పాకిస్తాన్: మురికివాడల్లో సోలార్ వెలుగులు.. ఆ వెలుగుల్లో పిల్లల చదువులు

  • 7 జనవరి 2018
మీ పరికరంలో మీడియా ప్లేబ్యాక్ సదుపాయం లేదు.
Media captionసోలార్ చదువులు

పాకిస్తాన్ మురికివాడల్లో సోలార్ వెలుగులు వచ్చాయి.. ఆ వెలుగులు ఎంతో మార్పును తెచ్చాయి.. పిల్లలకు చదువులు ఇచ్చాయి!

పగటిపూట ఈ పిల్లలందరూ బాలకార్మికులు.. రాత్రిపూట విద్యార్థులు. ఇదో పాకిస్తానీ యువకుడి ప్రయత్నం.

పాకిస్తాన్‌లో సోలార్ బడులు ప్రారంభమయ్యాయి. ఆ వెలుగులు పిల్లల పుస్తకాలపైనే కాదు.. వారి జీవితాల్లో కూడా ప్రసరించాలంటున్నారు ‘నైట్ స్కూల్’ వ్యవస్థాపకులు రోహిల్ వరింద్.

తాజా గణాంకాల ప్రకారం పాకిస్తాన్‌లో 25 లక్షల మంది పిల్లలు చదువులకు దూరంగా పెరుగుతున్నారు. వీరిలో చాలా మంది బాలకార్మికులుగా పనిచేస్తున్నారు.

ఈ పరిస్థితిని మార్చేందుకు రోహిల్ వరింద్ ప్రయత్నిస్తున్నారు. తన ప్రయత్నానికి పాకిస్తాన్‌ మురికివాడలను వేదికగా మార్చుకున్నారు.

మురికివాడల్లోని పిల్లల కోసం రాత్రి బడులను ప్రారంభించారు. ఆ బడులు నాలుగు గోడల మధ్య కాదు.. ఆరుబయట వెన్నెల్లో.. సోలార్ వెలుగుల్లో!

‘‘టెర్రరిజం, పేదరికాలతో పోరాడి విజయం సాధించడమే నా కల. వీరంతా విద్యావంతులైతే.. పాకిస్తాన్ అభివృద్ధిలో భాగమవుతారు’’ అంటున్నారు రోహిల్ వరింద్.

2016లో ఫైసలాబాద్‌లోని ఓ మురికివాడలో రోహిల్ వరింద్.. ఈ స్కూలును ప్రారంభించారు.

కానీ.. ప్రస్తుత వాతావరణ పరిస్థితుల్లో సోలార్ బ్యాటరీలు పూర్తీగా ఛార్జ్ కావడం లేదని, తరగతులను సక్రమంగా నడపలేకపోతున్నామని ఆయన చెబుతున్నారు.

‘‘సోలార్ లైట్ల వెలుగుల్లో స్కూల్ నడుపుతున్నాం. ఈ లైట్లను ఛార్జింగ్ చేయడానికి సూర్య కాంతి అవసరం. కానీ ఇప్పుడున్న ఎండతో బ్యాటరీలను పూర్తిగా ఛార్జ్ చేయలేకపోతున్నాం’’ అంటున్నారు.

కానీ రోహిల్ వరింద్ తన ప్రయత్నాన్ని మాత్రం ఆపడం లేదు. ఇలాంటి స్కూళ్లను దేశవ్యాప్తంగా ప్రారంభించాలని కలలు కంటున్నారు.

‘‘దేశ వ్యాప్తంగా అన్ని మురికివాడల్లో ఈ స్కూళ్లను ప్రారంభించాలన్నది నా కల. కానీ నేనొక్కడినే ఆ పని చేయలేను. ప్రజల మద్దతు కూడా కావాలి. వారు కూడా ఈ కార్యక్రమంలో భాగస్వాములు కావాలి’’ అని రోహిల్ వరింద్ ఆశిస్తున్నారు.

మా ఇతర కథనాలు

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

ఈ కథనం గురించి మరింత సమాచారం

ముఖ్యమైన కథనాలు