ኢንተርኔት ብምዕጻው ዝፍለጣ ሃገራት ዓለም ክንደይ ዝኣክል ከሲረን?

ኢትዮጵያን ጨምሮ ኢንተርኔት በመዝጋት 'የከሰሩ' ሃገራት Image copyright Getty Images

ኣብ ዝሓለፈ ዓመት፡ ኢንተርኔት ብምዕጻወን ናይ ዝኸሰራ ሃገራት ዝርዝር ዘቕረበ ትካል መጽናዕቲ ኔት ብሎክ፡ ብደረጃ ዓለም 8 ቢልዮን ክሳራ ከምዘጋጠመ ሓቢሩ።

ኣብቲ ዓመት ብዝተፈላለየ ምኽንያታት ኢንተርኔት ዝዓጸዋ ሃገራት ቁጽረን ካብ ካልእ እዋናት ዝዛየደ ምዃኑ'ውን ኣፍሊጡ።

ብመሰረት ውጽኢት እቲ መጽናዕቲ፡ ኣብ ዝተፈላለያ ሃገራት 122 ግዜ ኣገልግሎት ኢንተርኔት ተቛሪጹ። ብሰዓታት ክግለጽ እንከሎ ከኣ 22 ሽሕ ኮይኑ'ሎ።

መንግስታት ናይተን ኣብቲ መጽናዕቲ ዝተኻተታ ሃገራት፡ ብደረጃ ሃገር ይኹን ክልል፡ ኮነ ኢሎም እቲ ኣገልግሎት ከምዝቋረጽ እዮም ገይሮም።

እቲ ኢንተርነት ዘጥፍኡሉ ቀንዲ ምኽንያት ድማ ዓማዊል ካብ ፌስቡክን ካልኦት ማሕበራዊ መራኸብታትን ከምዝርሕቑ ንምግባር'ዩ።

ፌስቡክ፣ ዋትስኣፕ፣ ትዊተር፣ ዩቲዩብን ካልኦትን እንተተኣገዱ'ኳ ዓማዊል ግን 'ቪፒኤን' እናተጠቐሙ ክረኽብዎም ከምዝኸኣሉ እቲ ትካል ሓቢሩ።

መብዛሕቲኦም ምኽንያት ምቁራጽ ኣገልግሎት ድማ ምስ ተቓውሞታትን ዘይምርግጋእን ዝተሓሓዙ ምዃኖም ኣረዲኡ።

ሃገራት ማእኸላይ ምብራቅን ሰሜን ኣፍሪቃን ኢንተርኔት ብምዕጻው ኣብ ቅድሚት ይስርዓ። ሃገራት ትሕቲ ሰሃራ ድማ ይስዕበአን። እስያ ኣብ ሳልሳይ፤ ደቡብ ኣሜሪካ ራብዓይ ይርከባ።

እቲ ትካል መጽናዕቲ ኢንተርኔት ብምዕጻው ኣብ ዝሰርዐን ሃገራት ንኢትዮጵያ መበል 12 ኣቐሚጥዋ'ሎ።

ደረጃ ዝርዝር ስም ሃገራት ዝኸሰርኦ ገንዘብ [ብዶላር] ቁጽሪ ተጠቀምቲ ኢንተርኔት
1 ዒራቕ 2.3 ቢሊዮን ዶላር 18.8 ሚሊዮን
2 ሱዳን 1.8 ቢሊዮን ዶላር 12.5 ሚሊዮን
3 ህንዲ [ውሱናት ከባብታት] 1.3 ቢሊዮን ዶላር 8.4 ሚሊዮን
4 ቬንዝዌላ 1 ቢሊዮን ዶላር 20.7 ሚሊዮን
5 ኢራን 611 ሚሊዮን ዶላር 49 ሚሊዮን
6 ኣልጄሪያ 200 ሚሊዮን ዶላር 19.7 ሚሊዮን
7 ኢንዶኔዥያ 188 ሚሊዮን ዶላር 29.4 ሚሊዮን
8 ቻድ 125 ሚሊዮን ዶላር 1 ሚሊዮን
9 ስሪላንካ 84 ሚሊዮን ዶላር 7.1 ሚሊዮን
10 ምያንማር [ውሱናት ከባብታት] 75 ሚሊዮን ዶላር 100 ሽሕ
11 ዴሞክራቲክ ሪፐብሊክ ኮንጎ 61 ሚሊዮን ዶላር 7 ሚሊዮን
12 ኢትዮጵያን 57 ሚልዮን ዶላር [1.8 ቢሊዮን ብር] 19.5 ሚሊዮን

ዚምባብወ፣ ሞሪታኒያ፣ ፓኪስታን፣ ግብፅ፣ ካዛኪስታን፣ ቤኒን፣ ጋቦን፣ ላይቤሪያን ካልኦት ሃገራትን ኣብቲ ዝርዝር ይርከባ።

ኤርትራ ድማ ኣብ መበል 20 ተሰሪዓ'ላ።

Image copyright NurPhoto

ዋትሳብ እቲ ኣብ ዝበዝሓ ሃገራት ዝተዓጸወ ኮይኑ፤ ፌስቡክ፣ ኢንስታግራም፣ ትዊተርን ዩቱዩብን ብቐደም ሰዓብ ይስርዑ።

ኢትዮጵያ

ኣብ ዝሓለፈ ዓመት ጥራይ ን274 ሰዓታት ኣገልግሎት ኤንተርኔት ክቋረጽ ገይራ'ያ። ብፍላይ ኣብ ወርሒ ሰነ [ላዕለዎት ጀነራላትን ሰበስልጣን ክልል ኣምሓራን ኣብ ዝተቐተሉሉ] እቲ ኣገልግሎት ንዝተወሰኑ መዓልታት ምሉእ ብምሉእ ተቛሪጹ ነይሩ።

ሃገራዊ ፈተና ኣብ ዝህሉ'ውን ኣብ ዝተፈላለዩ ከባብታት እታ ሃገር ተቛሪጹ'ዩ። እንተኾነ መንግስትን ኢትዮ-ቴሌኮምን ወግዓዊ መግለጺ ኣይሃቡን።

ተወሳኺ ዛንታ