ፍሉጥ ተኸታታሊ ፊልሚ 'ቢግ ባንግ ቲዎሪ' ክዛዘም'ዩ

ኣብ ነፍሲ ወከፍ ክፋል እቲ ድራማ ተዋሳእቲ 1 ሚሊዮን ዶላር ይኽፈሎም

ምንጪ ስእሊ, Getty Images

ፍሉጥ ተኸታታሊ ፊሊሚ ቴሌቪዥን ኣሜሪካ ቢግ ባንግ ቲዎሪ ኣብቲ ዝመጽእ ዓመት (2019) ክዛዘም'ዩ።

ኣብ ታሪክ 'ሲት ኮም' (ሓጺርን መስሓቕን ተኸታታሊ ድራማ) ኣሜሪካ ዝነዉሐ ክፍሊ ዘለዎ'ዩ ተባሂሉ።

ናይቲ ክፍሊ መበል 12 ክፋል ወርሒ መስከረም ጀሚሩ ወርሒ መጋቢት ክዛዘም'ዩ ተባሂሉ።

እዚ ፊልሚ፡ ክልተ ዶክተርን ሓንቲ ተዋሳኢት ፊልሚ ክትኸዉን እትደሊ ገጸ ባህርን ዘተኮረ መስሐቒ ፊልሚ'ዩ።

ኣብ 2016 ሻድሻይ ክፋል እቲ ፊልሚ እንትወጽእ፡ 18 ሚሊዮን ተኸታተልቲ ኣፍሪዩ'ዩ።

ምንጪ ስእሊ, Getty Images

ኣብ ነፍሲ ወከፍ ክፋል እቲ ተኸታታሊ ፊልሚ ቴሌቪዥን ድማ 18.6 ሚሊዮን ተኸተልቲ ኣለዉዎ።

እዚ ኣብ ኣሜሪካ እቲ ዝዓበየ ተኸታታሊ ምፍራይ ዝኸኣለ ፊልሚ ቴሌቪዥን'ዩ።

ኣዳለዉቲ እቲ ፊልሚ ብሓባር ኣብ ዝሃቡዎ መግለጺ ፡"ንፈተዉትና ነመስግን" ኢሎም።

ፊልሚ ቢግ ባንግ ቲዎሪ 46 ግዘ ንግራሚ ዝተሓጸየ እንትኾን፡ ሼልደን ኩፐርን ወኪሉ ዝጻወት መሪሕ ተዋሳኢ እቲ ፊልሚ ጂም ፓርሰን ኣርባዕተ ሽልማት ተቐቢሉ'ዩ።

ምንጪ ስእሊ, Getty Images

ተዋሳእቲ እቲ ፊልሚ ጆኒ ጋሌስኪ፣ ሲሞን ሄልበርግ፣ ኩናል ናያርና ኬሊ ኩዎኮ እዮም።

ቅድሚ ክልተ ዓመት፡ እዞም ተዋሳእቲ ኣብ ሓደ ክፋል እቲ ፊልሚ ጥራሕ ሓደ ሚሊዮን ዶላር ተኸፊሉዎም'ዩ።

ንተዋሳእቲ ዝኽፈል ገንዘብን ንነዊሕ ዓመታት ስለዝተርኣየን፡ ቐጻሊ ክፋል ምድላዉ ኽቡር ስለዝኾነ'ዩ ክዛዘም ዝተሓሰበ ዝብሉ ግምታት ይወሃቡ ኣለዎ።