መንግስቲ ኢትዮጵያ ክብረ ወሰን ምትካል ፈልሲ ሰይረ ኢሉ

ቀዳማይ ሚኒስተር ኣብይ ኣሕመድ ዝርከቦም ላዕለዎት ሓለፍቲ ኣግራብ እናተኸሉ

ትማሊ፡ ኢትዮጵያ ኣብ ሓደ መዓልቲ ልዕሊ 350 ሚልዮን ፈልሲ ብምትካል ክብረ ወሰን ከም ዝሓዘት መንግስቲ ሓቢሩ።

እዚ ብቀዳማይ ሚኒስተር ኣብይ ኣሕመድ ተመሪሑ ዝተኻየደ ምትካል ፈልሲ፡ ንክሌማዊ ለውጥን (ለውጢ ኩነታት ኣየር) ኣንጻር ብርሰት ኣግራብን ዓሊሙ'ዩ ተኻይዱ።

እዚ ዕላማ ተግባራዊ ንምግባር ብዙሓት ህዝባዊ ኣገልግሎት ዝህባ ቤት ጽሕፈታት ኣብዚ 'ሓምላይ ኣሰር' ዝተሰምየ ወፍሪ ንምስታፍ ቤት ጽሕፈታተን ዓጽየን ውዒለን።

ጸብጻብ ውዱብ ሕቡራት ሃገራት ከም ዘርእዮ፡ ኣብ 20 ክፍለ ዘመን ልዕሊ 35 ሚእታዊት ብኣግራብ ተሸፊኑ ዝነበረ መሬት ኢትዮጵያ ድሕሪ 2000 ዓመተ ምህረት ናብ 4 ሚእታዊት ከም ዝወረደ እዩ ዝሕብር።

ነቲ ብወለንታውያን ዝተተኸለ ፈልሲ ገረብ ዝቆጻጸሩን ዝቖጽሩን ሓለፍቲ ከም ዝተመደቡ፡ ኣብ ኣዲስ ኣበባ ዝርከብ ወኪል ዜና ቢቢሲ ሓቢሩ።

ሚኒስተር ምህዞን ቴክኖሎጅን ኢትዮጵያ ዶክተር ጌታሁን ሞክርያ ኣብ 12 ሰዓታት ልዕሊ 350 ሚልዮን ፈልሲ ኣግራብ ከም ዝተተኸለ ብትዊተሩ ሓቢሩ።

ዕላማ እዚ 'ሓምላይ ኣሰር' ብጥቕላላ ኣርባዕተ ቢልዮን ኣግራብ ምትካል እዩ።

ልኡኽ ዜና ቢቢሲ ካብ ኢትዮጵያ፡ ሰባት ኣግራብ ክከናኸኑን ክተኽሉን ዝጉስጉስ መዳባት ኣብ መንግስታዊት ተሌቪዝን እታ ሃገር ከመሓላለፍ ከም ዝቐነየ ሓቢሩ።

ኣብዚ መደብ ምትካል ፈልሲ፡ ኣብ ኢትዮጵያ ዝርከቡ ኢምባሲታት፡ ኣባላት ውድብ ሕቡራት ሃገራትን ውድብ ሓድንት ኣፍሪቓን ከም ዝተሳተፉ ተገሊጹ።

ኣብ ህንዲ፡ ኣብ 2016 ኣብ ሓደ መዓልቲ ብ800,000 ወለንተኛታት ዝተኻየደ ናይ 50 ሚልዮን ምትካል ፈልሲ ናይ ዓለም ክብረ ወሰን ሒዙ ጸኒሑ'ዩ።

ንኣካይዳ ቀዳማይ ሚኒሰተር ኣብይ ኣሕመድ ብዓይኒ ነቐፌታ ዝጥምቱ ግን እዚ ናይ ፈልሲ ጎስጓስ፡ ነቲ ኣብታ ሃገር ኣጋጢሙ ዘሎ ልዕሊ 2.5 ሚልዮን ህዝቢ ካብ ቤት ንብረቶም ዝተፈናቐልሉ ዓሌታዊ ግጭት ኣንፈቱ ንምቕያር ዝጥቐመሉ ዘሎ እዩ እዮም ዝብሉ።

ትጥቀምሉ ዘለኹም መሳርሒ ኣይተቐበሎን።
ቀዳማይ ሚኒስትር ኣብይ ኣሕመድ መን'ዩ?

ተወሳኺ ዛንታ