ኣብ ሜክሲኮ ነፋሪት ክትለዓል እንከላ ተሓምሺሻ

ዝተሐምሸሸት ነፋሪት ኣብ ዱራንጎ፡ 31 ሓምለ 2018

ምንጪ ስእሊ, Protección Civil Durango/Twitter

ኣብ ሜክሲኮ ኣብ ርእሰ ከተማ ክልል ዱራንጎ 101 ሒዛ ዝነበረት ናይ ሰብ መጎዓዝያ ነፋሪት ክተለዓል እንከላ ከምዝተሓምሸሸት ቴሌቪዥን እታ ሃገር ገሊጹ።

ካብቶም ገያሾ ግን ወላ ሓደ ሰብ ከምዘይሞተ ኣማሓዳሪ እታ ከተማ ገሊጹ።

እቲ ኣማሓዳሪ ኣብ ትዊተር ገፁ ኣብ ዝጸሓፎ ሓበሬታ ካብቶም 101 ሰባት ዝኾነ ሞት ከምዘየጋጠመን፡ እንተኾነ ግን ከባቢ 85 ቀሊል መጉዳእቲ ከምዝበጽሖምን 2 ከኣ ብጽኑ ተጎዲኦም ከምዘለው ሓቢሩ።

እታ ነፋሪት ምስ ተላዕለት ድሕሪ ቁሩብ ደቃይቅ ጥቃ መዓልቦ ኣየር ተሓምሺሻ።

ሰብ-ስልጣን እታ ሃገር ካብቶም 97 ገያሾ ካልኦት 4 ሰራሕተናታት ነፈራትን፡ 37 ኣብ ሆስፐታል ሓገዘ እናተገበረሎም እንትኸውን፤ ካብኦም ድማ እቶም 2 ኣብ ጽኑዕ ኩነታት ከምዘሎው ሓቢሮም።

ምንጪ ስእሊ, AFP/KEVIN ALCANTAR DRONES DURANGO

እቶም ገያሾ ከበየናይ ሃገር ምዃኖምን ኣስማቶም ገና ኣይተነፀረን።

ኣቐዲሙ ዝወጸ ሓበሬታ ከምዝሓበሮ እቲ ሓደጋ ብሰንኪ ህቦብላ ዝተሓወሶ ከቢድ ዝናብ ከምዝኾነ ይዝረብ።

እታ ናይ መጎዓዝያ ነፋሪት ካብ ከተማ ጋዳሉፕ መዕርፎ ነፈርቲ ናብ ሜክሲኮ ሲቲ ተጎዓዝ ነይራ።

ምንጪ ስእሊ, EPA/Civil Protection State Coordination

ሓደ ካብቶም ተሳፈርቲ ንቴሌቪዥን እታ ዓዲ ኣብ ዝሃቦ ሓበሬታ እታ ነፋሪት ብሓያል ንፋስ ከምዝተወቕዓት ሓቢሩ።

እታ ነፋሪት ምስተሓምሸሸት ሽዑ ንሸዑ ብሐዊ ክትቓጽል ከምዝጀመረትን ምጥፋእቲ ሓዊ ባርዕ፡ ነቲ ሓዊ ኣብ ትሕቲ ቀጽጽር ከምዝኣተውዎን ተገሊጹ።

ፕረስደንት ሜክኪኮ ኤንሪከ ፕና ነቶ፡ ኩሎም መንግስታዊ ትካላት ዘድሊ ሐገዝ ክገብሩ መምሪሒ ኣመሓላሊፉ።

መዕርፎ ነፈርቲ ጋዳሉፐ ቪክቶርያ ድሕሪ እታ ሓደጋ ተዓጽዩ። .