መረጻ ሴራሊዮን፡ ጁሊየስ ማዳ ፕረዝደንታዊ ቃለ መሓላ ኣብ ሆቴል ፈጺሙ

ጁሊየስ ማዳ ባዮ፡ ሃዱሽ ፕረዚደንት ሴራሊዮን 4 ሚያዚያ 2018 Image copyright Reuters

ሕጹይ ተቓዋሚ ሰልፊ ሴራሊዮን ኮይኑ ዝቐረበ ጁሊየስ ማዳ ባዮ መረጻ ሴራሊዮን ድሕሪ ምዕዋቱ ንቃለ መሓላ ናብ ሆቴል ከይዱ።

እዚ ነበር ወተሃደራዊ መራሒ ብዝተወሰነ መልክዑ ነታ ሃገር ኣብ 1996 መሪሑዋ'ዩ።

ብጁሊየስ ብጸቢብ ኣፈላላይ ዝተስዓረ ሳሙራ ካማራ ግና፡ እቲ ኣካይዳ ዘይስሩዕ ከምዝነበረ ብምግላጽ ናብ ቤት ፍርዲ ከይደ ነቲ ዉጽኢት ክብድሆ'የ ኢሉ።

ጁሊስ ባዮ፡ ዝሓለፈ ቐዳም ኣብ ዝተኻየደ ፕረዝደንታዊ መረጻ ተዓዋቲ ከምዝኾነ ብወግዒ ምስተነግረ ክልተ ሰዓት ኣብ ዘይመልአ'ዩ ቃለ መሓላ ኣብ ሆቴል ፈጺሙ።

"እዚ ወጋሕታ ሓዱሽ ምዕራፍ'ዩ" ዝበለ ጁሊየስ "ህዝቢ እዛ ዓባይ ሃገር ሓድሽ ኣንፈት ንምዉሳድ ድምጹ ሂቡ" ኢሉ።

ሓድሽ መራሒ ሴራሊዮን ማዳ ባዮ፡ ካብቲ ዝተዉሃበ ድምጺ ትሕቲ 52 ሚኢታዊት ረኺቡ'ዩ ተዓዊቱ።

"ኣያ ዲሞክራሲ" ዝብል መጸዉዒ ካብ ደገፍቱ ዝረኸበ ወዲ 53 ዓመት ጁሊየስ፡ እታ ሃገር ንዝተወሰነ ግዜ ኣብ ዝመርሐሉ እዋን ብግህሰት ሰብኣዊ መሰላት ነቐፌታ ዝበጽሖ ዝነበረ'ዩ።

ፕረዚደንት ሴራሊዮን ዝነበረ ኤርነስት ባይ ኮሮማ ክልተ ዙርያ (10 ዓመት) መሪሑ'ዩ ካብ ስልጣን ተኣልዩ።

ጁሊየስ ማዳ ባዮ ኣብ ሕሉፍ መረጻ እታ ሃገር ብኮሮማ ተስዒሩ ምንባሩ ጸብጻባት የዘኻኽሩ።