ఈ ఫోటో మీ మానసిక ఒత్తిడిని చెప్పేస్తుందా? దీని ‘వెనుక’ నిజమేంటి?

  • 24 నవంబర్ 2018
ఇల్యూజన్ ఫోటో Image copyright INSTAGRAM/YURYFROM

ఈమధ్యకాలంలో వాట్సాప్, ట్విటర్‌లలో ఇలాంటి చిత్రాలు ప్రత్యక్షమయ్యాయి. 'ఈ చిత్రం కదులుతున్నట్లు అనిపిస్తోందా? అస్సలు కదలడం లేదా?? మీకు అనిపించేది, కనిపించేదాన్నిబట్టి మీరు ఎంత ఒత్తిడిలో ఉన్నారో తెలుసుకోండి' అంటూ చాలామంది ఈ ఫోటోను షేర్ చేశారు.

నిజంగా ఈ ఫోటో.. మీరు ఎంత ఒత్తిడిలో ఉన్నారో చెబుతుందా?

చాలామందికి, ఈ ఫోటో కదులుతున్నట్లు కనిపిస్తుంది. కానీ ఇది అస్సలు కదలదు. ఈ ఫోటో ఎంత వేగంగా కదిలినట్లు అనిపిస్తే మీరు అంత ఎక్కువ ఒత్తిడిలో ఉన్నట్లు అర్థం అని సోషల్ మీడియాలో ఓ మెసేజ్ చక్కర్లు కొడుతోంది.

''ఈ స్టిల్ ఇమేజ్‌ను జపాన్‌కు చెందిన యమమోటో అనే ఒక న్యురాలజీ ప్రొఫెసర్ రూపొందించారు. ఈ ఫోటోలో ఎలాంటి కదలిక లేకపోయినా, లేదా కాస్త కదిలినట్లు కనిపించినా మీరు ఆరోగ్యంగా ఉన్నారని, బాగా నిద్రపోయారని అర్థం. ఈ బంతి నెమ్మదిగా కదులుతోందా.. మీరు ఒత్తిడిలో ఉన్నారని అర్థం. అలాకాకుండా బంతి వేగంగా కదులుతుంటే మాత్రం, మీకు ఒత్తిడి ఎక్కువగా ఉందని, ఇంకా మానసిక సమస్యలు కూడా ఉన్నాయని అర్థం!'' ఇదీ ఆ మెసేజ్ సారాంశం.

కానీ ఇది నిజం కాదు.

ఈ ఆప్టికల్ ఇల్యూజన్‌ను ఉక్రెయిన్‌కు చెందిన 'యూరీ పరెపాదియా' అనే డిజైనర్ రూపొందించారు.

2016లో రూపొందించిన ఈ డిజైన్‌ వేయడానికి ఆయనకు 2 గంటల సమయం పట్టింది. ఈ బొమ్మకు, మీ ఆరోగ్యానికి ఎలాంటి సంబంధమూ లేదని 50ఏళ్ల యూరీ చెబుతున్నారు.

‘‘ఈ ఫేక్ న్యూస్‌ను నేను మొదటిసారిగా ఫేస్‌బుక్‌లో చూశాను. ఆ తర్వాత చాలా చోట్ల వార్త కనిపించింది'' అని యూరి 'బీబీసీ త్రీ'కి తెలిపారు.

''నాకు చాలా ఇబ్బందిగా అనిపించింది. ఇది కాపీరైట్ చట్టాన్ని ఉల్లంఘించినట్లే. సోషల్ మీడియాలో ఉంచిన ఈ పోస్ట్‌లను వెంటనే తొలగించాలని సదరు వ్యక్తులకు ఉత్తరాలు కూడా రాశాను''

ఈ పోస్టులను తొలగించడానికి ఓవైపు యూరీ ప్రయత్నిస్తుంటే, మరోవైపు ప్రజలు మాత్రం సోషల్ మీడియాలో ఈ ఫోటోలను షేర్ చేస్తూ.. తమ ఆరోగ్య పరిస్థితి గురించి ఓ నిర్ణయానికి వచ్చేస్తున్నారు.

ఈ ఫేక్ న్యూస్‌ను అడ్డుకోవడానికి యూరీ మరో అడుగు ముందుకేసి, తన ఇన్స్టాగ్రామ్‌ అకౌంట్లో ఈ ఫోటోను పోస్ట్‌ చేసి, అసలు విషయాన్ని వెల్లడించారు.

''ఈ ఆప్టికల్ ఇల్యూజన్‌ను సెప్టెంబర్ 26, 2016న.. అడోబ్ ఇల్లస్ట్రేటర్‌లో వేశాను. దీన్ని రూపొందించడానికి 'అకియోషి కిటయోక' ఎఫెక్ట్‌ను వాడాను. రంగురంగుల బ్యాక్‌గ్రౌండ్‌పై నలుపు, తెలుపు రంగులతో గీయడంతో.. ఈ బొమ్మ కదులుతున్నట్లు కనిపిస్తుంది'' అని ఆ పోస్ట్ సారంశం.

ఇన్స్టాగ్రామ్‌లో పోస్ట్ పెట్టాక ప్రజలకు అసలు విషయం తెలిసింది.. ఇప్పుడు నాకు చాలా ఆనందంగా ఉంది అని యూరీ అన్నారు.

''ఎప్పుడైతే ప్రజలకు ఈ ఫోటో రూపొందించింది నేనే అని తెలిసిందో, అప్పుడే నిజాన్ని వెలుగులోకి తేగలిగాను'' అని యూరీ అన్నారు.

మీరు ఒత్తిడిలో ఉన్నారా లేదా అనే విషయాన్ని ఒక ఆప్టికల్ ఇల్యూజన్‌ ఫోటో ద్వారా తెలుసుకోవాలనుకోవడం సరి కాదు.

ఒకవేళ మీ మానసిక ఆరోగ్యం గురించి బెంగగా ఉంటే వెంటనే సరైన వైద్యులను సంప్రదించండి కానీ ఇలాంటి ఫోటోల జోలికి వెళ్లొద్దు.

ఇవి కూడా చదవండి

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి)