ఆస్ట్రేలియాలో వేల సంఖ్యలో ఒంటెలను చంపేస్తున్నారు... ఎందుకు?

  • 13 జనవరి 2020
ఆస్ట్రేలియాలో ఒంటెల సంహారం Image copyright Getty Images

ఆస్ట్రేలియా ఒకవైపు కార్చిచ్చుతో సతమతవుతోంది. మంటల్లో లక్షలాది జంతువులు ఆహుతయ్యాయి. అదే ఆస్ట్రేలియాలో మరోవైపు, వేలాది ఒంటెలను వేటాడి చంపుతున్నారు.

దక్షిణ ఆస్ట్రేలియాలో ఒంటెలు పెద్ద సంఖ్యలో దాడి చేసి పట్టణాలు, భవనాలను ధ్వంసం చేస్తున్నాయని ఆ ప్రాంతంలోని ఆదివాసీ ప్రజలు ఫిర్యాదు చేయటంతో స్నైపర్లు హెలికాప్టర్లలో తిరుగుతూ ఈ వేట కొనసాగిస్తున్నారు.

ఉష్ణోగ్రతలు విపరీతంగా పెరగటంతో పాటు, కరవు కారణంగా ఒంటెలను వేటాడి హతమార్చాలని నిర్ణయం తీసుకున్నారు. బుధవారం మొదలైన ఈ వేట ఐదు రోజుల పాటు కొనసాగుతుంది.

''ఒంటెలు నీటి కోసం వెదుకుతూ రోడ్ల మీద సంచరిస్తున్నాయి. పిల్లల భద్రత గురించి మేం ఆందోళన చెందుతున్నాం'' అని కానిపి సమాజంలో నివసించే మారిటా బేకర్ చెప్పారు.

ఒంటెలతో పాటు కొన్ని అడవి గుర్రాలను కూడా చంపుతారు.

Image copyright Getty Images

ఆస్ట్రేలియా పర్యావరణ, జల విభాగానికి చెందిన వేటగాళ్లు ఈ జంతువులను షూట్ చేసి చంపే పని నిర్వహిస్తారు.

వేడి, పొడి వాతావరణం వల్ల ఆస్ట్రేలియా వ్యాప్తంగా కొన్న నెలలుగా భారీ ఎత్తున కార్చిచ్చులు చెలరేగాయి. అయితే.. దేశంలో కొన్నేళ్లుగా కరవు పరిస్థితులు నెలకొన్నాయి. కార్చిచ్చు సంక్షోభానికి, ఒంటెల సంహారానికి నేరుగా సంబంధం లేదు.

దక్షిణ ఆస్ట్రేలియాలో జనం అతి తక్కువగా నివసించే అనంగు పిత్జాన్తాత్జారా యాంకున్యాత్జాన్జాత్జారా (ఏపీవై) అనే ప్రాంతంలో ఒంటెల సంహారం జరుగుతుంది. ఇది ఆస్ట్రేలియా ఆదివాసీ బృందాలు నివసించే ప్రాంతం.

''ఒంటెలు భారీ సంఖ్యలో నీటి కోసం ఊర్ల మీదకు వస్తున్న నేపథ్యంలో ఈ ఆదివాసీ సమూహాలు, వారి పశుసంపద మీద ఒత్తిడి చాలా తీవ్రమవుతోంది'' అని ఏపీవై జనరల్ మేనేజర్ రిచర్జ్ కింగ్ ఒక ప్రకటనలో పేర్కొన్నారు.

ఈ పరిస్థితుల్లో ఒంటెలను తక్షణం నియంత్రించాల్సిన అవసరం ఉందని చెప్పారు.

''ఒంటెలు కంచెలు కూల్చివేసి వస్తున్నాయి. ఇళ్ల చుట్టూ, ఇళ్లలోకి వస్తున్నాయి. ఎయిర్ కండిషనర్ల నుంచి నీరు తాగాలని ప్రయత్నిస్తున్నాయి. మేం వేడిలో, అసౌకర్య పరిస్థితుల్లో చిక్కుకున్నాం. అనారోగ్యంగా ఉన్నాం'' అని ఏపీవై ఎగ్జిక్యూటవ్ బోర్డు సభ్యురాలు మారిటా బేకర్ వివరించారు.

నిజానికి, కంగారూల నిలయమైన ఆస్ట్రేలియాలో ఒంటెలు స్థానికంగా పుట్టినవి కాదు. బ్రిటిష్ వాళ్లు 19వ శతాబ్దంలో ఇక్కడికి వలస వచ్చినపుడు.. ఇండియా, అఫ్ఘానిస్తాన్, మధ్య ప్రాచ్యం నుంచి ఒంటెలను తీసుకువచ్చారు.

దేశంలోని మధ్య ప్రాంతాల్లో లక్షల సంఖ్యలో అడవి ఒంటెలు ఉన్నట్లు అంచనా. అవి నీటి కోసం ఇళ్లు, ఊళ్లు ధ్వంసం చేయగలవు. పైగా వాతావరణ మార్పునకు తోడ్పడే మీథేన్ వాయువును విడుదల చేస్తాయి.

ఆస్ట్రేలియాలో కార్చిచ్చుల కారణంగా సెప్టెంబర్ నుంచి 25 మంది చనిపోయారు. దాదాపు 2,000 ఇళ్లు ఆహుతయ్యాయి. దేశంలోని తూర్పు, దక్షిణ ప్రాంతాలు తీవ్రంగా దెబ్బతిన్నాయి. మంటల్లో పెద్ద సంఖ్యలో జంతువులు కూడా చనిపోయాయి.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

ముఖ్యమైన కథనాలు

హైదరాబాద్: ‘మీ పౌరసత్వాన్ని నిరూపించుకోండి’ - మొహమ్మద్ సత్తార్ ఖాన్‌కు యూఐడీఏఐ నోటీసు

ఆర్మీలో మహిళాధికారులు శాశ్వత కమిషన్‌కు అర్హులన్న సుప్రీం కోర్టు తీర్పుతో జరిగేదేంటి

టీనేజ్ అమ్మాయిల ఫొటోలు పంపించి సైనికుల ఫోన్లు హ్యాక్ చేసిన మిలిటెంట్లు

మానసి జోషి: BBC Indian Sportswoman of the Year నామినీ

ఘోస్ట్ హ్యూమన్స్.. అంతు చిక్కని మానవ జాతి ఆధారాలు కనుగొన్న పరిశోధకులు

ఐఫోన్లకు కరోనా వైరస్ దెబ్బ.. ఉత్పత్తి, అమ్మకాలు, ఆదాయంపై ప్రభావం పడిందన్న ఆపిల్

పంటకు నష్టం చేసిన కలుపుమందు.. బేయర్ సంస్థకు రూ. 1,890 కోట్ల జరిమానా విధించిన కోర్టు

కరోనావైరస్: ఏ వయసు వారిపై ఎక్కువ ప్రభావం చూపుతుంది