ఈ పండ్లకు వయసు కనిపించకుండా చేసే గుణం ఉందని నమ్ముతారు

  • 1 మార్చి 2020
గోజీ బెర్రీ Image copyright Getty Images

మూడో శతాబ్దం నుంచి చైనా సంస్కృతిలో గోజీ బెర్రీ పండ్లు భాగంగా ఉన్నాయి. సూఫర్ ఫుడ్‌గా వీటికి ఇప్పుడు ఆదరణ పెరిగింది.

ఈ పండ్లను 'ఎర్ర వజ్రాలు' అని కూడా పిలుస్తుంటారు. వయసు పైబడటాన్ని నెమ్మదింపజేసే గుణం వీటికి ఉందని భావిస్తుంటారు.

గోజీ బెర్రీలకు ఇప్పుడు అంతర్జాతీయంగా డిమాండ్ పెరిగింది.

వీటిని చైనా ప్రజలు వైద్య అవసరాల కోసం మూడో శతాబ్దం నుంచి వాడుతున్నారు.

చైనా వ్యాప్తంగా గోజీ పండ్లు పండుతాయి.

కానీ, నింగ్షియాలో పండేవి మాత్రం మేలు రకంగా గుర్తింపు పొందాయి. ఈ ప్రాంతంలో ప్రత్యేకమైన భౌగోళిక పరిస్థితులు ఉండటం అందుకు కారణం.

''చల్లటి పర్వత పవనాలు, సారవంతమైన మట్టి, యెల్లో రివర్ నుంచి వచ్చే సాగునీరు నింగ్షియా పండ్లను ప్రత్యేకంగా మార్చుతున్నాయి'' అని నింగ్షియా బైషీ హెంగ్‌క్సింగ్ ఫుడ్ టెక్నాలజీ కో-సేల్స్ మేనేజర్ ఎవాన్ గువో చెబుతున్నారు.

Image copyright Xinhua/Alamy

నింగ్షియాలో పురాతన కాలంలో గోజీ పండ్ల సాగు పద్ధతి ఎలా ఉందో, ఇప్పటికీ అలాగే ఉంది.

ఏటా జులై-సెప్టెంబర్‌ మధ్య నడుం ఎత్తువరకు పెరిగిన గోజీ పొదల్లో నుంచి పండ్లను కూలీలు తెంపి, బుట్టల్లో వేసుకుంటారు.

గోజీలపై చైనీయులకు మక్కువ వందల ఏళ్ల క్రితమే మొదలైంది.

వీటికి ఔషధ శక్తులున్నాయని భావిస్తుంటారు. సంప్రదాయ చైనీస్ వైద్యులు వీటిని వైద్యంలో ఉపయోగించారు. ఇప్పటికీ ఉపయోగిస్తున్నారు.

ప్రముఖ మూలికల నిపుణుడు లి షింజెన్ 16వ శతాబ్దంలో రాసిన వైద్య పుస్తకంలోనూ గోజీల గురించి రాశారు.

చైనీయులు గోజీని పండుగానూ, మూలికగానూ చూస్తారు. వీటిలో సీ విటమిన్, యాంటీ ఆక్సిడెంట్లు, అమైనో ఆమ్లాలు, మినరల్స్ మెండుగా ఉంటాయి.

గోజీలు కాలేయం, మూత్రపిండాల పనితీరు మెరుగుపరుస్తాయని చైనా సంప్రదాయ వైద్యులు చెబుతున్నారు.

''చైనాలో తల్లులు గోజీలు కళ్లకు మంచివని చెబుతూ పిల్లలతో తినిపిస్తుంటారు. గోజీల్లో కెరోటిన్ ఉంటుంది. అయితే, దానికున్న చాలా ప్రయోజనాల్లో ఇది కూడా ఒకటి. కాలేయం, మూత్ర పిండాలకూ ఇది మంచి చేస్తుంది'' అని జాంగ్ రూఫెన్ అనే చైనీస్ సంప్రదాయ వైద్యురాలు అన్నారు.

Image copyright Getty Images

చికెన్‌, అందులో రెడ్ డేట్లు, అల్లంతో చేసే సూప్‌లో ఎండబెట్టిన గోజీలను కలుపుకుని చైనీయులు తీసుకుంటారు. చామంతులతో చేసే టీలోనూ వాటిని వేసుకుంటారు.

జ్వరం, ఒళ్లు నొప్పులు, గొంతు నొప్పి, డయేరియా లాంటివి ఉన్నవాళ్లకు మాత్రం తాను గోజీలు తీసుకోమని సూచించనని జాంగ్ చెప్పారు. గోజీలను వేడి చేసే పదార్థాలుగా తాము చూస్తామని అన్నారు.

ఆరోగ్యంగా ఉన్నప్పుడు, గోజీలు ఎవరైనా తీసుకోవచ్చని ఆమె చెప్పారు.

గోజీల గురించి చైనాలో ఓ కథ ప్రచారంలో ఉంది. దాని ప్రకారం... 2 వేల ఏళ్ల క్రితం ఓ వైద్యుడు చైనాలోని ఓ గ్రామానికి వచ్చాడట. అక్కడ అందరూ వందేళ్లు పైబడ్డవాళ్లే ఉన్నారట. చుట్టూ గోజీ పండ్ల చెట్లు ఉన్న బావిలోని నీళ్లు తాగడం వల్లే వాళ్లు ఆరోగ్యంగా ఉన్నారని ఆ వైద్యుడు గుర్తించాడట.

17వ శతాబ్దానికి చెందిన మూలికల నిపుణుడు లి ఖింగ్ యువెన్ రోజూ గోజీ పండ్లను తిని 252 ఏళ్లు బతికాడని కూడా ఇంకో కథ ప్రచారంలో ఉంది.

Image copyright Xinhua/Alamy

సూపర్ ఫుడ్ అన్న గుర్తింపు రావడంతో ఆధునిక తరాలు కూడా గోజీ పండ్లను తీసుకోవడం మొదలుపెట్టాయి.

ఆసియాతో పోలిస్తే పాశ్చాత్య దేశాల్లో గోజీ పండ్ల ధర మూడు రెట్లు ఎక్కువగా ఉంటోంది. సూపర్ మార్కెట్లలోనూ, ఆన్‌లైన్‌లోనూ వీటి అమ్మకాలు సాగుతున్నాయి.

నింగ్షియాలో ఏటా 1.8 లక్షల టన్నుల గోజీలు ఉత్పత్తి అవుతున్నాయి.

ఇవి తొందరగా పండిపోతాయి. అందుకే రైతులు వీటిని తెంపడంలో ఆలస్యం చేయరు.

ఎక్కువగా వీటిని ఎండపెట్టే అమ్ముతారు. పచ్చి గోజీలు ఎక్కువ కాలం నిల్వ ఉండవు.

ఇవి కూడా చదవండి

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.

ముఖ్యమైన కథనాలు

కరోనా లాక్‌డౌన్: తూర్పు గోదావరి జిల్లాలో 150 మందితో ప్రార్థనలు చేయించిన పాస్టర్.. అరెస్ట్ చేసిన పోలీసులు

కరోనావైరస్: కోవిడ్-19 మహమ్మారి కొనసాగుతున్నప్పటికీ ఎవరెస్ట్ ఎక్కుతున్న చైనా పర్వతారోహకులు

కరోనావైరస్‌: కోవిడ్-19తో మరణించిన ముస్లిం శవాన్ని దహనం చేయడంపై శ్రీలంకలో వివాదం

కరోనావైరస్: ఒకరిని ఒకరు తాకలేకపోతున్నామనే ఈ బాధ తీరేదెలా

కరోనావైరస్: యూరప్‌లోని వృద్ధాశ్రమాల్లో మృత్యు ఘోష, వందలాది మంది వృద్ధులు మృతి

కరోనా వైరస్‌: ఒక డాక్టర్ భార్యగా నేను తీసుకునే జాగ్రత్తలు ఏంటంటే..

కరోనావైరస్: తీవ్ర సంక్షోభం దిశగా పాకిస్తాన్.. ఈ కల్లోలాన్ని ఇమ్రాన్ ఖాన్ ప్రభుత్వం తట్టుకోగలదా

కరోనావైరస్: ప్రభుత్వాలు అందిస్తున్న యాప్‌లు సురక్షితమేనా, రాబోయే రోజుల్లో వాటితో ప్రమాదం ఉందా

కరోనావైరస్: ఇండొనేసియాలో క్షణం క్షణం... భయం భయం