ጂና ሃስፐል፡ ፈላመይቲ ጓል ኣንስተይቲ ዳይሬክተር ሲኣይኤ

ሃስፐል Image copyright Getty Images

ድሕሪ ኣብ 2001 ዝበጽሐ መጥቃዕቲ ግብረ ራዕዲ 9/11 ብዝተትሓሓዘ ኣብ ታይላንድ "ጸሊም ከባቢ" ተባሂሉ ዝምራሕ ጉጅለ ስለላ ትመርሕ ዝነበረት ጂና ሃስፐል ፈላመይቲ ሓለቓ ሲኣይኤ ክትኸዉን ሰኔት ኣሜሪካ ኣጽዲቑ።

እቲ ሰኔት 54 ን45 ብዝኾነ ድምጺ ጂና ሃስፐል ዳይሬክተር እቲ ትካል ክትኸዉን ወሲኑ ኣሎ።

ሓላፊ ትካል ስለላ ኣሜሪካ ዝነበረ ማይክ ፖፔዮ ሚኒስትር ጉዳይ ወጻኢ ኮይኑ ተሸይሙ ካብ ሓላፍነቱ ለጊሱ'ዩ።

ፕረዚደንት ኣሜሪካ ዶናልድ ትራምፕ ጂና ሃስፐል ብሕጹይነት እንተቕርባ፡ ኣፓል ፓርቲ ሪፐብሊካን ጆን ማኬይን ጂና ነቲ ትካል ክትመርሕ ብቕዕቲ ኣይኾነትን ዝብል ተቓዉሞ ከምዝነበሮ ዝዝከር'ዩ።

ጂና ነቲ ትካል ክትመርሕ 6 ኣባላት ዲሞክራት ድምጺ እንትህቡ ክልተ ኣባላት ሪፐብሊካን ድማ ድምጺ ተቓዉሞ ሂቦም።