టైఫూన్ జేబి: జపాన్‌ అతలాకుతలం... జలమయమైన కాన్సాయి ఎయిర్‌పోర్ట్

  • 5 సెప్టెంబర్ 2018
మీ పరికరంలో మీడియా ప్లేబ్యాక్ సదుపాయం లేదు.
Media captionజపాన్‌ అతలాకుతలం

టైఫూన్ జేబి ధాటికి జపాన్ అతలాకుతలమైంది. గత పాతికేళ్లలో ఎన్నడూ లేనంతగా జేబి ప్రభావం చూపిందని, ఇప్పటివరకు 10 మంది మృతిచెందారని, 300 మంది గాయపడ్డారని జపాన్ ప్రభుత్వ అధికార ప్రతినిధి యొషిహిదె సూగా తెలిపారు.

అక్కడి ప్రధాన విమానాశ్రయాల్లో ఒకటైన ఒసాకాలోని కాన్సాయ్ అంతర్జాతీయ విమానాశ్రయమాన్ని తాత్కాలికంగా మూసివేశారు. అక్కడ చిక్కుకున్న వేలాది మందిని సురక్షిత ప్రాంతాలకు తరలిస్తున్నారు.

జపాన్ పశ్చిమ ప్రాంతంలో నష్టం తీవ్రంగా ఉంది. క్యోటో, ఒసాకా సహా పలు నగరాల్లో జనజీవనం అస్తవ్యస్తమైంది.

విమాన సర్వీసులు, రైళ్లు, ఫెర్రీలను రద్దు చేయడంతో వేలాది మంది ప్రయాణికులు ఎక్కడివారక్కడే నిలిచిపోవాల్సిన పరిస్థితి ఏర్పడింది.

Image copyright Kyodoma Reuters
చిత్రం శీర్షిక తుపాను ధాటికి విరుచుకుపడుతున్న భారీ అలలు

గాలుల వేగం తగ్గి ఉత్తర దిశగా పవనాలు కదులుతుండడంతో వరదలు, మట్టి పెళ్లలు విరిగిపడే ప్రమాదం ఉందని, ప్రజలు అప్రమత్తంగా ఉండాలని హెచ్చరికలు జారీచేశారు.

Image copyright AFP
చిత్రం శీర్షిక ఒసాకా వీధుల్లో హోర్డింగులు, కేబుళ్లు కుప్పకూలాయి

బుధవారం ఉదయం నాటికి 12 లక్షల మంది ప్రజలను వారున్న ప్రాంతాలు ఖాళీ చేయాల్సిందిగా అధికారులు సూచించారు.

ముఖ్యంగా, 30 వేల మంది తీవ్ర ప్రమాదంలో ఉన్నారని, అయితే తప్పనిసరిగా తరలివెళ్లాలన్న ఆదేశాలేమీ ఇవ్వలేదని అక్కడి అగ్నిమాపక, విపత్తు నిర్వహణ సంస్థ వెల్లడించింది.

ఒసాకాలో గాలుల తీవ్రతకు జెయింట్ వీల్ గిర్రున తిరుగుతున్న వీడియో ఒకటి సోషల్ మీడియాలో వైరల్‌గా మారింది.

టైఫూన్ ప్రభావిత ప్రాంతాల్లో పాఠశాలలు, కార్యాలయాలు, సంస్థలను మూసివేశారు. సుమారు 20 లక్షల కుటుంబాలు ఈ ప్రభావానికి గురయ్యాయి.

Image copyright AFP
చిత్రం శీర్షిక నీట మునిగిన కాన్సాయ్ విమానాశ్రయ రన్‌వే

అంతర్జాతీయ సర్వీసులు సహా మొత్తం 800 విమానాలు రద్దయ్యాయి.

బుధవారం ఒసాకాలోని కాన్సాయ్ అంతర్జాతీయ విమానాశ్రయంలో చిక్కుకుపోయినవారిని సమీపంలోని మరో స్థానిక విమానాశ్రాయానికి బోట్లలో తరలించారు.

Image copyright EPA
చిత్రం శీర్షిక విమానాశ్రయానికి దారి తీసే వంతెనను ఢీకొన్న ట్యాంకర్

కృత్రిమంగా నిర్మించిన దీవిలో ఉన్న కాన్సాయ్ అంతర్జాతీయ విమానాశ్రయాన్ని భూభాగంతో కలిపే వంతెనను ఓ ట్యాంకర్ ఢీకొట్టడంతో రాకపోకలు నిలిచిపోయాయి. దీంతో సుమారు 3 వేల మంది విమానాశ్రయంలో చిక్కుకుపోయారు. వారిని బోట్లలో సమీపంలోని మరో విమానాశ్రయానికి సురక్షితంగా తరలిస్తున్నారు.

ఇవి కూడా చదవండి

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

సంబంధిత అంశాలు