కరోనావైరస్ పుట్టుకపై అంతర్జాతీయ దర్యాప్తు చేయాలనే డిమాండ్‌ను తోసిపుచ్చిన చైనా

చైనా

ఫొటో సోర్స్, Getty Images

కరోనావైరస్ పుట్టుక గురించి స్వతంత్రంగా అంతర్జాతీయ దర్యాప్తు జరిపించాలనే డిమాండ్‌ను చైనా తోసిపుచ్చింది.

ఈ డిమాండ్లు రాజకీయ దురుద్దేశంతో కూడుకున్నవని, కరోనా మహమ్మారి మీద పోరాడుతున్న చైనా దృష్టిని అవి పక్కదారి పట్టిస్తాయని బ్రిటన్‌లోని ఉన్నత స్థాయి చైనా రాయబారి ఒకరు షెన్ వెన్ బీబీసీతో అన్నారు.

కోవిడ్-19 మూలాలేమిటి, అది ప్రాథమికంగా ఎక్కడ విస్తరించిందనే వివరాలు ఈ వైరస్‌ను ఎదుర్కోవడంలో ఉపయోగపడతాయి.

వూహాన్ నగరంలోని మాంసాహార మార్కెట్ నుంచి ఈ వైరస్ మొదలై ఉంటుందని గత ఏడాది చివర్లో భావించారు.

అయితే, ఇటీవలి యూరోపియన్ యూనియన్ నివేదిక ఒకటి, ఈ సంక్షోభానికి సంబంధించి చైనా తప్పుడు సమాచారాన్ని ఇస్తోందని ఆరోపించింది.

రష్యా, కొంతవరకు చైనా కూడా యూరోపియన్ యూనియన్‌లో, దాని పొరుగు దేశాల్లో "ఒక లక్ష్యంతో కుట్ర సిద్ధాంతాలను" ప్రచారం చేస్తున్నాయని ఈయూ ఎక్స్‌టర్నల్ యాక్షన్ సర్వీస్ ఆరోపించింది.

అమెరికా అధ్యక్షుడు డోనల్డ్ ట్రంప్‌ కూడా చైనా ఈ వైరస్ విషయంలో వ్యవహరించిన తీరుపై పదే పదే విమర్శలు చేస్తూ వచ్చారు. అమెరికాలోని మిస్సోరి రాష్ట్రం అయితే, వైరస్ వ్యాప్తిని అరికట్టేందుకు ఎలాంటి చర్యలూ తీసుకోలేదని ఆరోపిస్తూ చైనా ప్రభుత్వం మీద కేసు కూడా వేసింది.

అయితే, ఈ వైరస్ వూహాన్ ప్రయోగశాలల్లో తయారైందనే ప్రచారంపై శాస్త్రవేత్తలు నీళ్ళు చల్లారు.

ఫొటో సోర్స్, Getty Images

ఫొటో క్యాప్షన్,

చైనాలో మరణాలు ఆ దేశం చెబుతున్న దాని కంటే చాలా ఎక్కువే ఉంటాయనే అనుమానాలు వ్యక్తమవుతున్నాయి.

చైనా అభ్యంతరాలేంటి?

ఈ వైరస్ వ్యాప్తి మొదలైనప్పటి నుంచే, అసలు అది ఎలా మొదలైందో తేల్చేందుకు అంతర్జాతీయ దర్యాప్తునకు చైనా అనుమతించాలనే డిమాండ్లు వినిపిస్తున్నాయి.

వచ్చే నెలలో జరగనున్న వరల్డ్ హెల్త్ అసెంబ్లీ వార్షిక సమావేశంలో తాను ఈ విచారణకు సంబంధించి ఓ తీర్మానాన్ని ప్రవేశపెడతానని ఆస్ట్రేలియా ప్రధాని స్కాట్ మారిసన్ ఇప్పటికే స్పష్టం చేశారు. ప్రపంచ ఆరోగ్య సంస్థకు చెందిన నిర్ణయాత్మక విభాగాల్లో వరల్డ్ హెల్త్ అసెంబ్లీ కూడా ఒకటి.

అయితే, తమ దేశం మాత్రం ఎటువంటి అంతర్జాతీయ విచారణకు అనుమతించబోదని షెన్ బీబీసికి స్పష్టం చేశారు.

“స్వతంత్ర దర్యాప్తు అన్నది పూర్తిగా రాజకీయ ప్రేరేపితం.” అని ఆమె చెప్పారు.

“ఇప్పటికే మేం వైరస్‌తో పోరాడుతున్నాం. మా దృష్టంతా ప్రస్తుతం దాని మీదే ఉంది. ఇలాంటి పరిస్థితుల్లో విచారణ గురించి మాట్లాడతారేంటి? ఇది కేవలం మా దృష్టిని మరల్చడమే కాదు. మా వనరులను కూడా దారి మళ్లిస్తాయి.” అని షెన్ వ్యాఖ్యానించారు. అంతేకాదు, "ఈ డిమాండ్ల వెనుక పూర్తిగా రాజాకీయ దురుద్దేశాలే ఉన్నాయి. దీన్ని ఎవరూ అంగీకరించలేరు. ఇది ఎవరికీ మంచి చేయదు" అని అన్నారు.

“ఈ వైరస్ ఎక్కడ పుట్టిందన్న విషయంలో అనేక వదంతులు ప్రచారంలో ఉన్నాయి. అలాంటి తప్పుడు ప్రచారం చాలా ప్రమాదకరం. కరోనావైరస్ కన్నా ఈ రాజకీయ వైరస్ మరింత ప్రమాదకరం.” అని షెన్ అన్నారు.

మరోవైపు వైరస్ కేంద్ర బిందువు వూహాన్ అంటూ వస్తున్న ఆరోపణల్ని చైనా అధికారులు, అక్కడ మీడియా తప్పుదారి పట్టించే ప్రయత్నం చేస్తున్నాయని యూరోపియన్ యూనియన్ తన నివేదికలో తెలిపింది. అలాగే ప్రభుత్వ అధీనంలో ఉన్న సోషల్ మీడియా ఛానెళ్లలో ఈ కోవిడ్-19 సంక్షోభానికి అమెరికా మిలటరీకి ముడి పెడుతూ కథనాలను కూడా వండి వారుస్తున్నారని నివేదిక పేర్కొంది.

చైనా తీరుపై ఆందోళన చెందుతున్న యూరోపియన్లు –గోర్డాన్ కొరిరా, బీబీసీ రక్షణ వ్యవహారాల ప్రతినిధి

ఇటువంటి సున్నిత పరిస్థితుల్లో వీలైనంత వరకు దౌత్య పరంగానే వ్యవహారం నడపాలని యూరోపియన్ దేశాలు భావిస్తున్నాయి.

ఈ విషయంలో చైనాను ప్రతిఘటిస్తే ఎక్కడ ఆదేశంతో సంబంధాలు దెబ్బతింటాయోనన్న భయం నెలకొని ఉందని తన పేరును వెల్లడించడానికి ఇష్టబడని ఓ బ్రిటన్ అధికారి వ్యాఖ్యానించారు.

ప్రస్తుత సంక్షోభ సమయంలో వైరస్‌ను ఎదుర్కొనేందుకు అవసరమైన సామాగ్రి విషయంలో చాలా దేశాలు బీజింగ్‌పైనే ఆధారపడి ఉన్నాయి. అందుకే ఈ విషయంలో ఆచి తూచి వ్యవవహరించాలని నిపుణులు చెబుతున్నారు.

“మనం వీలైనంత వరకు మాటల తీవ్రతను తగ్గించాలి. ప్రతిఘటించకుండా ఉండటం మంచిది. ఎందుకంటే మనం ప్రస్తుతం అంతకన్నా ప్రమాదకరమైన పరిస్థితులతో పోరాడుతున్నాం” అని చైనాలో ఒకప్పుడు బ్రిటన్ దౌత్యవేత్తగా పని చేసిన చార్లెస్ పార్టన్ అభిప్రాయపడ్డారు.

ఇక అమెరికా విషయానికొస్తే ఈ ఏడాదిలో ఎన్నికలు జరగనున్నాయి. ఈ పరిస్థితుల్లో వైరస్‌పై విచారణ పేరుతో బీజింగ్ మీద ఒత్తిడి తీసుకు రావడం ఎంతో రాజకీయ ప్రాధాన్యం ఉన్న అంశమని ప్రత్యేకంగా చెప్పాల్సినవసరం లేదు.

కరోనావైరస్ హెల్ప్‌లైన్ నంబర్లు: కేంద్ర ప్రభుత్వం - 01123978046, ఆంధ్రప్రదేశ్, తెలంగాణ - 104

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)