ኣብ ዱር ኣወስትራልያ ንዝጠፍአት ህፃን ዘድሓነ ከልቢ

ማክስ Image copyright QUEENSLAND POLICE
ናይ ምስሊ መግለጺ ማክስ ነታ ህፃን ን16 ሰዓታት ክሕልዋ ፀኒሑ

ፖሊስ ኣወስትራልያ ነታ ካብ ወለዳ ጠፊኣ፡ ኣብ ጫካ ዝተረኸበት ጓል ሰለስተ ዓመት ህፃን ንዝሓለወ ከልቢ ክብሪ ሂቡ።

ህፃን ኣውሮራ፡ ኣብ ኩዊንላንድ ካብ ዝርከብ ገዝኣ ምስጠፍአት ከቢድ ኣለሻ'ዩ ተኻይዱ።

እቲ ነታ ህፃን እናሰዓበ ከይተፈለያ ዝፀንሐ መሊኡ ክሰምዕን ክርእይን ዘይክእል ከልቢ፡ ዕድሚኡ 17 ዩ።

ብቐዳም ንጉሆ ክሳብ ዝርከቡ ድማ ኣብቲ ጫካ ነታ ህፃን እናሓለወ 16 ሰዓታት ሓሊፎም።

እኖሓጎ ህፃን ኣውሮራ፡ ሊሳ ማሬ በነት ከምዝበለቶ ድምፂ ናይታ ህፃን ካብ ኣስታት 2 ኪሎሜትሮ ርሕቀት'ያ ሰሚዓቶ።

"ብዓውታ እናፀዋዕኩ ምስተፀጋዕኩ እቲ ከልቢ ናባይ ብምምፃእ መሊሱ ናብቲ ንሳ ዘላትሉ እናመርሐ ወሲዱኒ" ክትብል ን'ኣወስትራልያ ብሮድካስቲንግ ኮርፖሬሽን' ተዛሪባ።

ካልኦት ቤተሰባ'ውን፡ ኣውሮራን እቲ ከልብን ቁሪ ኣብ ዝተፈጠረሉ እዋን ኣብ ትሕቲ ከውሒ ኮፍ ክብሉ ከምዝኸኣሉ ተዛሪቦም።

ኣውሮራ እንትርፊ ቀሊል ዝኾነ ማህሰይቲ ካልእ ዝኸፍአ ሓደጋ ከምዘየጋጠማ ተሓቢሩ'ሎ።

Image copyright QUEENSLAND POLICE
ናይ ምስሊ መግለጺ ሰብ-ሞያ ሕክምና፡ እቶም ነዊሕ ዕድመ ዘቑፀሩ ኣኽልብቲ ምስ ደቂ ሰባት ዝጠበቐ ዝምድና ከምዘለዎም ይሕብሩ

ኣውሮራ ኣብ ዝጠፍኣትሉ እዋን ልዕሊ 100 ሰራሕተኛታት እዋን ሓደጋን ወለንተኛታትን ናብ ኣለሻ ወፊሮም ነይሮም።

ፖሊስ ኣውስትራልያ ንተግባር ማክስ ብምንኣድ፡ ማዕርግ ክብሪ ከልቢ ፖሊስ ሂብዎ።

ዝኹሉ ተኣማንነት?

ኣብ ዩኒቭርሲቲ ሲድኒ ተመራማሪ ባህርያት እንስሳ ዝኾኑ ፕሮፌሰር ፖል ክሪቨይ፡ ንማክስ ከም ኣብነት ብምልዓል ብዕድመ ዝዓበዩ ኣኽልብቲ ምስ ደቂ ሰባት ስጡም ዝምድና ከምዘለዎም ሓቢሮም።

ማክስ ምስታ ህፃን ኣብ ዝነበረሉ እዋን ጭንቀታ ተገንዚቡ ክኸውን ከምዝኽእል'ውን ተዛሪቦም።

"እታ ህፃን ትበክይ እንተነይራ፡ ናብ ዝሓሸ ስምዒት ንኽትምለስ እቲ ከልቢ ይሕግዛ ነይሩ ይኸውን" ክብሉ ንቢቢሲ ገሊፆም።

"ምስኣ ምፅናሕን ኣብ ጎና ደው ምባልን እቲ ቑፅሪ ሓደ መገዲ ምፅንዕናዕ ክኸውን ይኽእል" ኢሎም።

ተመሳሳሊ ዛዕባታት