యాపిల్ మొట్టమొదటి ఇండియన్ స్టోర్ 2021లో ప్రారంభం: టిమ్ కుక్

  • 27 ఫిబ్రవరి 2020
టిమ్‌ కుక్ Image copyright Getty Images

భారతదేశంలో యాపిల్ మొట్టమొదటి స్టోర్లను 2021లో ప్రారంభిస్తామని, ఈ ఏడాదిలో భారతదేశంలో ఆన్‌లైన్ స్టోర్‌ను ప్రారంభిస్తామని ఆ సంస్థ చీఫ్ ఎగ్జిక్యూటివ్ టిమ్ కుక్ చెప్పారు.

యాపిల్ సంస్థ స్థానిక భాగస్వామి లేకుండా భారతదేశంలో సొంత స్టోర్‌ను ప్రారంభించటానికి భారత ప్రభుత్వం నుంచి ప్రత్యేక అనుమతి పొందాల్సి వచ్చింది.

సంస్థ వాటాదారుల వార్షిక సమావేశంలో టిమ్ కుక్ ఈ ప్రకటన చేశారు.

యాపిల్ మార్కెట్‌ప్లేస్ నుంచి యాప్‌లను తొలగించాలని ప్రభుత్వాలు కోరినపుడు సంస్థ స్పందించే విధానాన్ని మార్చాలన్న ప్రతిపాదన మీద కూడా ఈ సమావేశంలో వాటాదారులు ఓటువేశారు. ఈ ప్రతిపాదన స్వల్ప తేడాతో వీగిపోయింది.

ప్రపంచంలో రెండో అతిపెద్ద స్మార్ట్‌ఫోన్ మార్కెట్ అయిన భారతదేశంలో యాపిల్ తన సొంత స్టోర్లను తెరుస్తామని కొంత కాలంగా చెప్తోంది. అయితే.. ఆ స్టోర్లను ఎప్పుడు ప్రారంభించేదీ తేదీ ప్రకటించటం ఇదే మొదటిసారి.

విదేశీ బ్రాండ్లు భారతదేశంలో తమవైన సింగిల్ బ్రాండ్ స్టోర్లను తెరవకుండా నిషేధించే చట్టాలను భారత ప్రభుత్వం 2018లో సవరించింది. అయినప్పటికీ.. ఒక భారతీయ భాగస్వామితో కలిసి స్టోర్ ఏర్పాటు చేయాలని భారత్ కోరిందని టిమ్ కుక్ చెప్పారు.

అయితే.. యాపిల్ 'మంచి భాగస్వామి' అవుతుందని తాను భావించలేదని ఆయన వాటాదారులతో వ్యాఖ్యానించారు.

''మేం మా పద్ధతిలో పనులు చేయటానికే ఇష్టపడతాం'' అన్నారు.

యాపిల్ ప్రస్తుతం తన ఉత్పత్తులను భారతదేశంలో థర్డ్ పార్టీ స్టోర్ల ద్వారా విక్రయిస్తోంది. కానీ దీని విక్రయాలు పోటీదారులైన సాంసంగ్, హువావేల కన్నా వెనుకబడి ఉన్నాయి.

యాపిల్ ఉత్పత్తులకు చైనాలో కరోనావైరస్ విజృంభణ కన్నా ముందు నుంచే డిమాండ్ మందగిస్తుండటంతో.. ఇండియా వంటి ఇతర అభివృద్ధి చెందుతున్న దేశాల మార్కెట్లతో తన వృద్ధిని పెంచుకోవచ్చునని యాపిల్ ఆశిస్తోంది.

Image copyright Getty Images

మానవ హక్కుల అంశం

యాపిల్ యాప్ స్టోర్ నుంచి కొన్ని అప్లికేషన్లను తొలగించాలంటే ప్రభుత్వాలు కోరినపుడు.. వాటి మీద స్పందించే విధానాన్ని మార్చటానికి ఉద్దేశించిన ప్రతిపాదన మీద కూడా యాపిల్ వాటాదారులు ఓటు వేశారు.

ఆ ప్రతిపాదన ఆమోదం పొందినట్లయితే.. ''భావప్రకటనా స్వేచ్ఛను ఒక మానవ హక్కు''గా గౌరవిస్తూ యాపిల్ సంస్థ బహిరంగంగా కట్టుబడేలా చేసి ఉండేది.

చైనా ఇంటర్నెట్ ఆంక్షలను అధిగమించటానికి హాంగ్ కాంగ్ నిరసనకారులకు ఉపయోగపడిన ఒక యాప్ సహా పలు యాప్‌లను.. చైనా ప్రభుత్వం కోరికమేరకు యాప్ స్టోర్‌ నుంచి తొలగించిన నేపథ్యంలో ఈ ప్రతిపాదన ప్రాధాన్యం సంతరించుకుంది.

ఇటువంటి యాప్‌లను తొలగించాలన్న విజ్ఞప్తులకు తలవంచటం ద్వారా.. చైనా మానవ హక్కుల ఉల్లంఘనల్లో యాపిల్ భాగస్వామిగా మారిందని ఈ ప్రతిపాదన మద్దతుదారులు విమర్శిస్తున్నారు.

ప్రతిపాదన వీగిపోయినప్పటికీ.. దీనికి అనుకూలంగా 40 శాతం ఓట్లు లభించాయి.

గతంలోనూ ఇదే తరహా చర్యలు ప్రతిపాదనకు వచ్చినా.. వాటికి ఎన్నడూ ఈ స్థాయి మద్దతు లభించలేదు.

కరోనావైరస్ ఆందోళనలు

యాపిల్ ఆపరేషన్ల మీద కరోనావైరస్ చూపుతున్న ప్రభావం గురించి కూడా టిమ్ కుక్ ప్రస్తావించారు.

కరోనావైరస్ విజృంభణ కారణంగా త్రైమాసిక ఆదాయ అంచనాలను అందుకోలేకపోవచ్చునని యాపిల్ ఈ నెల ఆరంభంలో తన వాటాదారులను హెచ్చరించింది.

యాపిల్ ఉత్పత్తులకు విడిభాగాలను తయారుచేసే చాలా చైనా కర్మాగారాలను.. కరోనావైరస్ వ్యాప్తిని నియంత్రించటంలో భాగంగా మూసివేయటమో, పరిమితంగా కార్యకలాపాలు నిర్వహించటమో జరుగుతోంది.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

ముఖ్యమైన కథనాలు

లాక్‌డౌన్ కష్టాలు: కొడుకు శవాన్ని చేతుల్లో మోసుకెళ్లిన తండ్రి

‘కరోనావైరస్ మీద నేను ఎలా పోరాడుతున్నానంటే...’ - హైదరాబాద్‌ పేషెంట్ నంబర్ 16 స్వీయ అనుభవం

కరోనా లాక్‌డౌన్: ‘చావు తప్పదనుకుంటే మా ఊళ్లోనే చనిపోతాం’

కరోనా లాక్‌డౌన్: ‘ప్రైవేట్ ఆసుపత్రులు, నర్సింగ్‌హోంలను ప్రభుత్వం స్వాధీనం చేసుకోవాలి - మానవ హక్కుల వేదిక

కరోనా వైరస్: ఇది సోకకూడదంటే రోగనిరోధక శక్తి ఏ స్థాయిలో ఉండాలి

కరోనావైరస్: ఆయన మరణించారు.. బంధువుల్లో 19 మందికి సోకింది.. ఇంకా 40 వేల మందికి సోకిందేమోనన్న టెన్షన్

కరోనావైరస్: తొలి మేడిన్ ఇండియా టెస్టింగ్ కిట్‌ను అందించిన భారత శాస్త్రవేత్త ఈమే.. కిట్ ఇచ్చిన గంటకే బిడ్డకు జన్మనిచ్చిన మీనల్

కరోనావైరస్: ట్విటర్‌లో #ShameOnBCCI ట్రెండింగ్, ఎందుకు

ఆంథొనీ ఫాచీ: ఆరుగురు అమెరికా అధ్యక్షులకు సలహాలు ఇచ్చిన వైద్యుడు.. ఒకప్పుడు ఎయిడ్స్‌‌తో, ఇప్పుడు కరోనాతో యుద్ధానికి దిగిన సైనికుడు