ቀዳማይ ሚንስትር ኣውስትራልያ ስኮት ማሪሰን፡ ጎስጓስ የካየድ ኣብ ዝነበረሉ ብእንቋቑሖ ተወቒዑ

ስኮት ማሪሰን Image copyright EPA
ናይ ምስሊ መግለጺ ስኮት ማሪሰን ንመረፃ ኣወስትራልያ ኣመልኪቱ ጎስጓስ እናካየደ'ዩ እንቋቖሖ ተደርብዩሉ

ቀዳማይ ሚንስትር ኣወስትራልያ ስኮት ማሪሰን፡ ኣብ ቅድሚኡ ንዝፅበዮ ሃገራዊ መረፃ ጎስጓስ የካይድ ኣብ ዝነበረሉ እዋን፡ ካብ ሓንቲ ተቓዋሚት ብዝተደርበየት እንቋቑሖ ተወቒዑ።

ማዕኸናት ዜና ኣወስትራልያ፡ እታ ንርእሲ ቀዳማይ ሚንስትር ስኮት ዝወቐዐት እንቋቖሖ ከም ዘይተሰበረት ሓቢረን።

በቲ ተግባር ዝተጠርጠረት፡ ጓል 25 ዓመት መንእሰይ ከም ዝኾነትን፡ ኣብ ቀይዲ ከም ዝወዓለትን ፖሊስ ኣፍሊጡ።

እቲ ቀዳማይ ሚንስትር ነቲ ተግባር 'ጃጃዊ' ክብል ገሊፅዎ።

ብማሕበር ደቂ ኣንስትዮ ኣወስትራልያ ኣብ ዝተዳለወ መድረኽ'ዩ እቲ ተግባር ተፈፂሙ።

ቀዳማይ ሚንስትር ስኮት ማሪሰን፡ ኣባላት ፀጥታ፡ ነቲ ፍፃመ ንዝሃብዎ ቅልጡፍ ግብረ-መልሲ ንኢዱ።

ኣብ ኣወስትራልያ፡ ስኮት፡ ፈላማይ ግዳይ ማህረምቲ እንቋቖሖ ኣይኮነን።

ኣብ ዝሓለፈ ወርሒ መጋቢት'ውን ኣባል ባይቶ ዝኾነ ፍሬዘር ኣኒንግ፡ ነቲ ኣብ ኒውዚላንድ 'ክራይስት ቸርች' ዝተፈፂመ መጥቃዕቲ ኣመልኪቲ ንዝሃቦ ርእይቶ ስዒቡ፡ ግዳይ እንቋቖሖ ኮይኑ'ዩ።

ኣወስትራልያውያን ኣብ ዝመፅእ 18 ግንቦት ኣብ ዝካየድ ሃገራዊ ምርጫ፡ ከድምፁ እዮም።

ተመሳሳሊ ዛዕባታት