భూపత్ డాకూ: భారత్‌లో ఎనభై హత్యలు చేసి పాకిస్తాన్ పారిపోయిన దోపిడీ దొంగ

  • 4 నవంబర్ 2019
Image copyright VG KANETAKARA
చిత్రం శీర్షిక భూపత్ డాకూ

భారత్‌ మోస్ట్ వాంటెడ్ ముద్ర వేసిన నేరస్థులకు పాకిస్తాన్ ఎప్పుడు ఆశ్రయం ఇచ్చినా ప్రపంచం కళ్లన్నీ ఆవైపే నిలుస్తాయి.

1993 ముంబయి బాంబు పేలుళ్ల ప్రధాన నిందితుడు దావూద్ ఇబ్రహీం పాకిస్తాన్ పారిపోయాడని, అక్కడే తలదాచుకున్నాడని వార్తలు వచ్చినపుడు భారత్ దీనిని తీవ్రంగా పరిగణించింది.

అయితే, పాకిస్తాన్ మాత్రం ఆ వార్తలను ఎప్పుడూ ఖండిస్తూనే వచ్చింది. దావూద్ ఇబ్రహీం అసలు మా దేశంలో లేడని చెబుతూనే ఉంది.

కానీ దావూద్ కంటే దాదాపు 40 ఏళ్ల ముందే, పాకిస్తాన్ అలాంటి పని చేసిందనే విషయం ఎక్కువ మందికి తెలీదు. భారత్‌ నుంచి పారిపోయిన భూపత్ అనే ఒక దోపిడీ దొంగకు ఆ దేశం ఆశ్రయం కల్పించింది.

Image copyright VG KANETAKARA
చిత్రం శీర్షిక భూపత్(ఎడమ నుంచి మూడో వ్యక్తి)

50వ దశకంలో భూపత్ డాకూ(డాకు అంటే దొంగ) దోపిడీలో గుజరాత్, రాజస్థాన్‌ రాష్ట్రాలు వణికిపోయాయి. 1949 జులై, 1952 ఫిబ్రవరి మధ్య భూపత్, అతడి గ్యాంగ్‌పై 82 హత్యారోపణలు వచ్చినట్లు చెబుతారు. వీటిలో ఆఖరి రెండు హత్యలు 1952 ఫిబ్రవరిలో జరిగాయి.

దాంతో భారత్ పోలీసులు అతడి కోసం రెండు రాష్ట్రాల్లో జల్లెడ పట్టారు. గాలించడం మొదలుపెట్టారు. దాంతో అతడు తన ముగ్గురు సహచరులతో సరిహద్దు దాటి పాకిస్తాన్ చేరుకున్నాడు.

అక్కడ పాకిస్తాన్ అతడిని అరెస్టు చేసింది. అక్రమంగా దేశంలోకి ప్రవేశించడంతోపాటు, ఆయుధాలు కలిగి ఉన్నందుకు అతడిపై కేసు నమోదు చేసింది. ఏడాది జైలు శిక్ష విధించింది.

Image copyright TCA RAGHAVAN

క్లాసిఫైడ్ ఫైల్లో భూపత్ ప్రస్తావన

ప్రముఖ పుస్తకం 'ద పీపుల్ నెక్ట్స్ డోర్-ద క్యూరియస్ హిస్టరీ ఆఫ్ ఇండియాస్ రిలేషన్ విత్ పాకిస్తాన్' రచయిత పాకిస్తాన్‌లో భారత హైకమిషనర్‌గా పనిచేసిన డాక్టర్ టీసీఏ రాఘవన్ అందులో "నేను నా దగ్గరకు డీ-క్లాసిఫై కోసం వచ్చిన ఒక ఫైల్ చూశాను. అది పూర్తి అయితే దానిని నేషనల్ ఆర్కైవ్స్‌కు పంపించవచ్చు. ఆ కేసు ఎంత ముఖ్యమైనదంటే, దానిపై రెండు దేశాల మధ్య చాలా ఉన్నతస్థాయి చర్చలు జరిగాయి. కానీ, అక్కడ సమస్య ఏంటంటే దానిపై గట్టిగా డిమాండ్ చేయడానికి భారత్ దగ్గర చట్టపరమైన దారి లేదు. ఎందుకంటే అప్పటికి రెండు దేశాల మధ్య అప్పగింత ఒప్పందంపై సంతకాలు జరగలేదు" అని చెప్పారు.

చిత్రం శీర్షిక పాకిస్తాన్‌లో భారత హైకమిషనర్‌గా పనిచేసిన టీసీఏ రాఘవన్‌తో రేహాన్ ఫజల్

భారత్ అప్పటి హై కమిషనర్ భూపత్ డాకూను భారత్ తీసుకురావాలన్న ప్రయత్నాలన్నీ విఫలమవడంతో పాకిస్తాన్ ప్రభుత్వంపై నేరుగా ఆరోపణలు చేశారు. "ఆ దేశం రాజకీయంగా ఎంత బలహీనంగా ఉందంటే, ప్రజాభిప్రాయాన్ని పక్కన పెట్టి భూపత్‌ను భారత్‌కు అప్పగించే ధైర్యం కూడా చేయలేకపోతోంది" అని ఆరోపించారు.

Image copyright Getty Images

భారత్-పాక్ ప్రధానుల చర్చలు

సౌరాష్ట్ర రాజకీయ నాయకుల ఒత్తిడి, భారత మీడియాలో భూపత్ గురించి వరుసగా వార్తలు రావడంతో 1956 జులైలో ప్రధానమంత్రి జవహర్ లాల్ నెహ్రూ, పాకిస్తాన్ ప్రధానమంత్రి మహమ్మద్ అలీ బోగ్రా మధ్య దానిపై చర్చలు కూడా జరిగాయి.

ఆ తర్వాత నెహ్రూ విదేశాంగ మంత్రిత్వశాఖ ఫైల్‌లో "పాకిస్తాన్ ప్రధాన మంత్రి నా దగ్గర భూపత్ విషయం లేవనెత్తారు. దీని గురించి మొదట వారే చొరవ తీసుకున్నారు. భూపత్‌ను ప్రోత్సహించకూడదు అనే అంశంపై తాము పూర్తిగా ఏకీభవిస్తున్నామని బోగ్రా చెప్పారు. కానీ, అతడిని తిరిగి భారత్ పంపించే విషయానికి వచ్చినపుడు, రెండు దేశాల మధ్య అప్పగింత ఒప్పందం లేదు కదా అని చేతులు తుడిచేసుకున్నారు. భారత పాలకులకు సమాచారం ఇచ్చిన తర్వాత అతడిని మీ దేశ సరిహద్దుల్లో వదిలేసే విషయాన్ని ఆలోచిస్తామని ఆయన చెప్పారు" అని రాశారు.

Image copyright Getty Images
చిత్రం శీర్షిక పాకిస్తాన్ మూడో ప్రధానమంత్రి మొహమ్మద్ అలీ బోగ్రా

బ్లిట్జ్ కవర్ పేజీపై భూపత్ వార్త

కానీ, ఎలాగోలా ఈ ప్రతిపాదన భారత మీడియాకు లీక్ అయ్యింది. దాంతో, పాకిస్తాన్ ఆ ప్రతిపాదన నుంచి వెనకడుగు వేసింది.

భారత మీడియాలో ఆ రోజుల్లో భూపత్‌కు సంబంధించిన వార్తలంటే చాలా క్రేజ్ ఉండేది. దాంతో, బ్లిట్జ్ తన 1953 ఏప్రిల్‌ సంచికలో "భూపత్‌ భారత దొంగలను పాకిస్తాన్ సైన్యంలో భర్తీ చేస్తున్నారా" అనే హెడ్‌లైన్ పెట్టింది.

ఆ కథనంలో "పాకిస్తాన్ సైన్యంలో నిఘా విభాగం కోసం భూపత్ భారత దోపిడి దొంగలను భర్తీ చేస్తున్నాడని, ఆ టాప్ సీక్రెట్ మిషన్ కోసం అతడు భారత్-పాకిస్తాన్ సరిహద్దుల్లో తిరుగుతున్నాడని" రాశారు.

Image copyright FB\JUNAGADH STATE MUSLIM FEDERATION

భారత్ పంపించకుండా ఉండేందుకు ఎత్తులు

"మీడియా అంచనాల మధ్య భూపత్ పాకిస్తాన్ తనను భారత్ పంపించకుండా ఎలాగోలా ఆపేయాలని వ్యూహం పన్నాడు. ఎందుకంటే, భారత్ వస్తే, అతడిని ఉరి తీస్తారు.

ఒకసారి ఏం జరిగిందంటే, పాకిస్తాన్‌లో కొంతమంది అతడి కోసం నాటకం వేస్తూ భూపత్ కోసం విరాళాలు పోగు చేశారు. మొత్తం 1500 రూపాయలు జమ చేశారు. అప్పట్లో అది చాలా పెద్ద మొత్తం. అది భూపత్‌కు ఎంత ఉత్సాహం ఇచ్చిందంటే, ఆ డబ్బుతో ఆయన ఒక సినిమా తీయాలనుకున్నారు. అందులో జునాగడ్‌ను భారత సైన్యం ఆక్రమించినట్లు చూపించాలనుకున్నారు. అలా, ఆ సినిమా ద్వారా భారత్‌కు వ్యతిరేకంగా పాకిస్తాన్‌లో ప్రచారం చేయడం వల్ల తను క్షేమంగా ఉండచ్చని అనుకున్నారు" అని రాఘవన్ చెప్పారు.

Image copyright VG KANETAKARA

స్వాతంత్ర్య సమరయోధుడనే ముసుగు

భారత్ పంపించకుండా పాకిస్తాన్‌లోనే ఉండిపోయేందుకు తనను స్వాతంత్ర్య సమర యోధుడుగా చెప్పుకోవడం కంటే మించిన ఎత్తు ఉండదని భూపత్ భావించాడు. అదే వాదనతో తనను విడుదల చేయాలని సింధ్ కోర్టును కోరాడు.

కోర్టులో భూపత్ అభ్యర్థలను బ్లిట్జ్ పత్రిక ప్రచురించింది. అందులో "నా జునాగడ్ రాజ్యం పాకిస్తాన్‌లో విలీనం అయినప్పుడు భారత సైన్యం దానిపై దాడి చేసింది. మేం దెబ్బకు దెబ్బ తీయాలని నిర్ణయించాం. మూడున్నేళ్లు భారత సైన్యంతో పోరాటం చేశాం. కానీ చివరికి వారే గెలిచారు. దాంతో, నేను భారత్ వదిలి, పాకిస్తాన్ ఆశ్రయం కోరాల్సి వచ్చింది. నాకు ఆశ్రయం కల్పించి, నా జీవితం కాపాడిన పాకిస్తాన్‌కు నేను విశ్వాసపాత్రుడుగా ఉంటాను. నా శరీరంలో చివరి రక్తపు బొట్టు వరకూ పాకిస్తాన్ రక్షణ కోసం పనిచేస్తాను అని భూపత్ అన్నాడని" అని రాసింది.

Image copyright FB\JUNAGADH STATE MUSLIM FEDERATION

పాకిస్తాన్‌లోనే మృతి

"జునాగఢ్ స్వాతంత్ర్య సమరయోధుడుగా చెప్పుకున్న భూపత్ ఎత్తు పనిచేసింది. పాక్ అతడిని దేశంలోనే ఉండనిచ్చింది. అలా, అతడు 2006లో చనిపోయేవరకూ పాకిస్తాన్‌లోనే ఉన్నాడు. తన మతం కూడా మార్చుకుని ఇస్లాం స్వీకరించాడు. పేరును 'అమీన్ యూసఫ్‌'గా మార్చుకున్న భూపత్, అక్కడ మళ్లీ పెళ్లి చేసుకున్నాడు. అతడికి పిల్లలు కూడా పుట్టారు" అని రాఘవన్ రాశాడు

"నేను సౌరాష్ట్ర వచ్చినపుడు, భూపత్ పాత ఇంట్లో ఉన్న అతడి మొదటి భార్య బొట్టు పెట్టుకోకుండా ఉండడం చూసేవరకూ అతడు చనిపోయిన విషయం మాకు తెలీలేదని స్థానికులు చెప్పారు. 1960లో భూపత్‌పై ఒక సినిమా కూడా తీశారు" అన్నారు.

Image copyright CRPF

భూపత్‌పై పుస్తకం

భూపత్‌ను అప్పట్లో వెంటాడిన 1933 బ్యాచ్ ఐపీఎస్ అధికారి వీజీ కానిట్కర్ భూపత్‌పై మరాఠీలో ఒక పుస్తకం కూడా రాశారు.

అందులో ఆయన "భూపత్ ప్రతి ఘటన తర్వాత పోలీసులకు ఒక లిఖిత సందేశం పంపి సవాలు విసిరేవాడు. దానిని 'జాసా' అనేవారు.

"నాకంటే పదేళ్లు చిన్నవాడైనా, అతడు నన్ను ఎప్పుడూ 'దీక్రా' అనే సంబోధిస్తూ వాటిని రాసేవాడు. దీక్రా అంటే గుజరాతీలో కొడుకు అని అర్థం" అని చెప్పాడు.

భూపత్‌ను పట్టుకోడానికి అతడి పాదముద్రలు పరిశీలించే ఇద్దరు కానిట్కర్‌కు సాయం చేసేవారు.

ఒక పోలీస్ ఎన్‌కౌంటర్‌లో తనతో ఉన్న ఒకరు చనిపోవడంతో భూపత్ మిగిలిన తన ముగ్గురు అనుచరులతో పాకిస్తాన్ పారిపోవాలని నిర్ణయించుకున్నాడు. వారిలో ఒకడైన అమర్ సింగ్ కొన్ని రోజుల తర్వాత తిరిగి భారత్ వచ్చేశాడు.

"భూపత్ పాకిస్తాన్‌లో జైలు నుంచి విడుదలయ్యాక పాలు అమ్మే వ్యాపారం ప్రారంభించాడని తర్వాత వార్తలు వచ్చాయి" అని కానిట్కర్ తన పుస్తకంలో రాశారు.

ఐపీఎస్ అధికారి కానిట్కర్ 1969లో సీఆర్పీఎఫ్ డీజీగా రిటైర్ అయ్యారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

ముఖ్యమైన కథనాలు

బోరిస్ జాన్సన్: ఒక జర్నలిస్టు.. బ్రిటన్ ప్రధాని ఎలా అయ్యారు

ఐస్ బకెట్ చాలెంజ్ ద్వారా రూ. వందల కోట్లు సమీకరించిన పీట్ ఫ్రేటస్ మృతి

ఓ గుహలో దొరికిన 44 వేల ఏళ్ళ నాటి అతి పురాతన పెయింటింగ్ ఏం చెబుతోంది...

మోదీ నీడ నుంచి బయటపడి అమిత్ షా తనదైన ఇమేజ్ సృష్టించుకున్నారా

అత్యాచారాలు, హత్యలకు రవాణా సౌకర్యాలు సరిగా లేకపోవడం కూడా ఒక కారణమా...

బోరిస్ జాన్సన్: బ్రిటన్ ప్రధానిగా మళ్ళీ కన్సర్వేటివ్ నేత... ఎన్నికల్లో టోరీల ఘన విజయం

'పౌరసత్వ సవరణ బిల్లును వ్యతిరేకించే వారితో చర్చలకు సిద్ధం' - అస్సాం సీఎం

ఆంధ్రప్రదేశ్: 'దిశ' బిల్లులకు శాసనసభ ఆమోదం

ఈరోజు మాకు హోలీ, దీపావళి కంటే పెద్ద పండుగ రోజు: పాకిస్తాన్ హిందూ శరణార్థులు