కరోనావైరస్: మోదీ ప్రభుత్వ ఆర్థిక ప్యాకేజీతో ప్రజలకు జరిగే మేలు ఎంత?

  • నితిన్ సేఠీ
  • బీబీసీ కోసం
ఆర్థిక ప్యాకేజీతో ప్రయోజనం ఏంటి?

ఫొటో సోర్స్, Getty Images

ఫొటో క్యాప్షన్,

ఆర్థిక ప్యాకేజీతో ప్రయోజనం ఎంత?

21 రోజులపాటు లాక్‌డౌన్‌లో దారుణంగా మారబోతున్న ఆర్థిక పరిస్థితి నుంచి ప్రజలు కోలుకోడానికి మార్చి 26న కేంద్ర ప్రభుత్వం ఆర్థిక ప్యాకేజీలు అందిస్తున్నట్లు ప్రకటించింది. ప్రధానమంత్రి నరేంద్ర మోదీ దానికి ఒక రోజు ముందే దేశవ్యాప్త లాక్‌డౌన్ ప్రకటించారు.

కానీ, ప్రభుత్వం ప్రకటించిన ఆర్థిక సాయం చూస్తుంటే, ఆశించిన దానికంటే చాలా తక్కువగా, సరిపోని విధంగా ఉంది. రాబోవు నెలల్లో ఆర్థిక సాయం చాలా అవసరమైన వారికి ఇది చాలా తక్కువగా ఉపయోగపడేలా ఉంది. ప్రభుత్వం ఈ ప్యాకేజీ ప్రకటించడంలో చాలా పీనాసితనం చూపించింది.

మొదట ప్రస్తుత సమయంలో ప్రభుత్వం సాయం అసలు ఎవరికి అవసరం అనే విషయానికి వద్దాం.

ఇది, అసంఘటిత రంగాల్లో పనిసేవారికి, చట్టపరంగా పరిహారం అందని వారికి, రోజూ కడుపు నింపుకోడానికి ఎలాంటి చట్టపరమైన సంరక్షణ లేని 90 శాతం మంది భారత పౌరుల కోసం. వీరిలో కోట్ల మంది పట్టణ, గ్రామీణ కూలీలు ఉంటారు.

వీరు సమాజంలో నిరుపేదలు. ఎలాంటి ఆర్థిక కష్టం వచ్చినా అధిక ప్రభావం పడేది వీరిపైనే...

రోజుకూలీ, వారాల కూలీ, లేదా నెలసరి కూలీలపై వీరు బతుకీడుస్తారు. వీరికి వచ్చే ఆ ఆదాయం హఠాత్తుగా ఆగిపోతే, ఏదైనా కష్టాన్ని ఎదుర్కోడానికి పొదుపు అనే పేరుతో వీరిదగ్గర ఎలాంటి మొత్తం ఉండదు. లేదంటే ఏ పదో, యాభయ్యో మిగిలుంటుంది.

లాక్‌డౌన్ వల్ల దేశ ఆర్థిక కార్యకలాపాలు పూర్తిగా స్తంభిస్తే.. భారత సమాజంలోని వీరంతా లాక్‌డౌన్ సమయంలో అత్యంత కష్టాల్లో పడతారు.

ఏదైనా ప్రభుత్వం వీరి సంక్షేమం కోసం పనిచేస్తుంటే, అది ఈ కరోనా వ్యాప్తిని అడ్డుకోడానికి లాక్‌డౌన్ ప్రకటించే ముందే దేశంలో అత్యంత బలహీనులైన వీరికోసం సాయం అందించడానికి ఆర్థిక ప్యాకేజీని, దానిని అమలు చేయడానికి వనరులను సమీకరించి ఉంటుంది.

ఫొటో సోర్స్, Getty images

ఫొటో క్యాప్షన్,

స్వస్థలాలకు వెళ్తున్న పేదలు

కానీ, కేంద్రంలో బీజేపీ ప్రభుత్వం అలా చేయడంలో ఘోర నిర్లక్ష్యం చూపింది. ఎలాంటి వ్యూహం లేకుండా లాక్‌డౌన్ చేసిన 48 గంటల్లోనే, భయాందోళనలతో కూలీలు, పేదలు అందరూ తమ ఇళ్లు వదిలి పారిపోతున్నారనే సంకేతాలు వెలుగులోకి వచ్చాయి.

కొన్ని రోజుల్లో ఈ పరిస్థితి ఎంత ఘోరంగా మారవచ్చంటే వారి చేతిలో డబ్బు లేకుంటే, వారు ఆకలికి బాధితులు కావచ్చు.

అయితే ఆర్థిక మంత్రి నిర్మలా సీతారామన్ గురువారం ఆర్థిక సాయం కోసం ఒక ప్యాకేజీ ప్రకటిస్తారు అనే వార్తలు రాగానే, ప్రభుత్వం ప్రజల కష్టాలను తెలుసుకుందని, తమ కష్టాలు దూరం చేయాలని అనుకుంటోందని చాలామంది ఆశించారు. కానీ, ఆ ఆశలను నెరవేర్చడంలో నిర్మలా సీతారామన్ పూర్తిగా విఫలం అయ్యారు.

దీనిని నిజమని నిరూపించే ఆధారాలపై ఇప్పుడు మనం ఒక కన్నేద్దాం.

ప్రభుత్వం తను రూ. 1.7 లక్షల కోట్ల ఉపశమన ప్యాకేజీని ప్రకటిస్తున్నామని చెప్పింది. 2019-20 ఆర్థిక సంవత్సరంలో భారత్ సవరించిన జీడీపీలో ఈ మొత్తం కేవలం 0.83 శాతమే. మిగతా దేశాలు కరోనావైరస్ వల్ల వచ్చిన ఈ ఆర్థిక సంక్షోభ స్థితిలో తమ ఆర్థికవ్యవస్థ నిష్పత్తితో చూస్తే చాలా పెద్ద ఆర్థిక ప్యాకేజీలు ప్రకటించాయి. అలాంటప్పుడు కేంద్రం సాయం అందించడం నిజమే అయినా, అది చాలా తక్కువ.

Sorry, your browser cannot display this map