ኣብ ናይጄርያ ባርዕ ነዳዲ ዝፀዓነት መኪና ትሸዓተ ሰባት ቀቲሉ

ዝተቓፀላ መካይን Image copyright Getty Images

ካብ ቁፅፅር ወፃኢ ዝኾነት ነዳዲ ዝፀዓነት መኪና ኣብ ዓባይ ከተማ ሌጎስ ብምቅፃላ ምኽንያት ሞት ትሸዓተ ሰባት ኮይና ይብሉ ሰብ መዚ።

እታ መኪና ካብ ቁፅፅር ወፃኢ ኮይና ነዳዲ ኣብቲ ብርክት ዝበላ መካይን ዝሓልፋሉ መገዲ ምስፈሰሰ ሓሙሽተ ኣውቶቡሳት ሓዊሱ ልዕሊ 50 መካይን ተቓፂለን።

ልጓም ናይታ መኪና (ፍሬን) ስለዝተበላሸወ እዩ እቲ ሓደጋ ኣጋጢሙ ተባሂሉ።

ካብ ኣፍሪካ ቁፅሪ ሓደ መፍረይት ነዳዲ ኣብ ዝኾነት ናይጀርያ፡ ሓደጋ ምብራዕ ነዳዲ ዝፀዓና መካይን ብተደጋጋሚ እዩ ዘጋጥም።

Image copyright Getty Images

ተወካሊ ውሕስነት መገዲ እታ ሃገር ንቢቢሲ ከምዝተዛረቦ፤ እታ ነዳዲ ዝፀዓነት መኪና ናብ ጥቓ ድልድል ምስበፅሐት እያ ካብ ቁፅፅር ወፃኢ ኮይና ብድሕሪኡ ድማ ተገምጢላ።

ስዒቡ ድማ ነዳዲ ምፍሳስ ምስጀመረ ሓዊ ተላዒሉ። እቲ ባርዕ ሽዑ ካብ መኪና ናብ መኪና እናተላገበ ተጋዲዱ።

ፕረዚደንት ናይጄርያ ሙሓመዱ ቡሃሪ በቲ ዘጋጠመ ሓደጋ ኣዝዩ ከምዝሓዘነ ገሊፁ።