అభిప్రాయం: ఉత్తర, దక్షిణ కొరియాల్లాగా భారత్-పాకిస్తాన్‌ దగ్గరవడం సాధ్యమేనా?

  • 1 మే 2018
భారత్, పాకిస్తాన్ దేశాల క్రికెట్ జట్ల మధ్య 2005 మార్చి 9వ తేదీన మ్యాచ్ సందర్భంగా మొహాలీలో ఇరు దేశాల జెండాలను కలిపి ప్రదర్శిస్తున్న ప్రేక్షకులు Image copyright PRAKASH SINGH/AFP/Getty Images
చిత్రం శీర్షిక భారత్, పాకిస్తాన్ దేశాల క్రికెట్ జట్ల మధ్య 2005 మార్చి 9వ తేదీన మొదటి టెస్ట్ మ్యాచ్ రెండో రోజు ఆట సందర్భంగా మొహాలీలో ఇరు దేశాల జెండాలను కలిపి ప్రదర్శిస్తున్న ప్రేక్షకులు

గత మూడు రోజులుగా సోషల్ మీడియాలో ఉత్తర కొరియా, దక్షిణ కొరియా నాయకుల గురించి వెల్లువెత్తిన పోస్టుల్ని చదివి నాకు విసుగొచ్చింది. రెండో ప్రపంచ యుద్ధం తర్వాత జరిగిన విభజన, తదనంతరం మూడేళ్లు పోట్లాడుకుని, గత 65 ఏళ్లుగా వేల సార్లు పరస్పరం బెదిరించుకుని, లక్షల టన్నుల కొద్దీ విద్వేషాల్ని పెంచుకుని, సరిహద్దులో అడుగడుగునా సైనికుల్ని మొహరించి.. ఇప్పుడు వాటన్నింటినీ పక్కనపెట్టి కరచాలనం చేసుకున్నారు. మరి భారత్-పాకిస్తాన్ అలా ఎందుకు చేయలేవు?

అయితే, కొరియాలను భారత్-పాకిస్తాన్‌లతో పోల్చడం సరికాదన్నది నా అభిప్రాయం. ఉభయ కొరియాలు.. తూర్పు, పశ్చిమ జర్మనీల్లాగా రెండు ప్రాంతాలు. ప్రచ్ఛన్న యుద్ధానికి గుర్తులు. భారత్, పాకిస్తాన్‌లు మాత్రం రెండు భిన్న దేశాలు.

బహుశా ఉభయ కొరియాలు జర్మనీలాగే ఒకరోజు ఏకమైపోవచ్చు. ఎందుకంటే అవి కలవాలనే కోరుకుంటున్నాయి. రెండు కొరియా దేశాల నాయకుల ఆలోచనా ధోరణి వేర్వేరు కావొచ్చు.. కానీ, ఆ రెండు దేశాల్లోనూ ఒకటే భాష, ఒకటే జాతి, ఒకటే రంగు, ఒకటే ఆహారం, ఇరు దేశాల చరిత్ర కూడా ఒక్కటే.

ఒకవేళ ఉత్తర కొరియాలో ఎక్కువ మంది ముస్లింలు, దక్షిణ కొరియాలో ఎక్కువ మంది హిందువులు ఉన్నారనుకోండి, 2018లో.. ప్రస్తుతమున్న ప్రపంచంలో.. 72 ఏళ్ల విభజన గురించి వాళ్లు ఒకరి గురించి మరొకరు ఏ విధంగా ఆలోచిస్తుండవచ్చు?

Image copyright Getty Images

కలయిక అసాధ్యమా?

కొరియన్ల ముక్కులు ఎలాంటివంటే.. చాలా సులభంగా అవి కలసిపోతాయి. కానీ, మన ముక్కులు మాత్రం చాలా పొడవైనవి. ఒకదాన్ని మరొకటి కోసేసుకుంటాయే తప్ప కలవటం అసాధ్యం. అవి విరిగి పడతాయే తప్ప ఏమాత్రం తగ్గవు.

ఇలాంటి పొడవాటి ముక్కులు పెట్టుకుని కూడా మనం సామాన్య దేశాల్లాగా కలసి జీవించలేమా? కచ్చితంగా జీవించగలం, కానీ ఎందుకు జీవించాలి? అలా జీవించటం మొదలు పెడితే విసుగు మినహా సాధించేదేముంది? మిగతా ప్రపంచానికి, మనకీ తేడా ఏముంటుంది?

ఏదేమైనా మేము, మీరు గాలిబ్‌ను అంగీకరిస్తాం. ఆయన కొరియన్ల గురించే కాదు మన గురించి కూడా ఇలా చెప్పుకొచ్చారు..

‘‘కలయిక అసాధ్యమైతే.. విరోధమే మేలు’’

మన వద్ద కశ్మీర్ ఉంది, అణ్వాయుధాలు ఉన్నాయి, ఆర్ఎస్ఎస్ భావజాలం ఉంది, హఫీజ్ సయీద్ ఉన్నాడు, రా ఉంది, ఐఎస్ఐ ఉంది, ఆఫ్ఘానిస్తాన్ ఉంది, వాఘా-అటారీ పరేడ్ ఉంది, ఒకరినొకరు కలవలేకపోవటానికి చాలా సాకులున్నాయి, వ్యంగ్యాస్త్రాలున్నాయి, తరతరాలను అజ్ఞానుల్ని చేసేందుకు అవసరమైన నకిలీ చరిత్రను చదివి వినిపించే కర్మాగారాలు ఉన్నాయి.

కొరియన్ల వద్ద ఏమున్నాయి? అసహాయ చూపులున్న, వయసు మళ్లిన తల్లులు తప్ప? కాబట్టి కొరియన్లు ఎక్కడ.. మనం ఎక్కడ?

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)