ኮሮናቫይረስ፡ ሰልፈኛታት ዩክሬን ካብ ቻይና ዝመጹ ጥርጡራት ዝሓዛ ኣውቶቡሳት ኣጥቂዖም

ኣእማን ዝድርብዩ ሰልፈኛታት

ምንጪ ስእሊ, Reuters

መግለጺ ስእሊ,

ሰልፈኛታት ኣብ ልዕሊ እተን ጥርጡራት ኮሮናቫይረስ ዝጸዓና ኣውቶቡሳት ኣእማን ደርብዮም

ኣብ ዩክሬን፡ ካብ ቻይና ዝገዓዙ ጥርጡራት ኮሮና ቫይረስ ዝጸዓና ኣውቶቡሳት ብሰልፈኛታት ተጠቒዐን።

እቶም ካብ ቻይና ዝገዓዙ ተጠርጠርቲ፡ ን14 መዓልቲታት ናብ ዝዳጎንሉ ኣብ ኖቪ ሳንዛሪ ናብ ዝርከብ ሆስፒታል እዮም ዝውሰዱ ነይሮም።

ብዙሓት ነበርቲ፡ እቲ ቫይረስ ናብታ 10 ሽሕ በዝሒ ዝነብረላ ከተማ ከይላባዕ ስግኣት ኣለዎም።

ፕረዚደንት ዩክሬን ቭላድሚር ዘለንስኪ ግን፡ "ኩለና ደቂ ሰባት ኢና" ብምባል እቶም ነበርቲ ክትሓባበሩን ሰብኣዊነት ከርእዩን ጸዊዑ ኣሎ።

ትማሊ ሓሙስ 45 ዩክሬናውያንን 27 ወጻእተኛታትን፡ ካብታ ዋና ማእከል እቲ ቫይረስ ዝኾነት ቻይናዊት ከተማ ዉሃን ተበጊሶም፡ ኣብ ምብራቒ ዩክሬን ናብ እትርከብ ከተማ ካርኪቭ ኣትዮም።

እቶም ኣጋይሽ ብሽዱሽተ ኣውቶቡሳት ተጻዒኖም ናብ ሆስፒታል እንትውሰዱ፡ ሓዊ ዘንድዱን እእማን ዝድርብዩን ሰባት ኣብ መንገዲ ጠጠው ኣቢሎምዎም።

ምንጪ ስእሊ, Reuters

መግለጺ ስእሊ,

ፖሊስ ነቶም ሰልፈኛታት ብምብታን እቶም ኣጋይሽ ናብ ሆስፒታል ክኣትዉ ገይሩ

ካብቶም ኣጋይሽ ዋላ ሓደ በቲ ቫይረስ ዝተጠቐዐ ሰብከምዘየለ ዝተገለጸ ኮይኑ፡ ልዑል ረስኒ ተራእዩዎም ዝተብሃሉ ሰለስተ ዩክሬናውያንን ሓደ ካዛኪስታናውን ግን ኣብ ከተማ ውሃን ክተርፉ ከምዝተገበረ ተገሊጹ።

ቀዳማይ ሚኒስተር ኦለክሲ ሆንቻሩክ፡ ምስ ሚኒስተር ጥዕናን ሚኒስተር ውሽጢ ዓድኢ እታ ሃገርን ብምዃን፡ ነቲ ወጥሪ ንምዝሕሓል ናብታ ከተማ ኣትዮም ኣለዉ።

ምንጪ ስእሊ, Reuters

መግለጺ ስእሊ,

ብዙሓት ሰልፈኛታት ንምግዓዝ እቶም ስደተኛታት ብምቅዋም ሰልፊ ኣካይዶም

ዩክሬናውያን ርህራሀ ከርእዩ ዝተማሕጸነ ፕረዚደንት ዘለንስኪ፡ "መብራሕተኦም እቶም ኣጋይሽ ትሕቲ 30 ዝዕድሚኦም እዮም፤ ንመብዛሕቴና ዳርጋ ደቅና እዮም" ክብል ኣብ መግለጺኡ ሓቢሩ።

ዛጊድ በቲ ኮቪድ-19 ዝብል መጸውዒ ዝተውሃቦ ቫይረስ ልዕሊ 76 ሽሕ ሰባት ዝተትሓዙ ኮይኖም፡ 2,247 ሰባት ድማ ሞይቶም ኣለው።

መብዛሕትኡ እቲ ለበዳን ሞትን ኣብ ውሽጢ ቻይና እዩ ተኸሲቱ ዘሎ።