ትዊተር፡ ናይ ፕሬዝደንት ፑቲን'ዩ ዝበሃል ዝነበረ ገጽ ከም ዝዓጸወ ኣፍሊጡ

ቭላድሚር ፑቲን/ትዊተር Image copyright Getty Images/PA

ትዊተር፡ ብስም ፕሬዝደንት ሩሲያ ቭላድሚር ፑቲን ብቋንቋ ኢንግሊዘኛ ሓበሬታ ዝህብ ዝነበረ ናይ ትዊተር ገጽ ዓጽዩ።

እዚ ማሕበራዊ ሚዲያ "ካብ ሰበ ስልጣን ሩሲያ ብመሰረት ዝተረኸበ ጥሉል ሓበሬታ'ዩ ተዓጽዩ" ድማ ኢሉ።

እቲ ገፅ ኣብ 2012 ዝተኸፈተ ኮይኑ፡ ምስ ፕሬዝደንት ፑቲን ርክብ ናይ ዘለዎም ሰበ ስልጣን ፍጻሜታት ክጥቅዕ ጸኒሑ'ዩ።

ኣብቶም ዝሓለፉ ሽዱሽተ ዓመታት፡ ሓደ ሚሊዮን ዝጽግዑ ሰዓብቲ ኣፍርዩ። መብዛሕትኦም ድማ ሓቃዊ'ዩ ዝብል እምነት ኣለዎም።

ትዊተር ከምዝበሎ ግና፡ ካብ ሓለፍቲ ስራሕ መንግስቲ ሩሲያ ብዝረኸቦ ማዕዳ፡ "ሓደ ሰብ ብዘደናግር ወይ'ውን ብተዘዋወሪ መገዲ ሓበሬታ ዘሕልፍ ናይ ትዊት መጥቀሚ ክዕጾ ኣለዎ"።

ክሳብ ሕዚ ግና፡ እዚ ብ@putinRF_eng ዝፍለጥ ገጽ መን ከምዝጥቀመሉ ኣይተፈለጠን።

ትዊተር ብኸምዚ ዓይነት ስኑዕ ናይ ትዊተር ገጽ ክታለል ከሎ ንፈለማ እዋን ኣይኮነን።

ቅድም ኢሉ'ውን ብኣሜሪካዊ በዓል ሃብቲ ዋረን ቡፌር ዝተኸፈተ ገፅ፡ ንመናእሰይ ብዝተጽሓፈ መለዓዓሊ ማዕዳ 2 ሚሊዮን ላይክ ረኺቡ ነይሩ።

ኮይኑ ግና ኣብ ኣጸሓሕፋ ፊደላት ቡፌት ክፍተት ዝነበሮ ብምዃኑ፡ ስኑዕ ናይ ትዊተር ገጽ ከም ዝነበረ ክፍልጥ ኽኢሉ።

ተወሳኺ ዛንታ