ጂሃዳዊ ጉጅለ ዳዕሽ፡ ሓድሽ መራሒ ረቝሑ

ኣልባቕዳዲ ዝሞተሉ ከባቢ Image copyright AFP

ጂሃዳዊ ጉጅለ ዳዕሽ፡ ሞት መራሒ እቲ ጉጅለ ዝነበረ ኣቡበከር ኣልባቕዳዲ ብምእማን፡ ንዕኡ ዝትክኦ ሓዲሽ መራሒ ከም ዝረቝሐኣፍሊጡ።

እቲ ጉጅለ ብዝጥቀመሉ ማሕበራዊ ሚድያ ቴሌግራም ኣቢሉ፡ ዓብዱ ኢብራሂም ሃሸሚ ኣል-ቑራይሺ ሓድሽ መራሒ እቲ ጉጅለ ከም ዝኾነ ሓቢሩ።

ሓይልታት ኣሜሪካ፡ ኣብ ሰሜን ምዕራብ ሶርያ ኣብ ዝርከብ መንበሪ ኣልባቕዳዲ ብዝፈጸሙዎ ስርሒት፡ ኣብ ትሕቲ ገዛ ተኳዒቱ ናብ ዝነበረ ጎድጓድ ብምኻድ ዓርሰ ቕትለት ከም ዝፈጸመ ይግለጽ።

ኣቡበከር ኣል-ባቕዳዲ፡ መራሒ ናይ'ቲ ኣብ ሶርያ፡ ዒራቕን ሊብያን ከምኡ'ውን ኣብ ዝተፈለለዩ ከባቢታት ዓለም ዝንቀሳቐስ ጂሃዳዊ ጉጅለ ዳዕሽ እዩ ነይሩ።

ኣይኤስ ብድምጺ ኣብ ዘሕለፎ መልእኽቲ፡ ወሃቢ ቃል እቲ ጉጅለ ዝነበረ፡ ኣቡ ኣል-ሓሳን ኣል-ሙሃጂር፡ ብ27 ጥቅምቲ ብምትሕብባር ኣሜሪካን ኩርዳውያንን ከም ዝተቐትለ ገሊጹ።

እዚ ስዑዳዊ ዜግነት ዝነበሮ ውልቀሰብ፡ ንኣልባቕዳዲ ክትክኦ'ዩ ተባሂሉ ይእመን ነይሩ።

ሓድሽ ወሃቢ ቃል ኣይኤስ ኣቡ ሃማዝ ኣል-ቁራያሺ፡ ኣስላም ንትእዛዝ ሓድሽ መራሒ እቲ ጉጅለ ከቕበሉን ከኽብሩን ጸዊዑ ኣሎ።

Image copyright US Department of Defense/Reuters
ናይ ምስሊ መግለጺ ኣቡበከር ኣልባቕዳዲ፡ ሓይልታት ኣሜሪካ ኣብ ሰሜን ምዕራብ ሶርያ ምስ ረኸቡዎ ንርእሱ ኣጥፊኡ

መራሒ ዕጡቕ ጉጅለ ዳዕሽ ኣቡበከር ኣል-ባቕዳዲ መን እዩ?

ኣቡበከር ኣል-ባቕዳዲ፡ መራሒ ናይ'ቲ ኣብ ሶርያ፡ ዒራቕን ሊብያን ከምኡ'ውን ኣብ ዝተፈለለዩ ከባቢታት ዓለም ዝንቀሳቐስ ግብረ-ሽበራዊ ጉጅለ ዳዕሽ እዩ።

ንሱ ኣብ ዓለምና ቁጽሪ ሓደ ተሃዳኒ ሰብ ኮይኑ ጸኒሑ።

ኣብ ወርሒ ጥቕምቲ 2011፡ ኣመሪካ፡ ነቲ ብትውልዱ ዒራቓዊ ምዃኑ ዝንገረሉ መራሒ ንምሓዝ ወይ ንምቕታል ናይ 10 ሚልዮን ዶላር ጉንዖ ኣዳልያ ከምዝጸንሐት ይፍለጥ።

ኣብ ማእከላይ ምብራቕ ሓዳስ እስላማዊት ሃገር ናይ ምምስራት ሕልሚ ከምዝነበሮ ዝንገረሉ ኣል-ባቕዳዲ፡ ኣብ ዓወደ ውግእ ከም ጨካንን ንሕስያ ከምዘይብሉን እዩ ዝግለጽ።

ንሱ፡ ብ1971 ኣብ ጥቓ ሳማራ እትበሃል ከተማ ዝተወልደ ኮይኑ፡ እቲ ቅኑዕ ሽሙ ኢብራሂም ኣውድ ኣል-ባድሪ እዩ።

ኣቡበከር ኣል-ባቕዳዲ፡ ኣብ 2003 ብኣሜሪካ ዝምራሕ ልፍንቲ ንዒራቕ ክወራ እንከሎ፡ ኣብ መስግድ ከም ሸክ ኮይኑ የገልግል ከም ዝነበረ ይንገረሉ።

ተወሳኺ ዛንታ