'అమెజాన్ చాయిస్' లేబుల్ ఎలా ఇస్తారు? ఆ ఉత్పత్తులను ఎప్పుడైనా పరిశీలించారా? - ఈకామర్స్ సంస్థకు అమెరికా సెనేటర్ల లేఖ

  • 14 ఆగస్టు 2019
అమెజాన్ Image copyright Getty Images

అమెరికా దిగ్గజ వ్యాపార సంస్థ 'అమెజాన్' ఆన్‌లైన్ స్టోర్లో కొన్ని ఉత్పత్తులకు 'అమెజాన్ చాయిస్' అనే లేబుల్ ఎలా వస్తుంది? ఈ లేబుల్ ఇవ్వడానికి ప్రాతిపదిక ఏమిటి? ఇద్దరు అమెరికా సెనేటర్లు ఈ ప్రశ్నలు అడుగుతూ అమెజాన్‌కు లేఖ రాశారు. వీటికి సమాధానాలు ఇవ్వాలని చెప్పారు.

ఏయే ఉత్పత్తులకు 'అమెజాన్ చాయిస్' లేబుల్ ఇవ్వాలనేది సంస్థ సిబ్బంది నిర్ణయిస్తున్నారా, లేక అల్గారిథమ్‌లు నిర్ణయిస్తున్నాయా అని సెనేటర్లు సంస్థను అడిగారు.

నకిలీ సమీక్షల(ఫేక్ రివ్యూస్)తో ఏకంగా అమెజాన్ చాయిస్ కేటగిరీనే ఏమార్చే ఆస్కారముందని, ఫలితంగా వినియోగదారులు తప్పుదోవ పట్టొచ్చని వారు ఆందోళన వ్యక్తంచేశారు.

అమెజాన్ చాయిస్ కేటగిరీలోని చాలా ఉత్పత్తుల నాణ్యత బాగోలేదని, నకిలీ సమీక్షలతో వాటికి ఎక్కువ రేటింగ్ ఇస్తున్నారని తమ పరిశోధనలో వెల్లడైందని వార్తాసంస్థ 'బజ్‌ఫీడ్' వెల్లడించింది. ఈ వార్త వచ్చిన తర్వాత సెనేటర్లు అమెజాన్‌కు లేఖ రాశారు.

Image copyright Getty Images

అమెజాన్ చాయిస్ లేబుల్ ఉన్న ఉత్పత్తులు ఎక్కువగా అమ్ముడవుతున్నాయని అధ్యయనంలో తేలింది.

అమెజాన్ చాయిస్ లేబుల్ పొందే ఉత్పత్తుల అమ్మకాలు దాదాపు 300 శాతం పెరుగుతున్నట్ల 'ఓసీ&సీ స్ట్రాటజీ కన్సల్టంట్స్' తెలిపింది.

వినియోగదారుడు ముందెన్నడూ కొనని విభాగంలో 'అమెజాన్ ఎకో' స్పీకర్ ద్వారా వస్తువును కొంటుంటే, అతడికి చాయిస్ లేబుల్ ఉన్న ఉత్పత్తులు వస్తాయి. ఈ లేబుల్ ఉన్న అమ్మకాలు అధికంగా ఉండటానికి ఇది ఒక కారణం.

'చాయిస్' లేబుల్ ఏకపక్షంగా లేదా మోసపూరిత సమీక్షల ప్రాతిపదికగా ఇస్తుండటంపై తమకు ఆందోళన ఉందని డెమొక్రటిక్ పార్టీ సెనేటర్లు బాబ్ మెనెండెజ్, రిచర్డ్ బ్లూమెంథల్ తమ లేఖలో చెప్పారు.

Image copyright Reuters

ఈ లేబుల్ గురించి అమెజాన్ పారదర్శకత పాటించకపోవడం వల్ల వస్తువును కొనే ముందు వినియోగదారులు పూర్తి సమాచారం తెలుసుకోలేకపోతున్నారని వారు తెలిపారు.

చాయిస్ లేబుల్ ఇచ్చే ప్రక్రియను, ఈ లేబుల్ ఉన్న ఉత్పత్తుల నాణ్యతను అమెజాన్ సిబ్బంది ఎప్పుడైనా పరిశీలించారో, లేదో వెల్లడించాలని సెనేటర్లు కోరారు. తమ లేఖకు సెప్టెంబరు 16లోగా సమాధానమివ్వాలని వారు సూచించారు.

అమెజాన్ నుంచి అన్ని వివరాలతో సమాధానాలు కావాలని బజ్‌ఫీడ్‌తో మెనెండెజ్ చెప్పారు. తమ లేఖతో చాయిస్ లేబుల్ జారీలో ఆ సంస్థ అవసరమైన మార్పులు చేపట్టవచ్చన్నారు. అమెజాన్ అలా చేయకపోతే ఏదైనా ఫెడరల్ నియంత్రణ సంస్థ ద్వారా లేదా చట్టం ద్వారా అమెజాన్ చర్య చేపట్టేలా చేస్తామని తెలిపారు.

Image copyright Reuters
చిత్రం శీర్షిక 'చాయిస్' లేబుల్ ఇవ్వడానికి ప్రాతిపదిక ఏమిటనేది అమెజాన్ ఎన్నడూ వెల్లడించలేదు.

అమెజాన్ ఏమంటోంది?

నిజమైన సమీక్షలు, కచ్చితత్వంతో కూడిన సమీక్షలే ఉండేలా చూసేందుకు తాము ఎంతో కష్టపడుతున్నామని అమెజాన్ తెలిపింది.

నకిలీ సమీక్షలను గుర్తించి, తొలగించేందుకు సిబ్బందిని, ఆటోమేటిక్ సాధనాలను వాడతామని సంస్థ అధికార ప్రతినిధి వెల్లడించారు. నకిలీ సమీక్షలను అడ్డుకొనేందుకు సోషల్ మీడియా సైట్లతో కలిసి పనిచేశామని, తప్పు చేసిన వారిపై చట్టపరమైన చర్యలు కూడా తీసుకొన్నామని తెలిపారు.

తామెంతో కష్టపడి, నిజమైన వినియోగదారులు రాసిన కచ్చితమైన సమీక్షలతో వినియోగదారులకు, వస్తు విక్రేతలకు మంచి షాపింగ్ అనుభూతి కలిగేలా చూస్తున్నామని చెప్పారు. మోసపూరిత సమీక్షలు రాయాలనే అభ్యర్థనలు ఎవరి నుంచైనా వస్తే కస్టమర్ సర్వీస్‌కు తెలియజేయాలని వినియోగదారులకు సూచించారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)