ላዕለዋይ ቤት ፍርዲ ኣሜሪካ፡ ትራምፕ ንሓጹር ዘድልዮ ገንዘብ ክጥቀም ኣፍቂዱ

ናይ ዶብ ሓጹር Image copyright EPA

ፕረዚደንት ዶናልድ ትራምፕ ነቲ ንገለ ክፋል ደቡባዊ ዶብ ንምሕጻር ዘድልዮ 2.5 ቢልዮን ዶላር ካብ ባጀት ፔንታጎን [ቤት ጽሕፈት ምክልኻል ኣሜሪካ] ክጥቀም ከም ዝኽእል ላዕለዋይ ቤት ፍርዲ ኣሜሪካ ኣፍሊጡ።

እቲ ላዕለዋይ ቤት ፍርዲ፡ ነቲ ኣቐዲሙ ብፈደራል ዳኛ ግዝኣት ካሊፎርንያ ዝሓለፈ ብይን፡ ትራምፕ ነቲ ገንዘብ ኣብቲ ሓጹር ከየውዕሎ ዝኽልክል ውሳነ፡ ሓሙሽተ ብኣርባዕተ ድምጺ እዩ ኣጊድዎ።

እቲ ንኣሜሪካን ሜክሲኮን ዝፈላልይ ሓጹር፡ ፕረዚደንት ትራምፕ ኣብ እዋን ምርጫ 2016 ቀንዲ ዝጉስጉሰሉ ዝነበረ ዛዕባ እዩ።

ሰልፊ ደሞክራትስ ግና ነዚ ኣትሪሮም እዮም ዝቃወምዎ።

ብመሰርት እዚ ውሳነ ላዕለዋይ ቤት ፍርዲ፡ እቲ ገንዘብ ኣብ ግዝኣታት ካሊፎርንያ፡ ኣሪዞናን ኒው መክሲኮን ነቲ ምስ መክሲኮ ዘዳውብ መስመራት ንምሕጻር ክውዕል እዩ።

ቤት ፍርዲ ካሊፎርንያ ግና፡ ባይቶ ኣሜሪካ ነቲ ገንዘብ ንሓጹር ኢሉ ኣየጽደቖን ብምባል እዩ ክቃወም ጸኒሑ።

ፕረዚደንት ትራምፕ፡ ነቲ ውሳነ ኣመልኪቱ ኣብ ትዊተር ኣብ ዝጸሓፎ ጽሑፍ "ዓቢይ ዓወት" ክብል ገሊጽዎ።

ካብ ሆንዱራስን ኤል ሳልቫዶርን ተበጊሶም ብጓቴማላ ዝሓልፉ ስደተኛታት ናብ ኣሜሪካ ቅድሚ ምቕጻሎም ኣብ ጓቴማላ ዑቕባ ክሓትቱ ዝገብር ስምምዕ ብዓርቢ፡ ኣብ መንጎ ኣሜሪካን ጓቴማላን ተኸቲሙ ኣሎ።

ወሃቢት ቃል ባይቶ ኣሜረካ ናንሲ ፔሎሲ "እዚ ናይ ሎሚ ምሸት ውሳነ ላዕለዋይ ቤትፍርዲ፡ ዶናልድ ትራምፕ ካብ ሰራዊት ገንዘብ ክሰርቕን፡ ጥቅሚ ኣብ ዘይብሉ ብባይቶ ኣብ ዝተነጽገ ሓጹር፡ ንብላሽ፡ ከውዕሎ ዘፍቅድ'ዩ። ኣቦታትና ብህዝቢ ዝምራሕ ደሞክራሲ እምበር ሞናርክነት (ንግስና) ኣይነደፉን" ኢላ።

ፕረዚደንት ትራምፕ ኣብ ፈለማ ናይዚ ዓመት፡ ንሃገራዊ ድሕነት፡ ነቲ ሓጹር ንምስራሕ 6.7 ቢልዮን ዶላር ከም ዘድልዮ ብምግላጽ ናይ ሕጹጽ ግዜ ኣዊጁ እዩ። እቲ ኣሃዝ ግና ካብቲ ነቲ 3,200ኪሜ ሓጹር ንምህናጽ ዘድሊ ኣብ ፈለማ ዝተገመተ 23 ቢልዮን ዶላር፡ ኣዝዩ ዝተሓተ እዩ።

ተወሳኺ ዛንታ