ప్రపంచ ఆరోగ్య సంస్థ హెచ్చరిక: శారీరక వ్యాయామం చేయని ప్రతి నలుగురిలో ఒకరికి ముప్పు

ప్రపంచవ్యాప్తంగా శారీరక వ్యాయామం చేయడం బాగా తగ్గిపోతోందని నిపుణులు హెచ్చరిస్తున్నారు.

ప్రపంచంలో నాలుగో వంతు జనాభా, అంటే 140 కోట్ల మంది తగినంత శారీరక వ్యాయామం చేయడం లేదని, 2001 తర్వాత వ్యాయామం చేసేవారి సంఖ్య చాలా తక్కువగా పెరిగిందని ప్రపంచ ఆరోగ్య సంస్థ ఒక నివేదికలో చెప్పింది.

వ్యాయామం చేయకపోవడం వల్ల గుండె వ్యాధులు, టైప్-2 మధుమేహం, కొన్ని క్యాన్సర్లు లాంటి అనారోగ్య సమస్యలు వచ్చే ప్రమాదం ఉందని చెబుతోంది.

బ్రిటన్ సహా అధిక ఆదాయం వచ్చే దేశాల్లో చాలా తక్కువ మంది వ్యాయామం చేస్తున్నారని ఈ నివేదికలో చెప్పారు.

ఆప్రికాలోని రెండు ప్రాంతాలు మినహా, ప్రపంచవ్యాప్తంగా మహిళలు ఎక్కువగా వ్యాయామం చేయడం లేదని కూడా ఇందులో గుర్తించారు.

ప్రధాన ఆందోళన

168 దేశాల్లో 19 లక్షల మందిపై చేసిన 358 జనాభా ఆధారిత సర్వేల్లోని వ్యాయామం వివరాలను ప్రపంచ ఆరోగ్య సంస్థ(డబ్ల్యుహెచ్ఓ) పరిశీలించింది. లాన్సెట్ పబ్లిక్ హెల్త్ అధ్యయనం కోసం గణాంకాలు రూపొందించింది.

బ్రిటన్, అమెరికా సహా ఎక్కువ ఆదాయం వచ్చే దేశాల్లో శారీరక శ్రమ చేయని ఉన్న వారి సంఖ్య 2001లో 32 శాతం నుంచి 2018లో 37 శాతానికి పెరిగిందని ఇందులో గుర్తించారు. అయితే తక్కువ ఆదాయం వచ్చే దేశాల్లో మాత్రం అది స్థిరంగా 16 శాతం దగ్గరే ఉంది.

ఒక వారంలో 150 నిమిషాలకంటే తక్కువగా సాధారణ వ్యాయామం చేసేవారు లేదా 75 నిమిషాల కంటే తక్కువగా కఠిన వ్యాయామం చేసేవారిని కూడా ఈ జాబితాలో చేర్చారు.

తగినంత శారీరక వ్యాయామం చేయని వారున్న దేశాల్లో జర్మనీ, న్యూజీలాండ్, అమెరికా కూడా ఉన్నాయి.

తూర్పు, ఆగ్నేయ ఆఫ్రికాలో తప్ప దక్షిణాసియా, మధ్య ఆసియా, మధ్యప్రాచ్యం, ఉత్తర ఆఫ్రికా, పశ్చిమ దేశాల్లో పురుషుల కంటే మహిళలు తక్కువ యాక్టివ్‌గా ఉన్నారని ఈ నివేదికలో చెప్పారు.

పిల్లల పోషణ, కొన్ని ప్రాంతాల్లో ఉన్న సంప్రదాయాల వంటి చాలా కారణాల వల్ల మహిళలకు వ్యాయామం చేయడం కష్టం అయ్యుండవచ్చని పరిశోధకులు భావిస్తున్నారు.

బ్రిటన్‌లో, శారీరక శ్రమ చేయని వారు 2016లో ఒవరాల్‌గా 36 శాతం ఉండగా అది పురుషులలో 32 శాతం, మహిళలో 40 శాతం ఉంది.

లక్ష్యం అందుకోవడం సాధ్యమేనా?

సంపన్న దేశాల్లో ఎక్కువగా స్థిరమైన ఉద్యోగాలు ఉండడం, రవాణాకు ఎక్కువగా తమ వాహనాలు ఉపయోగించడం, వారి అలవాట్లు కూడా వారిని శారీరక వ్యాయామం లేకుండా చేస్తున్నాయని ఈ పరిశోధనలో తేలింది.

అయితే, తక్కువ ఆదాయం వచ్చే దేశాల్లో మాత్రం ప్రజలు ఎక్కువగా తమ పనుల్లో చురుకుగా ఉంటున్నారు, నడవడం లేదంటే ప్రజా రవాణాను ఉపయోగించడం వంటివి చేస్తున్నారు.

ప్రపంచ ఆరోగ్య సంస్థ 2025 నాటికి శారీరక వ్యాయామం చేయకపోవడం అనే సమస్యను 10 శాతం తగ్గించాలనుకుంటోంది. కానీ, ఇది ఇలాగే కొనసాగితే ఆ లక్ష్యం చేరలేకపోవచ్చని పరిశోధకులు హెచ్చరిస్తున్నారు.

"ప్రపంచంలో చాలా మంది తగినంత శారీరక శ్రమ చేస్తున్నారు. కానీ పెద్దవారిలో సగటున నాలుగోవంతు మంది ఆరోగ్యంగా ఉండడానికి నిర్దేశించిన శారీరక వ్యాయామం చేయడం లేదు" అని ఈ అధ్యయనానికి నేతృత్వం వహించిన డబ్ల్యుహెచ్ఓ డాక్టర్ రెజీనా గుతోల్డ్ చెప్పారు.

రోజూ తగినంత శారీరక వ్యాయామం చేయని వారి సంఖ్య పెరుగుతుండడంతో ప్రజల ఆరోగ్యం, వ్యాధుల నివారణ, వాటి అదుపు గురించి ప్రపంచ ఆరోగ్య సంస్థ పరిశోధకులు ఆందోళన వ్యక్తం చేస్తున్నారు.

"శారీరక వ్యాయామం చేసే పురుషులు, మహిళల మధ్య ఉన్న ఈ అసమానతల ప్రకారం గ్లోబల్ యాక్టివిటీ టార్గెట్ సాధించడం కష్టం. మహిళలకు సురక్షితంగా, తక్కువ ధరలో, వారి సంస్కృతికి ఆమోదయోగ్యంగా వ్యాయామం చేసే అవకాశాలను అందించాలి. వాటి గురించి ప్రచారం చేయాలి" అని డబ్ల్యుహెచ్ఓకు చెందిన మరో డాక్టర్ ఫియోనా బుల్ అన్నారు.

19 నుంచి 64 ఏళ్ల వారికి వ్యాయామం గైడ్‌లైన్స్

వ్యాయామం ఎంత సేపు చేయాలి?

మిత ఏరోబిక్ వ్యాయామం అంటే?

కఠిన వ్యాయామంలో ఏమేం ఉంటాయి?

కండరాలకు బలం ఇచ్చే వ్యాయామం ఏది?

ఏరోబిక్ వ్యాయామం, కండరాలకు బలం కోసం ఏం చేయాలి?

-ఎన్‌హెచ్ఎస్ సౌజన్యంతో

శారీరక శ్రమ చేయనివారు ఎక్కువగా ఉన్న దేశాలు:

శారీరక శ్రమ చేయని వారు తక్కువగా ఉన్న దేశాలు

క్రీడలను ప్రచారం చేసి, తగిన మౌలిక సదుపాయాలను కల్పించాలని, నడక, సైకిలుపై వెళ్లేవారిని ప్రోత్సహించాలని నిపుణులు ప్రభుత్వాలను కోరుతున్నారు.

"ఆర్థికాభివృద్ధి జీవనశైలిలో మార్పులకు కారణమైనప్పుడు, అది ప్రజలకు శారీరక శ్రమ దూరమయ్యేలా చేస్తుంది, ప్రజలు మరింత చురుకుగా ఉండేందుకు ప్రభుత్వం సాయం చేయాలి. సైకిల్, నడక సులభం అయ్యేలా ప్రజా రవాణాను మెరుగు పరచాలి" అని సిడ్నీ యూనివర్సిటీకి చెందిన డాక్టర్ మెలొడీ డింగ్ అన్నారు.

ఇవికూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)