ፔሩ፡ ኣብ ስነስርዓት መርዓ መሬት ብምህማሙ 15 ሰባት ሞይቶም

ኣብ ፔሩ ሆቴል ኣላሃምብራ ዘጋጠመ ምህማም መሬት Image copyright National Civil Defence Institute (Indeci)
ናይ ምስሊ መግለጺ ኣብ ፔሩ ሆቴል ኣላሃምብራ ዘጋጠመ ምህማም መሬት

ኣብ ደቡባዊ ምብራቕ ፔሩ፡ ኣብ ሓደ ስነስርዓት መርዓ ዝካየደሉ ዝነበረ ሆቴል መሬት ብምህማሙ ብውሕዱ ዓሰርተ ሓሙሽተ ሰባት ምሟቶም ሰብ መዚ ፔሩ ሓቢሮም።

ውሑጅን ጭቃን ከምኡ ከኣ ኣኻውሕ ናብቲ ሆቴል ብምንሽርታቱ መንደቕ ናይቲ ሆቴል ሰጊሩ ነቶም ዝጉይሉ ዝነበሩ ኣጋይሽ ከምዝጸቐጦም ዝተዛረቡ ሰብ መዚ፡ ካልኦት ዕስራ ትሽዓተን'ውን ተሃስዮም ምህላዎም ሓቢሮም።

ማዕከናት ዜና ፔሩ ከም ዝሓበረኦ፡ እዚ ክስተት፡ ኣብቲ ከባቢ ብርቱዕ ዝናብ ድሕሪ ምህራሙ'ዩ ኣጋጢሙ ኢለን።

ኣብቲ ኣልሃምብራ ዝብሃል ሆቴል፡ ኣብቲ መርዓ ንምስታፍ ኣስታት 100 ዕዱማት ከም ዝነበሩ ሓላፊ ምክልኻል ሓደጋታት ጆርጅ ቻቨዝ ንማዕከናት ዜና ፔሩ ክሕብር እንከሎ፡ "ኣስታት 50 ዝኾኑ ኣብቲ ፈሪሱ ዘሎ መንደቕ ተደብዮም ይህልዉ'ዮም" ኢሉ።

ካልእ በዓል መዚ ድማ፡ ኣብ ውሽጢ ተደብዮም ዘለዉ ንምድሓን ዝክኣሎም ይገብሩ ከም ዘለዉን እቶም ዝድሓኑ ኣብ ሆስፒታላት ምሉእ ክንክን ይግረሎም ከም ዘሎን ሓቢሩ።

ማዕከናት ዜና ፔሩ፡ ሆቴል ኣልሃምብራ ኣብ ጸድፊ ዝተደኮነ ከም ዝኾነን፡ እቲ ዝፈረሰ መንደቕ ካብቲ ጎቦ ንዝመጽእ መደራጋሕ ንምክልኻል ተባሂሉ ዝተሰርሐ ከም ዝነበረን ሓቢረን።