మధ్యప్రదేశ్

Getty ImagesCopyright: Getty Images

ఆక్సిజన్ కొరత వల్ల సంభవించే మరణాలపై మధ్యప్రదేశ్ మానవ హక్కుల కమిషన్ నివేదిక కోరింది

మధ్యప్రదేశ్‌లో కరోనా విజృంభిస్తోంది. ఇప్పటికే రాష్ట్రంలో కోవిడ్ కేసులు 5 లక్షల 25 వేలు దాటాయి.

కొన్ని నగరాల్లో పరిమిత లాక్‌డౌన్‌ విధించినా గ్రాఫ్‌ను కిందకు దించడానికి ఏ మాత్రం సహాయపడలేదు.

మంగళవారం మధ్య ప్రదేశ్‌లో కొత్తగా 13,417 కరోనా కేసులు నమోదయ్యాయి.

సోమవారం మొరేనాలో ముగ్గురు, కట్నీలో ఇద్దరు కోవిడ్ రోగులు ఆక్సిజన్ కొరతతో చనిపోయారు.

దీనికి సంబంధించి రాష్ట్ర ఆరోగ్య కార్యదర్శి, సంబంధిత జిల్లా కలెక్టర్లు, వైద్య అధికారులు మే 3 లోపు ఒక నివేదిక సమర్పించాలని మానవ హక్కుల కమిషన్ కోరింది.

మధ్యప్రదేశ్‌లో గత 26 రోజుల్లో కొన్ని రోజులు మినహాయించి ప్రతి రోజూ రికార్డు స్థాయిలో కోవిడ్ కేసులు నమోదవుతున్నాయి.

మంగళవారం పాజిటివిటీ రేటు 22.6 శాతం ఉందని గణాంకాలు చెబుతున్నాయి. అంటే రాష్ట్రంలో టెస్ట్ చేయించుకున్న ప్రతి నాలుగో వ్యక్తికీ కరోనా పాజిటివ్ వచ్చినట్లు లెక్క.

ఈ నెలలో పాజిటివిటీ రేటు సాధారణ స్థాయి కన్నా మూడు రెట్లు పెరిగింది.

అయితే సోమవారం నమోదైన 23 శాతం కంటే మంగళవారం పాజిటివిటీ రేటు కొంచెం తక్కువగా కనిపించింది.

మంగళవారం 98 మంది మరణించారు. దీంతో రాష్ట్రంలో కోవిడ్ మృతుల సంఖ్య 5,319కు చేరుకుంది.

Getty ImagesCopyright: Getty Images

ఇండోర్‌లో గరిష్టంగా 1,837 కేసులు నమోదయ్యాయి. తరువాత భోపాల్‌లో 1,836 మంది, గ్వాలియర్‌లో 1,198 మంది కరోనా బారిన పడ్డారు.

గత 24 గంటల్లో 11,577 మంది కోలుకుని ఆసుపత్రుల నుంచి ఇంటికి వెళ్లడం కొంత ఉపశమనం కలిగించే విషయం. దీంతో ఇప్పటివరకు రాష్ట్రంలో కరోనా నుంచి కోలుకున్న వారి సంఖ్య 4,25,812కు చేరింది.

ఏప్రిల్ 27 మంగళవారం నాటికి రాష్టంలో మొత్తం 94,276 యాక్టివ్ కేసులు ఉన్నాయి.

మధ్య ప్రదేశ్‌లో కూడా ఆక్సిజన్, రెమ్‌డెసివిర్ కొరత ఉంది. వీటికి సంబంధించిన ఫొటోలు మీడియాలో కనిపిస్తున్నాయి.

ఇండోర్‌లోని బ్లడ్ బ్యాంకుల్లో ప్లాస్మా సేకరించే కిట్ల కొరత ఉన్నట్లు కొన్ని రిపోర్టులు తెలిపాయి. దాంతో ప్లాస్మా ఇవ్వడానికి వెళ్లినవాళ్లు తిరిగి వచ్చేస్తున్నారు.

మధ్యప్రదేశ్‌కు మెడికల్ ఆక్సిజన్ అందించేందుకు జార్ఖండ్‌లోని బొకారో నుంచి మంగళవారం ఉదయం ఆరు ట్యాంకర్లతో రైలు బయలుదేరింది. వీటిలో 64 మెట్రిక్ టన్నుల ఆక్సిజన్ పంపుతున్నారు.

శనివారం అర్థరాత్రి షాడోల్‌లో ప్రభుత్వ మెడికల్ కాలేజ్‌లో ఆక్సిజన్ కొరత కారణంగా ఆరుగురు చనిపోయినట్లు వార్తలు వచ్చాయి.

ఆ ఇన్‌స్టిట్యూట్ డీన్ అందించిన సమాచారం ప్రకారం ఈ వార్తను పీటీఐ ప్రచురించింది.

అయితే, తర్వాత మధ్య ప్రదేశ్ వైద్యవిద్యా శాఖ మంత్రి విశ్వాస్ సారంగ్ రాష్ట్రంలో ఆక్సిజన్ కొరత ఉందనే వార్తను ఖండించారు. దీనిపై విచారణ జరపాలని ఆదేశించారు.