ኣብ ሱዳን ኣብ ሓደ ፋብሪካ ሴራሚክ ዝተወለዐ ባርዕ፡ ብውሕዱ 23 ሰባት ቀቲሉ

ፋብሪካ እናተቓጸለ፡ ካርቱም 03 ታሕሳስ 2019 Image copyright AFP

ኣብ ሱዳን፡ ኣብ ፋብሪካ ሴራሚክ ብዝተወለዐ ባርዕ ሓዊ ብውሕዱ 23 ሰባት ክሞቱ እንከለዉ፡ ካልኦት 130 ከምዝቖሰሉ መንግስቲ ገሊጹ።

እቲ ሓደጋ፡ ኣብ ርእሰ ከተማ ካርቱም ዝርከብ ፋብሪካ ሴራሚክ ብርቱዕ ነታጒ ድሕሪ ምስምዑ ዝሰዓበ ምዃኑ ማሕበር ሓካይም ሱዳን ኣፍሊጡ።

ሰራሕተኛታት ሂወት ኣድሕን፡ ንግዳያት እቲ ሓደጋ ንምርካብ ይሰርሑ ከም ዘለዉ ጸብጻባት ካብታ ከተማ ሓቢሮም።

መንግስታዊ ቴሌቭዥን እታ ሃገር፡ "ኣብ ሰብን ንብረትን ከቢድ ኪሳራ ወሪዱ" ክትብል ኣቃሊሓ።

ጠንቂ ናይቲ ሓደጋ፡ ሓደ ናይ ነዳዲ ገንኢ ምስ ተባረዐ ዝተልዓለ ከምዝኾነ መግለጺ እቲ መንግስቲ ኣመላኺቱ።

Image copyright AFP
ናይ ምስሊ መግለጺ ሰራሕተኛታት ሂወት ኣድሕን፡ ንግዳያት እቲ ሓደጋ ንምርካብ ይሰርሑ ኣለዉ

"እቲ ነታጒ ብርቱዕ'ዩ ነይሩ። ሓያሎ ኣብ ቀጽሪ ናይቲ ፋብሪካ ዝነበራ መካይን'ውን ተቓጺለን'የን" ክብል ሓደ ኣብቲ ከባቢ ኣብ ዝርከብ ፋብሪካ ዝሰርሕ ሰራሕተኛ ንኤ ኤፍ ፒ ተዛሪቡ።

ሰራሕተኛታት ኣምቡላንስ፡ ንግዳያት ናብ ሆስፒታል የብጽሑ ከም ዘለዉን፡ ቁጽሪ ናይቶም በቲ ሓደጋ ዝሞቱ ክውስኽ ከም ዝኽእልን ተገሊጹ።

ተመሳሳሊ ዛዕባታት