల్ అవుతోంది.

ఆ వీడియోలో ఎర్ర చొక్కా ధరించిన ఓ వ్యక్తి పోలీసుకు తుపాకీ గురిపెట్టాడు. అతడి వెనుక చాలామంది జనం ఉన్నారు. అతని వెంట జనాల గుంపు కదులుతున్నట్లు కనిపిస్తుంది. అతడు గాలిలోకి కాల్పులు జరుపుతున్న శబ్దం కూడా వినిపిస్తుంది.

Image copyright AFP

'ది హిందూ' పత్రిక జర్నలిస్టు సౌరభ్ త్రివేది ఈ వీడియోను ట్వీట్ చేసి, "సీఏఏ వ్యతిరేక నిరసనకారులు కాల్పులు జరుపుతున్నారు. అందులో ఒక వ్యక్తి పోలీసులపైకి తుపాకీ గురిపెట్టాడు " అంటూ రాశారు.

ఆ వ్యక్తిని దిల్లీ పోలీసులు అరెస్టు చేశారని ఏఎన్‌ఐ వార్తా సంస్థ తెలిపింది. పీటీఐ జర్నలిస్టు రవి చౌదరి కూడా ఆ వ్యక్తి ఫొటో తీశారు. కానీ, అతని పేరును వెల్లడించలేదు. అతడి పేరు మహమ్మద్ షారుఖ్ అని ఎన్డీటీవీ తన కథనంలో పేర్కొంది. అతని వివరాలను తెలుసుకునేందుకు దిల్లీ పోలీసులను బీబీసీ సంప్రదించింది. కానీ, అటువైపు నుంచి ఇంకా ఎలాంటి స్పందన రాలేదు.

ఆ వీడియో బయటకు వచ్చిన తర్వాత కాల్పుల ఘటన గురించి ట్విటర్‌లో చాలా చర్చ జరిగింది. సీఏఏకు అనుకూలంగా ప్రదర్శన చేస్తున్నవారిలో అతడు ఒకరని, అతని వెనుక కాషాయ రంగు జెండాలు ఉన్నాయని కొందరు ట్వీట్లు చేశారు.

Image copyright AFP

దిల్లీలోని ఓఖ్లా నియోజకవర్గ ఎమ్మెల్యే అమానతుల్లా ఖాన్ ఒక ఫొటోను ట్వీట్ చేస్తూ... తుపాకీ ఎక్కుపెట్టిన ఆ వ్యక్తి బీజేపీ కార్యకర్త అని, అతనికి కపిల్ మిశ్రాతో, బీజేపీతో సంబంధాలు ఉన్నాయని అన్నారు.

సీఏఏ అనుకూల ప్రదర్శనలో మహ్మద్ షారుఖ్ భాగమా? అతని వెనకున్న ప్రజల చేతుల్లో కాషాయ జెండాలు ఉన్నాయా? ఈ ప్రశ్నలకు సమాధానాలు తెలుసుకోవడానికి బీబీసీ ప్రయత్నించింది.

ఇంగ్లిష్ వార్తాపత్రిక 'ది హిందూ' జర్నలిస్టు సౌరభ్ త్రివేది సోమవారం సంఘటనా స్థలంలో తీసిన ఈ వీడియోను బీబీసీకి చూపించారు.

"నేను అప్పుడు మౌజ్‌పూర్ నుంచి బాబర్పూర్ వెళ్తున్నాను. జాఫ్రాబాద్, మౌజ్‌పూర్ మధ్య వాహనాల్లో మంటలు చెలరేగుతున్నాయని నాకు తెలిసింది. అక్కడ చాలామంది రాళ్లు రువ్వుతున్నారు. రెండు వైపుల నుంచీ జనం వస్తున్నారు. నేను ఉన్న చోట, ప్రజలు సీఏఏకు మద్దతుగా నినాదాలు చేస్తున్నారు. అవతలివైపున ఉన్నవారు సీఏఏకు వ్యతిరేకంగా నినాదాలు చేస్తున్నారు. వారిలో ఒకరు చేతిలో పిస్టల్ పట్టుకుని ఉన్నారు. అతని వెనకున్న జనాలు రాళ్లు రువ్వుతున్నారు. మొదట పోలీసుకు తుపాకి గురిపెట్టి పారిపోవాలని హెచ్చరించాడు. కానీ, ఆ పోలీసు అక్కడే నిలబడ్డారు. ఆ తరువాత అతడు ఎనిమిది రౌండ్లు గాలిలోకి కాల్పులు జరిపాడు" అని సౌరభ్ వివరించారు.

Image copyright Reuters

ఈ సంఘటనకు సంబంధించిన వీడియో మాకు దొరికింది. ఈ వీడియో చూసిన తరువాత, ఆ సాయుధుడి వెనకున్న జనాల చేతిలో కాషాయ జెండాలు లేవని, వాస్తవానికి అవి తోపుడు బండిపై కూరగాయలు, పండ్లు ఉన్న ప్లాస్టిక్ పెట్టెలని మాకు తెలిసింది. నిరసనకారులు రాళ్లు తగలకుండా ఆ పెట్టెలను కవచంగా వాడుతున్నారు.

మహ్మద్ షారుఖ్ కుటుంబంతో మాట్లాడేందుకు కూడా మేము ప్రయత్నించాం. కానీ, సాధ్యం కాలేదు.

అయితే, ప్రత్యక్ష సాక్షితో మాట్లాడి, వీడియోను నిశితంగా పరిశీలించిన తరువాత, మొహమ్మద్ షారుఖ్ సీఏఏ అనుకూల ప్రదర్శనలో భాగం కాదని, అతని వెనకున్న జనాల చేతుల్లో కాషాయ జెండాలు లేవన్న రెండు విషయాలు స్పష్టమవుతున్నాయి.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

ముఖ్యమైన కథనాలు

కరోనా లాక్‌డౌన్: ప్రపంచవ్యాప్తంగా 8,00,000 దాటిన కోవిడ్ బాధితులు, 37,000 దాటిన మృతులు

కరోనావైరస్: వృద్ధులు చేయాల్సిన, చేయకూడని పనులు

కరోనావైరస్‌తో పోరాటం కోసం ఏర్పాటైన PM CARES ఫండ్‌పై ప్రశ్నలు

కరోనావైరస్: భారత సైన్యం రాత్రికి రాత్రే 1,000 పడకల ఆస్పత్రి నిర్మించిందా? ఏది నిజం? - BBC FactCheck

కరోనావైరస్: ప్రభుత్వం, సమాజం స్పందించే తీరులో వర్ణ వ్యవస్థ ఛాయలు - అభిప్రాయం

కరోనావైరస్‌లో ఏముంది... అది ఎందుకంత ప్రమాదకరం?

కరోనా లాక్‌డౌన్ కుటుంబ సంబంధాల ప్రాధాన్యాన్ని గుర్తు చేసిందా?

కరోనావైరస్‌: తెలంగాణలో దిల్లీ నిజాముద్దీన్ మత కార్యక్రమానికి వెళ్ళి వచ్చిన ఆరుగురు మృతి

కరోనావైరస్:‌ వేలం వెర్రిగా సాగిన టాయిలెట్ రోల్స్ కొనుగోళ్ళ వెనుక అసలు కథేంటి?