#FIFA2018: మొదటిసారి ఫుట్‌బాల్ ప్రపంచకప్ ఫైనల్లో క్రొయేషియా.. ఫ్రాన్స్‌తో ఆదివారం ఫైనల్

  • 12 జూలై 2018
క్రొయేషియా విజయం Image copyright Getty Images

రష్యాలో జరుగుతున్న ఫిఫా ప్రపంచకప్ 2018 పోటీలు 32 దేశాల మధ్య ప్రారంభమయ్యాయి. ఇప్పుడు ఈ టోర్నీ ఫైనల్లో తలపడే ఆఖరి రెండు జట్లు ఏవో తేలిపోయింది.

ఆదివారం ఫ్రాన్స్, క్రొయేషియా మధ్య ప్రపంచ కప్ ఫైనల్ జరగనుంది.

అదనపు సమయం వరకూ పొడిగించిన రెండో సెమీ ఫైనల్లో క్రొయేషియా ఇంగ్లండ్‌ను 2-1 గోల్స్ తేడాతో ఓడించి ఫైనల్లోకి ప్రవేశించింది.

Image copyright Getty Images
చిత్రం శీర్షిక ఐదు నిమిషాలకే గోల్ వేసిన ఇంగ్లండ్

అయితే, మ్యాచ్ ప్రారంభమైన ఐదు నిమిషాలకే ఇంగ్లండ్ ఆధిక్యం సంపాదించింది. కీరన్ ట్రిప్పర్ అద్భుతమైన ఫ్రీ కిక్‌తో బంతిని నేరుగా గోల్ పోస్ట్‌లోకి పంపాడు. మొదటి హాఫ్ వరకూ క్రొయేషియా ఒక్క గోల్ కూడా చేయలేకపోయింది. ఇంగ్లండ్ ఆధిక్యం కొనసాగింది.

Image copyright Reuters
చిత్రం శీర్షిక గోల్ తర్వాత క్రొయేషియా జట్టు సంబరాలు

అదనపు సమయం వరకూ ఉత్కంఠ

కానీ సెకండ్ హాఫ్‌లో క్రొయేషియా పుంజుకుంది. 68వ నిమిషంలో క్రొయేషియా వైపు నుంచి సైమ్ వ్రసాల్జకో ఇచ్చిన పాస్‌ను ఇవాన్ పెరిసిక్ గోల్ పోస్ట్‌లోకి పంపించాడు.

మ్యాచ్ సమయం పూర్తయ్యే వరకూ రెండు జట్లూ మరో గోల్ చేయలేకపోయాయి. దాంతో ఆట అదనపు సమయానికి చేరింది.

108వ నిమిషంలో హెడర్ ద్వారా లభించిన పాస్‌ను మారియో మండుజుకిత్స్ గోల్‌గా మలిచాడు. క్రొయేషియాను ఆధిక్యంలో నిలిపాడు. ఇంగ్లండ్ గోల్ కీపర్ జార్డన్ పిక్‌ఫోర్డ్ బంతి గోల్‌పోస్ట్‌లోకి వెళ్తుంటే ఆపలేకపోయాడు.

Image copyright PA

గణాంకాలలో కూడా క్రొయేషియా, ఇంగ్లండ్ కంటే మెరుగ్గా నిలిచింది. మ్యాచ్ సమయంలో 55 శాతం బంతి క్రొయేషియా ఆటగాళ్ల అదుపులో ఉంది. గోల్ పోస్ట్ లక్ష్యంగా క్రొయేషియా జట్టు ఏడు సార్లు షాట్స్ కొట్టింది. ఇంగ్లండ్ మాత్రం రెండు సార్లే అలా చేయగలిగింది.

క్రొయేషియా జట్టుకు 8, ఇంగ్లండ్ జట్టుకు నాలుగు కార్నర్స్ లభించాయి.

40 లక్షల మంది జనాభా ఉన్న క్రొయేషియా మొదటి సారి ఫిఫా ప్రపంచ కప్‌ ఫైనల్లో ఆడబోతోంది. కానీ 52 ఏళ్ల తర్వాత ఫైనల్ చేరాలనుకున్న ఇంగ్లండ్ కల మాత్రం కలగానే మిగిలిపోయింది.

ఇవి కూడా చదవండి

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)