కరోనావైరస్: ప్రపంచమంతా ఇంట్లో ఉంటే... వీళ్ళు బీచ్‌లో ఏం చేస్తున్నారు?

  • 24 మార్చి 2020
మియామీ బీచ్‌లో యువతీయువకులు Image copyright Getty Images
చిత్రం శీర్షిక కరోనావైరస్ వ్యాప్తిని అడ్డుకునేందుకు అందరూ సామాజిక దూరం పాటించాలని ప్రభుత్వాలు, నిపుణులు పదేపదే చెబుతుంటే... ఫ్లోరిడాలోని మియామీ బీచ్‌లో సంబరాలు చేసుకునేందుకు యువతీ యువకులు గుమిగూడటంపై తీవ్ర విమర్శలు వస్తున్నాయి

కరోనావైరస్ భయంతో ప్రపంచవ్యాప్తంగా ప్రజలంతా తమ ఇళ్లలోనే స్వీయ నిర్బంధంలో ఉంటే, అమెరికాలో ఫ్లోరిడాలోని మయామీ బీచ్‌లో ఈ విద్యార్థులు మద్యం సేవించి పార్టీ చేసుకుంటున్నారు.

దీనిని బట్టి చూస్తే, కొంతమంది యువతీయువకులు కరోనావైరస్‌ తమను ఏమీ చేయలేదులే అనే ధీమాతో ఉన్నట్లు అనిపిస్తోంది.

కానీ, యువత మీద కూడా కరోనావైరస్ ప్రభావం చూపుతోందని అమెరికాలో జరిగిన తాజా అధ్యయనం చెబుతోంది.

"నాకు కరోనా వస్తే రానివ్వండి. దానివల్ల నేను పార్టీ చేసుకోవడం విరమించుకోను" అని ఆ బీచ్‌లో ఒక యువకుడు మీడియా ప్రతినిధితో అన్నారు. ఆ వీడియో వైరల్ అయ్యి చాలామందికి ఆగ్రహం తెప్పించింది.

ఈ వైరస్ గురించి యువత తప్పుగా అర్థం చేసుకుంటోందని, అది ప్రమాదకరమని చాలామంది అంటున్నారు.

అమెరికాలో కరోనావైరస్ కేసుల వివరాలను పరిశీలిస్తే, యువత మీద కూడా ఈ వైరస్ ప్రభావం తీవ్రంగానే ఉంటోంది.

Image copyright AFP
చిత్రం శీర్షిక యువత గుమిగూడకుండా ఫ్లోరిడాలోని సౌత్ బీచ్‌‌ను పోలీసులు మూసివేశారు

తాజా సమాచారం ఏం చెబుతోంది?

ఈ వైరస్ ఎవరికి సోకుతోంది? దాని ప్రభావం ఎలా ఉంటోంది? అన్న విషయాలు సవివరంగా చెప్పేందుకు అవసరమైన పూర్తిస్థాయి పరీక్షలు ప్రస్తుతం జరగడంలేదు.

ఈ వైరస్ బారిన పడి ఆస్పత్రిలో చేరుతున్న వారిలో యువతీయువకుల సంఖ్య తక్కువగా ఉంటోందని కొందరు పరిశీలకులు అంచనా వేశారు.

కానీ, ఆ సంఖ్య ఎక్కువగా ఉండవచ్చని అమెరికాలోని సెంటర్స్‌ ఆఫ్ డిసీజ్ కంట్రోల్‌ (సీడీసీ) తాజా నివేదిక చెబుతోంది.

అమెరికాలో నమోదైన 2,500 కరోనావైరస్ కేసుల వివరాలను విశ్లేషించి ఈ నివేదిక రూపొందించారు. వారిలో 20 శాతం మంది 20 నుంచి 44 ఏళ్ల మధ్య వయసువారు, 38 శాతం మంది 20 నుంచి 54 ఏళ్ల వయసు వారున్నారని సీడీసీ తెలిపింది.

అయితే, ఇప్పటి వరకు కోవిడ్-19 కారణంగా చనిపోయిన వారిలో ఎక్కువ మంది వృద్ధులే ఉన్నారన్నది మాత్రం వాస్తవం.

ప్రపంచవ్యాప్తంగా ఈ మహమ్మారి బారిన పడిన 85 ఏళ్లకు పైబడిన వారిలో 14.8 శాతం కేసులు ప్రాణాంతకంగా మారుతున్నాయి. 40 ఏళ్ల లోపు వారిలో అది 0.2 శాతంగా ఉంది.

అయితే, దీని అర్థం యువత ఈ వైరస్ బారిన పడట్లేదని, తీవ్ర అనారోగ్యానికి గురికావడంలేదని కాదు.

ఆస్పత్రుల్లో చేరుతున్న వారిలో 50, 60 ఏళ్ల వయసు వాళ్ల కంటే... 20, 30 ఏళ్ల వయసువారి సంఖ్య మరీ తక్కువేమీ లేదని సీడీసీ నివేదిక తెలిపింది.

Image copyright Getty Images

ఐసీయూలో చికిత్స

ఆ 2,500 మంది కోవిడ్- 19 బాధితుల్లో ఐసీయూలో చికిత్స అవసరమైన యువతీయువకుల సంఖ్య చాలా తక్కువగా ఉంది. అయినప్పటికీ, కొద్దిపాటు కేసులు కూడా ఆరోగ్య వ్యవస్థపై ఒత్తిడిని పెంచుతున్నాయి.

గతవారం ఇటలీ వెల్లడించిన అధికారిక లెక్కల ప్రకారం, ఐసీయూలో చేరిన కేసుల్లో 12 శాతం మంది 19 నుంచి 50 ఏళ్ల వయసు వారు ఉన్నారు.

ఫ్రాన్స్‌లో కరోనావైరస్ బారిన పడుతున్నవారిలో యువతీయువకులు కూడా ఎక్కువగానే ఉంటున్నారని నివేదికలు చెబుతున్నాయి.

అమెరికాతో పాటు, చాలా దేశాల్లోనూ కేవలం కరోనావైరస్ ప్రభావిత ప్రాంతాల నుంచి వచ్చిన వారికి, అనారోగ్యంతో ఉన్నవారికి, కరోనావైరస్ బాధితులతో సన్నిహితంగా మెలిగినవారికి మాత్రమే ప్రస్తుతం కోవిడ్-19 నిర్ధరణ పరీక్షలు చేస్తున్నారు.

సాధారణ ప్రజలకు పరీక్షలు చేయడంలేదు కాబట్టి, తాజా నివేదికలో వెల్లడించిన విషయాలపై నిపుణులు కొన్ని అనుమానాలు వ్యక్తం చేస్తున్నారు.

Image copyright Getty Images

"యువతలో ఈ వ్యాధి బాధితులు తక్కువగానే ఉన్నప్పటికీ, వారిలో కొందరు తీవ్ర అనారోగ్యానికి గురవుతున్నారన్నది సుస్పష్టం. జనాభాలో యువతీయువకులు చాలా మంది ఉన్నారు. కాబట్టి, మొత్తంగా చూస్తే కరోనా బారిన పడే యువత సంఖ్య భారీగానే ఉంటుంది" అని హార్వర్డ్ విశ్వవిద్యాలయానికి చెందిన ప్రొఫెసర్ లిప్‌సిచ్ అన్నారు.

సంతోషకరమైన విషయం ఏమిటంటే, ఆస్పత్రుల్లో చేరుతున్నవారిలో చిన్న పిల్లలు, టీనేజర్లు చాలా తక్కువ మంది ఉంటున్నారు. 19 ఏళ్ల లోపు వారిపై ఈ వైరస్ ప్రభావం పెద్దగా లేదని చాలా దేశాల గణాంకాలు చెబుతున్నాయి. అయితే, అందుకు కారణమేంటన్న విషయంలో ఇంకా స్పష్టత లేదు.

ప్రపంచవ్యాప్తంగా గణాంకాలను పరిశీలిస్తే చాలావరకు అంటువ్యాధుల వ్యాప్తికి యువత, ఆరోగ్యవంతులే వాహకాలుగా మారుతున్నారు. వారి నుంచి వృద్ధులకు, ఇతర ఆరోగ్య సమస్యలతో బాధపడేవారికి కొత్త వ్యాధులు సంక్రమిస్తుంటాయి.

ఏది ఏమైనా ప్రపంచ ఆరోగ్య సంస్థతో పాటు నిపుణులు ఇచ్చే ముఖ్యమైన సూచన: మీ చేతులను శుభ్రంగా కడుక్కోండి, సామాజిక దూరం పాటించండి. జనాలు గుమిగూడే కార్యక్రమాలకు వెళ్లకండి.

కరోనావైరస్ హెల్ప్‌లైన్ నంబర్లు: కేంద్ర ప్రభుత్వం - 01123978046, ఆంధ్రప్రదేశ్, తెలంగాణ - 104

ఇవి కూడా చదవండి.

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

ముఖ్యమైన కథనాలు

కరోనా లాక్‌డౌన్: తూర్పు గోదావరి జిల్లాలో 150 మందితో ప్రార్థనలు చేయించిన పాస్టర్.. అరెస్ట్ చేసిన పోలీసులు

కరోనావైరస్: కోవిడ్-19 మహమ్మారి కొనసాగుతున్నప్పటికీ ఎవరెస్ట్ ఎక్కుతున్న చైనా పర్వతారోహకులు

కరోనావైరస్‌: కోవిడ్-19తో మరణించిన ముస్లిం శవాన్ని దహనం చేయడంపై శ్రీలంకలో వివాదం

కరోనావైరస్: ఒకరిని ఒకరు తాకలేకపోతున్నామనే ఈ బాధ తీరేదెలా

కరోనావైరస్: యూరప్‌లోని వృద్ధాశ్రమాల్లో మృత్యు ఘోష, వందలాది మంది వృద్ధులు మృతి

కరోనా వైరస్‌: ఒక డాక్టర్ భార్యగా నేను తీసుకునే జాగ్రత్తలు ఏంటంటే..

కరోనావైరస్: తీవ్ర సంక్షోభం దిశగా పాకిస్తాన్.. ఈ కల్లోలాన్ని ఇమ్రాన్ ఖాన్ ప్రభుత్వం తట్టుకోగలదా

కరోనావైరస్: ప్రభుత్వాలు అందిస్తున్న యాప్‌లు సురక్షితమేనా, రాబోయే రోజుల్లో వాటితో ప్రమాదం ఉందా

కరోనావైరస్: ఇండొనేసియాలో క్షణం క్షణం... భయం భయం