పొరుగు దేశాల ముస్లింలను ‘బంధిస్తున్న’ చైనా.. ‘నిర్బంధ క్యాంపుల్లో కొడుతున్నారు, ఏవేవో ఇంజెక్షన్లు చేస్తున్నారు’

  • 15 జనవరి 2020
గుల్జీర్

వీళ్లంతా ముస్లింలు. కజక్‌స్థాన్ నుంచి, సరిహద్దు దాటి పొరుగునే ఉన్న చైనాలోకి వెళ్లారు. 'చైనా మమ్మల్ని బంధిస్తోంది. చైనీయులుగా మార్చాలని చూస్తోంది' అంటున్నారు వీళ్లు.

చైనా మాత్రం వీరిని ‘ఒకేషనల్ స్కూళ్ల’లో చేరుస్తున్నామని, ఆ స్కూళ్లకు విద్యార్థులంతా తమంతట తాముగా వస్తున్నారని చెబుతోంది.

‘అవి స్కూళ్లు కాదు. క్యాంపులు, జైళ్లు’ అని బాధితులు అంటున్నారు.

ఈ క్యాంపులకు వెళ్లి, నెలల పాటు నిర్బంధంలో ఉండి బయటపడిన కొందరు కజక్ ముస్లింలతో బీబీసీ మాట్లాడింది.

మీ పరికరంలో మీడియా ప్లేబ్యాక్ సదుపాయం లేదు.
Media captionవీడియో: పొరుగు దేశాల ముస్లింలను ‘బంధిస్తున్న’ చైనా

‘వాళ్లు మమ్మల్ని చైన్లతో కట్టేశారు. కొట్టేవారు. ఏవో ఇంజెక్షన్లు చేసేవారు’ అని బాధితులు చెప్పారు.

ముస్లిం మత విధానాల ప్రకారం చేతులు, ముఖం కడుక్కుంటుంటే.. ‘నీళ్లెందుకు తాగుతున్నావు?’ అని అడిగేవారని క్యాంపులో 17 నెలలు బంధీగా ఉన్న టుర్సిన్ బెక్ చెప్పారు.

‘కజక్ భాష మర్చిపోవాలని, చైనీస్ నేర్చుకోవాలని బలవంతం చేశారు. అలా నేర్చుకోకపోతే క్యాంపు నుంచి బయటకు వెళ్లడం కష్టం’ అన్నారని ఒరిన్ బెక్ అనే మరొక బాధితుడు తెలిపారు.

అయితే, ఇప్పుడు అందరినీ వదిలేశామని చైనా ప్రభుత్వం చెబుతోంది. కానీ, తమ వాళ్ల ఆచూకీ లభించట్లేదని వందలాది కుటుంబాలు చెబుతన్నాయి.

తమవాళ్లను ఎప్పుడు, ఎక్కడి నుంచి, ఎలా తీసుకెళ్లిందీ ఆయా కుటుంబాల వారు ఆధారాలతో సహా చెబుతున్నారు.

చిత్రం శీర్షిక చైనా చెబుతున్న ‘ఒకేషనల్ స్కూళ్లు’ బాధితులు చెబుతున్న ‘నిర్బంధ క్యాంపులు’ ఇవే

అయితే, ‘ఒకేషనల్ స్కూళ్ల’లో ఉత్తీర్ణులైన అందరికీ పని చూపించడంలో ‘సాయం చేశాం’ అని చైనా వెల్లడించింది.

కానీ, అది ఉపాధి కాదని, బలవంతంగా చాకిరీ చేయించుకోవడం అని చైనా నుంచి బయటపడ్డ టుర్సిన్ బెక్ వివరించారు.

‘చైనా పోలీసులు పెట్టుకునే టోపీ మాకు పెడతారు. షీల్డు, లాఠీ ఇస్తారు. ఉదయం 7 గంటల నుంచి, రాత్రి 10 గంటల దాకా మేం కాపలా కాయాలి. మాకు తిండి పెట్టరు, డబ్బులూ ఇవ్వరు’ అని ఆయన తెలిపారు.

క్యాంపు నుంచి బయటికొచ్చిన తర్వాత అంతా పోలీసుల వద్ద రిజిస్టర్ చేసుకోవాలని, ఎక్కడికి వెళ్లాలన్నా పోలీసుల అనుమతి తీసుకోవాలని, అలా తీసుకోకపోతే ప్రభుత్వానికి వ్యతిరేకంగా ఉన్నట్లు చూస్తారని గుల్జీరా అనే ముస్లిం మహిళ తెలిపారు.

తనను చైనీయురాలిగా మార్చినా కూడా తాను మాత్రం తన కజక్, ముస్లిం గుర్తింపును కోల్పోలేదని, అల్లా తనను కాపాడారని ఆమె చెబుతున్నారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)