ኣብ ቀላይ ቦትስዋና ኣማኢት ቡፋሎ ጥሒሎም

ናይ ብዕራይ በረኻ ስጋ ዝሓዘት ነባሪት Image copyright Serondela Lodge

ኣብ ዶብ ቦትስዋናን ናሚብያን ዝርከብ ገማግም ወሓዚ ኣማኢት ቡፋሎ ጥሒሎም ተረኺቦም።

እቶም ቡፋሎ ካብ ሃድን ኣናብስ ክሃድሙ ናብ'ቲ ቀላይ ኣትዮም ከምዝጠሓሉ ተገሊጹ።

ሓደ ወናኒ ሆቴል ንቢቢሲ ከም ዝሓበሮ፡ እቶም ቡፋሎ ሰንቢዶም እናተደፋፍኡ ናብ'ቲ ዝዓሞቐ ክፋል እቲ ወሓዚ ስለዝኣተዉ እዮም ጥሒሎም ኢሉ።

ኣብ ሂወቱ ክንድኦም ዝብዝሖም ቡፋሎ ክጥሕሉን ክሞቱን ሰሚዑን ርእዩን ከምዘይፈልጥ እውን ብምግራም ገሊጹ።

በቲ ሓደጋ ብገምጋም 400 ዝኾን ቡፋሎ ከም ዝሞቱ ሰበስልጣን ቦትስዋና ሓቢሮም።

ነበርቲ እቲ ከባቢ፡ ክፋላት ሰብነት እቶም ቡፋሎ እናቖረጹ ንገዝኦም ብምውሳድ ይምገብዎም ኣለው።

Image copyright Serondela Lodge

እቲ ሩባ ብቐጥታ ናብ ሃገራዊ ፓርክ ኮበ ዝውሕዝ ኮይኑ፡ መስሕብ በጻሕቲ (ቱሪስት)ን ፡ ብብዝሒ ሓራምዝ፡ ቡፋሎን ዝርከቡሉ ቦታ'ዩ።

ሚኒሰትሪ ከባቢ ቦትስዋና፡ ኣብ ዘውጸኦ መግለጺ ከም'ዚ ዓይነት ተርእዮ ልሙድ'ዩ እኳ እንተበሉ፤ ነበርቲ እቲ ከባቢ ግን፡ ቅድሚ ሕጂ ክሳብ 50 እንተዘይኮይኑ። ክንድ'ዚ ዝብዝሖም ሰሚዕናን ርኢናን ኣይንፈለጥን ይብሉ።

ሰበስልጣን እታ ሃገር ነበርቲ እቲ ከባቢ ነቲ ስጋ ወሲዶም ክምገብዎም ፍቓድ ብምሃቦም፤ ኩሉ ሰብ ስጋ ንገዝኡ ንምውሳድ ይጓየ ምህላው፤ ብተዓዘብቲ ዝተሰነዱ ስእልታት ይምስክሩ።

ተመሳሳሊ ዛዕባታት