పదేళ్లుగా కోమాలో ఉన్న మహిళ ప్రసవం... అత్యాచార నేరస్థుడిని గుర్తించేందుకు ఆస్పత్రి సిబ్బందికి డీఎన్‌ఏ పరీక్షలు

  • 9 జనవరి 2019
కోమాలో ఉన్న మహిళ.. ప్రతీకాత్మక చిత్రం Image copyright iStock
చిత్రం శీర్షిక ప్రతీకాత్మక చిత్రం

దాదాపు పదేళ్లుగా కోమాలో ఉన్న ఓ మహిళ కొద్ది రోజుల క్రితం బిడ్డకు జన్మనిచ్చారు. అమెరికాలోని అరిజోనా రాష్ట్రంలో ఫొనిక్స్ పట్టణానికి సమీపంలోని ఓ ప్రైవేటు నర్సింగ్ హోంలో ఈ ఘటన వెలుగులోకి వచ్చింది.

ఇన్నాళ్లూ అచేతన స్థితిలో బెడ్‌మీద పడి ఉన్న ఆమెపై అత్యాచారానికి పాల్పడిందెవరో గుర్తించేందుకు పోలీసులు దర్యాప్తు ముమ్మరం చేశారు.

ఇక్కడ పనిచేసే సిబ్బందిలోనే ఎవరైనా ఆ అఘాయిత్యానికి ఒడిగట్టి ఉంటారన్న అనుమానంతో ఈ ఆరోగ్య కేంద్రంలో పనిచేస్తున్న మగ సిబ్బంది డీఎన్‌ఏ నమూనాలు సేకరించాలని పోలీసులు నిర్ణయించారు. అందుకోసం ఆస్పత్రి యాజమాన్యానికి వారెంట్ జారీ చేశారని వాషింగ్టన్ పోస్ట్ పత్రిక తెలిపింది.

అత్యంత హేయమైన ఈ ఘటన తర్వాత నర్సింగ్ హోం సీఈఓ రాజీనామా చేశారు.

Image copyright Getty Images

అసలేం జరిగింది?

29 ఏళ్ల ఆ మహిళ దాదాపు దశాబ్ద కాలంగా వైద్యుల పర్యవేక్షణలో ఉంటున్నారు.

ఆమె డిసెంబర్ 29న ప్రసవించినట్లు స్థానిక కేపీహెచ్‌వో-టీవీ తెలిపింది.

ఇన్నేళ్లుగా ఎలాంటి చలనం లేకుండా కోమాలో ఉన్న ఆమెలో ఆరోజు ఒక్కసారిగా కదలికలు కనిపించాయని ఆస్పత్రి సిబ్బంది చెబుతున్నారు. పురుటి నొప్పులతో మూలుగుతుండగా గమనించి నర్సులు ఆమెకు ప్రసవం చేసినట్లు ఓ వ్యక్తి చెప్పారు.

ఆమె 24 గంటలూ వైద్యుల పర్యవేక్షణలో ఉంటున్నారని, ఆమె ఉన్న గదికి చాలామంది వెళ్లేవారని ఆయన చెప్పినట్లు కేపీహెచ్‌వో-టీవీ పేర్కొంది.

"అప్పటి దాకా కోమాలో ఉన్న ఆమె ఒక్కసారిగా మూలగడం మొదలుపెట్టారు. ఆమెకు ఏం జరుగుతోందో సిబ్బందికి అర్థం కాలేదు. బిడ్డకు జన్మనిచ్చేదాకా ఆమె గర్భం దాల్చారన్న విషయం సిబ్బందిలో ఎవరికీ తెలియదు" అని ఆ వ్యక్తి వివరించారు.

ప్రస్తుతం శిశువు ఆరోగ్యంగా ఉన్నట్లు వైద్యులు తెలిపారు.

Image copyright Getty Images
చిత్రం శీర్షిక ప్రతీకాత్మక చిత్రం

2013లో ఫిర్యాదులు

అరిజోనా రాష్ట్రంలో నేర రికార్డుల ప్రకారం, 2013లోనూ ఈ ఆరోగ్య కేంద్రంలో పనిచేసే సిబ్బంది మీద ఫిర్యాదులు వచ్చాయి. నలుగురు రోగుల పట్ల ఓ ఉద్యోగి అసభ్యకరంగా మాట్లాడారని తేలింది. దాంతో అప్పుడు సదరు ఉద్యోగిని యాజమాన్యం విధుల నుంచి తొలగించింది.

నిబంధనలు కఠినతరం

తాజా ఘటనతో ఆరోగ్య కేంద్ర యాజమాన్యం నిబంధనలు కఠినతరం చేసింది. మహిళా రోగులు ఉన్న గదుల్లోకి మగ వైద్యులు తప్పనిసరిగా మహిళా సిబ్బందిని వెంటపెట్టుకుని వెళ్లాలని స్పష్టం చేసింది.

దర్యాప్తు అధికారులకు పూర్తిగా సహకరిస్తామని ఆ సంస్థ ప్రతినిధి చెప్పారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)