ትራምፕ ምስ ሓንቲ ሞዴል ዝነበሮ ርክብ ንምሕባእ እንትዘራረብ ዝተቐድሐ ድምፂ ተፈኒዉ

Image copyright Getty Images

ናይ ምስሊ መግለጺ ካብ ፀጋም፡ ማይክል ኮሀን፣ ካረን ማክዱገል፣ ዶናልድ ትራምፕ

ዶናልድ ትራምፕ፡ ካረን ማክዱገል ምስ እትበሃል ሞዴል ዝነበሮ ርክብ ንምሕባእ ምስ ናይ ቀደም ጠበቕኡ ማይክል ኮሀን እንትዘራረብ ዝተቐድሐ ድምፂ ብ ሲኤንኤን ተፈኒዉ።

እታ ሞዴል፡ ዛንታ ምስ ትራምፕ ዝነበራ ርክብ ናሽናል ኢንኳይሪ ንዝበሃል ሚድያ ሸይጣትሉ ነይራ።

ዶናልድ ትራምፕን ማይክል ኮሀንን ዋንነት ናይዚ ዛንታ ካብቲ ትካል ንምዕዳግ እንትዘራረቡ ዝተቐድሐ ድምፂ እዩ ሕዚ ተፈኒዉ ዘሎ።

እቲ ድምፂ፡ ኣብ ወርሒ መስከረም 2016፡ ካብ መረፃ ክልተ ወርሒ ቀዲሙ ዝተቐድሐ እንትኾን፡ ርክብ ትራምፕን ካረንን ድማ ኣብ 2006 ዝነበረ እዩ።

• ኣሜሪካ ን3ቢልዮን ተወሳኺ ቐረጽ ቻይና ነቒፋ
• ፕረዚደንት ዓባስ፡ ውጥን ሰላም ትራምፕ ጽፍዒት እዚ ዘበን'ዩ ኢሉዎ
• ፈላሚ መደረ ዶናልድ ትራምፕ ተኾኒኑ

እታ ሞዴል ንዛንታኣ ብ 150,000 ዶላር ንናሽናል ኢንኳይሪ ከምዝሸጠቶ ይዝረብ።

ኣብቲ ብሲኤንኤን ዝተቓልሐ ድምፂ፡ ትራምፕ "ነዚ ክንደይ ክንከፍል ኣለና? ሚኢትን ሓምሳን?" ክብል ይስማዕ።

ናይ ሕዚ ጠበቃ ዶናልድ ትራምፕ ሩዲ ጁልያኒ ግን ዝተኸፈለ ገንዘብ የለን፡ እቲ ድምፂ'ውን እንተኾነ ዋላ ሓደ ገበን ንምፍፃሙ መረዳእታ ኣይኮነን ይብል።

ጁልያኒ ከምዝብሎ፡ እቲ ድምፂ ናይ ቀደም ጠበቓ ፕረዚደንት ትራምፕ ብሕቡእ ዝቐድሖ እዩ።

ፕረዚደንት ትራምፕ ኣብ ትዊተሩ፡ ንተግባር ናይ ቀደም ጠበቕኡ ነቒፉ፤ "ንዓሚሉ ድምፂ ዝቐድሕ እንታይ ዓይነት ጠበቓ እዩ'ዚ?" ብምባል።