బోరిస్ జాన్సన్: బ్రిటన్‌ కొత్త ప్రధానమంత్రి

  • 23 జూలై 2019
బోరిస్ జాన్సన్ Image copyright Reuters
చిత్రం శీర్షిక బోరిస్ జాన్సన్

కన్జర్వేటివ్ పార్టీ సభ్యులు తమ నాయకుడిగా బోరిస్ జాన్సన్‌ను బ్యాలట్ పద్ధతిలో ఎన్నుకున్నారు. దీంతో యునైటెడ్ కింగ్‌డమ్ తదుపరి ప్రధానమంత్రిగా ఆయన బాధ్యతలు చేపట్టనున్నారు.

కన్జర్వేటివ్ పార్టీ నాయకత్వం, ప్రధాన మంత్రి పదవికి జరిగిన పోటీలో జెరెమీ హంట్‌ 46,656 ఓట్లు సాధించగా, బోరిస్ జాన్సన్‌కు 92,153 ఓట్లు లభించాయి.

బుధవారం బ్రిటన్ ప్రధాన మంత్రిగా బోరిస్ జాన్సన్ బాధ్యతలు చేపడతారు. ఈయన గతంలో లండన్ మేయర్‌గా పనిచేశారు.

‘‘థెరిసా మే ప్రభుత్వంలో పనిచేయడం తనకు లభించిన గొప్ప అవకాశమని’’ ఆమె స్థానంలో బాధ్యతలు చేపట్టనున్న బోరిస్ జాన్సన్.. కన్జర్వేటివ్ పార్టీ నాయకుడిగా ఎన్నికైన తర్వాత మాట్లాడుతూ చెప్పారు.

థెరిసా మే పదవీకాలం మంగళవారంతో పూర్తికానుంది.

ఈ బ్యాలట్ ఓటింగ్‌లో 87.4 శాతం పోలింగ్‌ జరగ్గా.. మొత్తం 160,000 ఓట్లు పోలయ్యాయి.

‘‘బ్రెగ్జిట్‌‌ను పూర్తి చేయడం, దేశాన్ని ఏకం చేయడం, జెరెమీ కార్బిన్‌ను ఓడించడం’’ తాను చేయబోయే పనులని బోరిస్ జాన్సన్ తన ప్రసంగంలో హామీ ఇచ్చారు.

అక్టోబర్ 31 నాటికల్లా బ్రెగ్జిట్‌ పూర్తయ్యేలా చూస్తామని, తద్వారా లభించే అన్ని అవకాశాలనూ, ప్రయోజనాలనూ అందుకుంటామని ఆయన చెప్పారు.

‘‘మళ్లీ మనం పైకెదగనున్నాం’’ అని ఆయన ప్రకటించారు.

కాగా, ప్రస్తుతం ప్రధానమంత్రిగా ఉన్న థెరిసా మే ట్విటర్ ద్వారా బోరిస్ జాన్సన్‌కు అభినందనలు తెలిపారు. తనవైపు నుంచి పూర్తి మద్దతు ఇస్తానని పేర్కొన్నారు.

చిన్నతనం నుంచే ‘ప్రపంచానికి రాజు’ కావాలని బోరిస్ జాన్సన్ కోరుకునేవారని, ఇప్పుడు ఆయన కన్జర్వేటివ్ పార్టీకి రాజు అయ్యారని బీబీసీ రాజకీయ వ్యవహారాల ఎడిటర్ లారా కెన్స్‌బెర్గ్ తెలిపారు.

కాగా, బోరిస్ జాన్సన్‌కు అమెరికా అధ్యక్షుడు డోనల్డ్ ట్రంప్ అభినందనలు తెలిపారు.

‘బోరిస్ జాన్సన్ దేశ మద్దతును గెలవలేదు’ - లేబర్ పార్టీ

కాగా, బోరిస్ జాన్సన్ ఎన్నికపై లేబర్ పార్టీ నాయకుడు, ప్రతిపక్ష నాయకుడు జెరెమీ కార్బిన్ స్పందిస్తూ.. ‘‘(బోరిస్ జాన్సన్) లక్ష కంటే తక్కువ కన్జర్వేటివ్ పార్టీ సభ్యుల మద్దతును గెలుపొందారు. కానీ దేశ మద్దతును గెలవలేదు’’ అని ట్వీట్ చేశారు.

దేశానికి ఎవరు ప్రధానమంత్రి కావాలనేది దేశ ప్రజలు సార్వత్రిక ఎన్నికల ద్వారా నిర్ణయించాలని ఆయన పేర్కొన్నారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)